Modernong Musika—Paglikaw sa mga Tugalbong

GINAKAMUGAN sang iban ang mga bentaha kag disbentaha sang pagsensor sa rock nga musika. Ginabaisan sang iban ang makahalalit nga mga epekto sini sa mga tin-edyer. Apang kon ikaw isa ka Cristiano, ikaduha lamang ining mga butang sa pinakaimportante nga hulusayon: Paano ang musika makaapektar sang imo kaangtanan sa Dios?

Ang giya sa kabuhi sang mga Cristiano amo ang Pulong sang Dios, ang Biblia. Nagaunod ini sing mga prinsipio tuhoy sa tagsa ka bahin sang kabuhi, lakip ang kalingawan. Ang mga sugo sang Biblia nagaamlig sa mga matinumanon gikan sa indi maayo kag makahalalit nga butang. Dugang pa, ang kahamuot sang Dios nasandig sa pagkamatinumanon sa iya Pulong. Busa, ang mga prinsipio sa Pulong sang Dios nagatuytoy sa isa ka Cristiano sa pagpili sing musika. (Salmo 43:3; 119:105; 2 Timoteo 3:​16, 17) Ano, nian, ang Makasulatanhon nga mga panuytoy nga nagabulig sa aton sa pagpili sing musika?

Kinahanglan ang Pagkabalanse

Ang Manugwali 7:16 nagapaandam: “Dili ka maglakas katarong, kag dili ka maglakas kaalam. Ngaa bala laglagon mo ang imo kaugalingon?” Antes pakalainon ang isa ka musika, pamangkuta ang imo kaugalingon kon bala bangod lamang ini sang imo personal nga luyag. Dumduma, mahimo nga indi mo maluyagan ang isa ka musika, apang wala nagakahulugan nga malain ina nga musika.

Ang Manugwali 7:​17, 18 nagapresentar sang pihak nga bahin sining butang sang pagkabalanse: “Dili ka maglakas kalaut, kag dili ka magbinuangbuang. Ngaa bala nga mapatay ka sa wala pa ang imo tion? Maayo nga huptan mo ini, kag sa sina man dili magbuhi ang imo kamot; kay ang nagakahadlok sa Dios magaguwa sa ila tanan.”

Ano, nian, kon ang isa ka Cristiano nagapamati sa musika nga nagapalig-on sing kasingki, rasismo, imoralidad, pagsimba sa Yawa, kag paghikog? Ang Efeso 5:​3, 4 espisipiko nga nagasiling: “Ang pagkamakihilawason kag ang tanan nga kahigkuan ukon paghamkon dili gid paghingadlan sa inyo, subong nga nagakaigo sa mga balaan; magmanginwalay binastos, ukon binuang nga hinambal, ukon malaw-ay nga linahog, nga indi nagakaigo, kundi hinunuo mga pagpasalamat.” Huo, ang mga maluyag mangin abyan ni Jehova indi dapat malingaw sa makahalalit nga mga butang. Indi sila mangatarungan nga tubtob wala nila ginahimo ining malain nga mga butang, wala sing malain sa paglingawlingaw sa sini.

Indi lamang ang liriko sang isa ka ambahanon ang nagahimo sini nga maayo ukon malain gikan sa Makasulatanhon nga pagtamod. Ano nga espiritu ang ginapalig-on sini? Basaha palihog ang Galacia 5:19 tubtob 23 sa imo Biblia. Diin nga listahan ang nagalaragway gid sang espiritu sang musika nga imo ginapamatian? Kon ang musika nagaanggid sa “mga buhat sang unod,” nian maathag ang pagtamod ni Jehova sa sini.

Kon ang isa ka Cristiano magtinguha nga isimpon sa iya kabuhi sang balaan nga pag-alagad sa Dios ang malaw-ay nga musikal nga kalingawan, matukiban niya nga indi sila bagay. Kaangay ini sang pag-inom sing duga sang prutas nga sinimbugan sing hilo. Ang duga sang prutas indi magapugong sa hilo sa pagpatay sa imo. Ang mga pulong sang 2 Corinto 6:​14-17 maathag nga nagapakita sini: “Dili kamo magpaguta sing linibagon upod sa mga dimatinuuhon. Kay ano bala ang pag-updanay sang pagkamatarong kag kalautan? Ukon ano bala ang paghiambit sang kapawa sa kadudulman? Dugang pa, ano bala ang pag-ugyon ni Cristo kay Belial? Ukon ano bala ang kalabtanan sang matinuuhon sa dimatinuuhon? . . . ‘Busa guwa kamo gikan sa ila kag paina ang inyo kaugalingon,’ siling ni Jehova, ‘kag mag-untat sa pagtandog sing dimatinlo nga butang.’ ”

Amo ini, nian, ang Makasulatanhon nga mga hulusayon nga nagaatubang sa mga nagahandum sing suod nga kaangtanan sa Dios. Kon ginaapresyar mo ang mga prinsipio sang Biblia, binagbinaga sing maayo ang musika nga imo ginapamatian. Usisaa sing mahalungon ang imo natipon nga mga plaka kag mga video. Ihaboy ang mga nagasumpakil sa mga prinsipio sang Biblia. Kon nagaduhaduha ka, ihaboy ini. Amo man sa mga konsierto nga aktuwal nga ginatan-aw kag mga balasahon​—kuhaa ang wala nagahisanto sa pagkamatarong.

Ang Huyog sa Paghimo sing mga Balibad

Kon ginaganyat ikaw sang musika nga wala nalakip sa Makasulatanhon nga mga panuytoy, mahimo nga mabudlayan ikaw sa pag-atubang sa hulusayon. Ang iban nagahimo sing mga balibad sa panikasog nga apinan kag pakamatarungon ang ila pagkompromiso. Kon matuod ini sa imo bahin, magdulog kag maghunahuna. Makatarunganon bala ang imo rason, ukon nagapakita lamang ini sang imo emosyon sa musika? Binagbinaga ang masunod nga mga argumento sang iban kag talupangda nga, kon usisaon, ini nga mga argumento mga balibad lamang.

Indi makatalagam nga mamati ako sa sining grupo bangod ang mga katapo sini nagapamatok sa pag-abuso sa droga. Apang ini bala nga grupo malig-on nga nagatindog batok sa iban pa nga kalainan, subong sang pagpakighilawas, kasingki, kag dipagtahod sa awtoridad? “Ang diutay nga tapay nagalatom sang bug-os nga linamas,” siling sang Galacia 5:9.​—Ipaanggid ang Santiago 2:10.

Ang kabuhi sa sining kalibutan wala gid sing hustisya. Mabasol gid bala naton ining mga banda bangod sang ila pagpabutyag sing kaakig sa mga kahimtangan sa kalibutan? Ang Biblia nagapalig-on sang matarong nga kaakig batok sa mga kalautan sining sistema apang ginatudlo sini ang Mesianikong Ginharian subong amo ang solusyon.​—Daniel 2:44; Mateo 6:​9, 10.

Ang masanag nga paglaum sang Cristiano tuhay sa madulom nga panan-aw sang madamo nga musikero nga nagasakdag sang pagrebelde subong solusyon sa kasisit-an sang katawhan. Sa pagkamatuod, ang kaakig sang kalibutan malaglagon kag sapatsapaton, nagapabanaag sang kaalam sang sistema sang mga butang.​—Roma 12:9; Santiago 3:​15-18.

Ang mga musikero sampaton, nahanas pa gani sing maayo. Apang indi ang pagkasampaton sang isa ka musikero kundi ang kaundan sang musika ang ginapamatukan sang mga prinsipio sang Biblia, indi bala? Si Hari Solomon sampaton sa nanuhaytuhay nga mga patag, lakip ang patag sang musika. Apang sang nagtalikod sia gikan sa matuod nga pagsimba, ang Biblia nagareport, “naakig si Jehova kay Solomon, bangod nga nagtalang ang iya tagipusuon gikan kay Jehova.” Subong man, si Nimrod isa anay ka sampaton nga manunukod kag mangangayam, apang sia kag ang iya mga kaupod wala ginkahamut-an sang Dios. Ngaa? Bangod si Nimrod isa ka “gamhanan nga mangangayam batok kay Jehova.”​—1 Hari 11:9; Genesis 10:​8, 9.

Ang pila sang mga ambahanon sang banda indi makahalalit, lakip ang pila ka malulot kag matahom pamatian nga mga ambahanon. Ang katalagman diri amo nga ang isa ka indi malain nga lanton mahimo magdul-ong sa isa sa pagbakal kag mamati sa bug-os nga album sang mga ambahanon, ang kalabanan sini mahimo nga indi maayo. Subong nga ang isa ka tasa sang tubig indi makatinlo sang isa ka tumpok sang lunang, ang paisaisa nga maayo nga ambahanon wala nagabag-o sang kabug-usan nga espiritu sang malaw-ay nga album ukon banda.

Indi gid man si Satanas ang ginasimba sang mga bituon ukon indi sila imoral. Nagaarte lamang sila sa entablado. Ang kamatuoran amo gihapon nga ang musika nga ila ginagamit sa paglingaw sa ila mga tagpalamati nasimbugan, kundi indi man nalatom, sing kalainan. Ang Colosas 3:8 nagasugo sa mga Cristiano, nga indi magpalingaw sa mga butang subong sang kaakig kag pasipala, kundi ‘huklason sila tanan.’ Ginsugo ni Pablo ang mga taga-Efeso nga “mag-untat sa pagpakig-ambit [sa mga anak sang pagkadimatinumanon] sa dimabungahon nga mga buhat sang kadudulman, kundi, hinunuo, sabdungon sila.” Mahimo bala sabdungon sang isa ka tawo nga ginalingaw sang mga buhat sang kadudulman ang mga nagahimo sini?​—Efeso 5:​6, 11.

Wala ko ginapamatian ang mga liriko. Lanton lamang ang ginapamatian ko. Apang ang mga liriko nagasulod sa hunahuna kag nagatuga sing mga problema sa ulihi. Bisan pa sa banta naton wala na sa aton hunahuna ang impormasyon, mahimo nga wala ini malipati. Daw ano ka makatalagam, nian, nga ipadayag ang aton kaugalingon sing kinabubut-on sa mga mensahe nga nagasumpakil gid sa laygay sang Filipos 4:​8, nga ipatuhoy naton ang aton hunahuna sa butang nga putli, hiligugmaon, kag dalayawon.

Dumduma, man, nga ang bisan sin-o nga “luyag mangin abyan sang kalibutan nagahimo sang iya kaugalingon nga kaaway sang Dios.” Amo sini bangod ang kalibutan sang katawhan nga napain sa Dios kag ang espiritu sang kalibutan, mga bunga sang punong Kaaway ni Jehova, nga si Satanas nga Yawa. Hunahunaa ini karon. Apresyahon bala sang isa ka lalaki kon ipasundayag sang iya asawa ang retrato sang iya anay nobyo bisan pa kon magsiling sia nga wala na sia sing pinasahi nga balatyagon para sa iya kundi nga ang retrato isa lamang ka dekorasyon? Indi, indi niya pagtugutan ini sa sulod sang iya balay kag luyag niya nga kalimtan na sia sang iya asawa. Ano kon pasudlon naton sa aton balay kag tagipusuon ang musika nga kasangkapan sang Kaaway ni Jehova? May kinaliwan gid bala kay Jehova kon magsiling kita, “Interesado lamang ako sa lanton; Wala ko ginasapak ang mga liriko”?​—Santiago 4:4; 1 Corinto 10:​21, 22.

Mangin Desidido

Kon nagapadayag ka sang imo kaugalingon sa musika nga nagapadaku sang paghimo sing sayop, ano ang imo matuod nga rason? Mahimo nga wala ka nagaugyon sa malaut nga mga ideya, apang ang musika gid mahimo nga makagalanyat sa imo​—ang tiempo tuman ka makagiliyan, tuman ka makawiwili—​nga indi mo ini maindian kag indi mo luyag untatan.

Apang ang paghimo sing husto nga butang indi pirme mahapos. Ginatilawan kita ilabi na kon ang mga talaksan sang Dios nagasugo sa aton nga sikwayon ang isa ka butang nga aton naluyagan. Mangatarungan bala kita nga ang aton kaso lain, kag “magkimpangkimpang sa duha ka magkatuhay nga mga opinyon” ukon magadesisyon bala kita batok sa ginadumtan ni Jehova?​—1 Hari 18:21.

Walay sapayan sang personal nga sakripisyo nga nadalahig, magamalipayon gid kita kon ang aton desisyon nahamut-an ni Jehova. Nagakahulugan ini nga dapat kita mag-untat sa pagtandog sing dimatinlo nga butang. Kon himuon naton ini, nian si Jehova nagapanaad nga batunon niya kita. Huo, isipon niya kita sa tunga sang iya nahamut-an nga katawhan.​—2 Corinto 6:17.

Interesado gid si Jehova sa aton kaayuhan. Ginhimo niya ang iya mga sugo agod pauswagon ang kalidad sang aton kabuhi. Sabta ang iya sinsero nga pangabay sa Isaias 48:​17, 18. “Ako, si Jehova, nga imo Dios, ang Isa nga nagatudlo sa imo para sa imo kaayuhan, ang Isa nga nagapalakat sa imo sa dapat mo laktan. O kon pamatian mo lamang ang akon mga sugo. Nian ang imo paghidait mangin subong sang suba, kag ang imo pagkamatarong mangin subong sang mga balod sang dagat.”

[Retrato sa Pahina 9]

Kon ang isa ka Cristiano nagapamati sa malaw-ay nga musika, may konsiensia bala sia sa paglaygay sa iban batok sa sini?

[Retrato sa Pahina 11]

Mas magamalipayon ikaw kon ihaboy mo ang ginakangil-aran ni Jehova

[Kahon/Piktyur sa pahina 10]

Isa ka Salabton sang mga Ginikanan

Kon ikaw isa ka ginikanan, may yara ikaw Makasulatanhon nga salabton nga tudluan ang imo kabataan sa paghantop kon ano ang kinatuhayan sang maayo kag malain nga musika. Nagakahulugan ini nga hibaluon mo kon ano ang ila ginapamatian. Nagakahulugan ini nga dapat ikaw mangin malig-on kon ano nga musika ang tugutan mo kag indi tugutan sa sulod sang puluy-an.

Mangatarungan sa imo kabataan. Likawi ang mga argumento nga nagapaluya sang imo pagkamapatihan. Ang mga pinamulong subong sang, “Indi ko mahangpan kon ngaa nagapamati kamo sa sina nga basura,” mahimo gid nga magatiklod sa imo kabataan nga manguyapot sing hugot pa sa ila personal nga luyag. Mahimo nga indi man makapakombinsi kon ipatalupangod mo ang malaw-ay nga estilo sang pagkabuhi sang isa ka musikero, labi na kon wala ini ginapakita sa musika. Ang isa ka pamatan-on nga lalaki nagtuaw: “Sa banta ko ignorante gid ang isa ka tawo nga magsiling nga ang tanan nga rap nga musika malain!”

Gani hibalua ang mga butang. Hibalua kon ano ang pagtamod sang Dios sa sining mga butang. Malipay ang mga Saksi ni Jehova sa pagbulig sa imo paagi sa napasad sa Biblia nga mga publikasyon nga nagahatag sing dugang pa nga detalye. Hibalua ang mga katunayan. Ipaathag nga ang hulusayon amo ang mga talaksan sang Biblia kag indi ang pagpilit sang imo personal nga luyag sa imo kabataan.​—Efeso 6:4.