Ang Pagtamod sang Biblia

Buhat sa Kaluoy nga mga Amot—Isa Bala ka Cristianong Obligasyon?

WALA pa napulo ka tuig ang nagligad, ang PTL (Praise the Lord) Club, nga may ulong-talatapan sa bagatnan-sidlangan nga Estados Unidos, nagpangayo sing mga donasyon subong relihioso nga buhat sa kaluoy. Naggamit sing satellite-TV network kag koreo, nakatipon sila sing ginatos ka milyon dolyares, nga madasig nga nagpuno sang ila mga kaha​—agod ipalapnag kuno ang ebanghelyo.

Handurawa kon ano ang ginabatyag sang linibo nga nagpadala sing kuwarta sa PTL Club sang mabasa nila ang mga balita subong sang ginbalita sang Associated Press nga nagsiling nga si Jim Bakker, ang anay presidente sang PTL, upod sang iya asawa, nga si Tammy, “ginbayaran kuno sing $1.6 milyones nga suweldo kag bonus sang 1986.” Malain pa, ang report nagdugang: “Ginbayad ini bisan pa ang ministeryo may utang nga dimagkubos $50 milyones . . . Mga $265,000 nga kuwarta sang PTL ang ginpain para kay [Jessica] Hahn agod pat-uron ang iya paghipos nahanungod sa [seksuwal] nga paghulid kay Bakker.”

Antes ginhatag ang pamatbat nga pagkabilanggo kay Bakker tungod sang pagdaya sa iya mga sumulunod, ang huwes nga nagkasaba sa iya nagsiling: “Kita nga may relihion naugot kuwartahan sang gutom sa kuwarta nga mga manugwali kag mga pari.”

Indi lamang relihion ang makugi nga nagaganyat sa emosyon sang mga manug-amot kag nian nagabulsa sang kalabanan nga kuwarta. Kinaandan na para sa pila ka nagapangayo sing amot nga taguon ang kapin sa 90 porsiento sang donasyon nga nakuha nila.

Makatilingala bala, nian, nga matak-an na ang mga tawo sa sinang mga buhat sa kaluoy? Apang, ano ang himuon sang mga Cristiano? Obligado bala sila nga maghatag sa organisado nga mga buhat sa kaluoy? Anong panuytoy ang ginahatag sang Biblia agod pat-uron ang maalamon nga paggamit sang mga pundo kon nagabulig sa iban? Ano ang pinakamaayo kag pinakapraktikal nga paagi sa pagbulig sa iban?

Paghatag​—Huo kag Indi

Agod makapat-od, ang laygay sang Biblia amo ang magmalulo kag magmaalwan sa mga nagakinahanglan. Kutob sang una nga panahon ang katawhan sang Dios ginpalig-on nga “mangin mahinatagon, handa sa pagpaambit.” (1 Timoteo 6:18; Deuteronomio 15:​7, 10, 11) Sa katunayan, ang mga Cristiano ginasugo sa 1 Juan 3:17: “Ang bisan sin-o nga may pangabuhian sang kalibutan kag nagatan-aw sa iya utod nga yara sa kakulangan apang nagapugong sang iya kaluoy sa iya, paano bala ang pagpabilin sang gugma sang Dios sa iya?”

Maghatag, huo; apang mag-andam! Pirme kita ginapangayuan sang mga buhat sa kaluoy, mga relihion, kag sang tuigan nga mga kampanya sang serbisyo sa komunidad; ang kalabanan nagahimo sing makagalanyat nga pagpangayo. Apang, sa pagbulubanta maayo nga dumdumon ang hulubaton sa Biblia: “Ang kulangkulang nagapati sa tagsa ka pulong, apang ang mahalungon nagatan-aw sa iya paglakat.” (Hulubaton 14:15) Sa iban nga hambal, mag-andam sa pagbaton sang pakitakita nga mga pangabay ukon mga panaad sang mga buhat sa kaluoy. Paano gid ginagamit ang natipon nga kuwarta? Ginagastuhan bala ang mga organisasyon nga dapat supurtahan sang isa ka Cristiano? Ang ila bala buluhaton politikanhon, nasyonalistiko, ukon konektado sa butig nga relihion? Ang ginasaad nga katuyuan praktikal bala kag wala nagasumpakil sa Makasulatanhon nga mga prinsipio?

Ang pila ka mga buhat sa kaluoy madamo sing nahimo para sa mga tawo nga nagakinahanglan. Sang naapektuhan sang kinaugali nga mga kapahamakan ukon makahalapay nga balatian, madamong beses nga ang mga Cristiano nakabaton sing mga benepisyo gikan sa sinang mga buhat sa kaluoy. Apang, ang iban nga mga buhat sa kaluoy may daku nga administratibo nga gasto ukon daku nga gasto sa pagtipon sing pundo, nga bangod sini diutay lamang nga bahin sang kuwarta nga natipon ang aktuwal nga ginagamit para sa gin-anunsio nga katuyuan. Halimbawa, nasapwan sang ulihi nga pagsurbe sa 117 ka pinakadaku nga wala sing ganansia nga mga organisasyon sa Estados Unidos, lakip ang mga buhat sa kaluoy, nga kapin sa un-kuwarto sa ila ang nagasuweldo sa ila mataas nga mga ehekutibo kada tuig sing $200,000 ukon kapin pa. Masunson nga ginapakita sang mga awdit ang mga gasto para sa luhuso nga mga butang kag ang paggasto sa nagapagusa nga estilo sang pagkabuhi. Bisan ano man ang ngalan sang buhat sa kaluoy, indi mahimo nga ang pag-amot sa sinang mga padugi magatuman sang sugo sang Biblia nga buligan ang mga nagakinahanglan.

Timbang nga Pagtamod

Bisan pa wala sing isa ang luyag mag-uyang sang iya kuwarta​—ukon malain pa, makita ini nga ginagamit sa pagpamanggad sa maiyaiyahon nga mga tawo​—kinahanglan man nga magbantay batok sa pagkamamulayon sa paghatag. Indi paggamita ang dimaayo nga ginhimo ukon bisan ang pagkadibunayag sang pila ka “mga buhat sa kaluoy” subong balibad agod tamayon ang mga nagakinahanglan ukon punggan ang balatyagon sang kaluoy. Ang Hulubaton 3:​27, 28 nagalaygay: “Dili pagpunggi ang maayo gikan sa ila sa diin naigo ini, kon ini yara sa gahom sang imo mga kamot sa paghimo sini. Dili ka magsiling sa imo isigkatawo: ‘Lakat ka, kag kari liwat kag buwas magahatag ako,’ kon yara ini sa luyo mo.” (Ipaanggid ang 1 Juan 3:18.) Indi paghunahunaa nga ang tanan nga organisado nga mga buhat sa kaluoy walay pulos ukon madayaon. Usisaa ang mga katunayan, nian magdesisyon sing personal kon bala magahatag ka ukon indi.

Madamo ang nagdesisyon nga magbulig paagi sa personal, direkta nga mga dulot sa mga nagakinahanglan nga mga indibiduwal kag mga pamilya. Sa amo, ang mga nagahatag nakapat-od gid sa praktikal, gilayon nga pagagamitan sang ila mga amot. Nagahatag man ini sing kahigayunan nga magpalig-on kag magpabutyag sing kalulo paagi sa mga pulong subong man sa mga buhat. Bisan pa wala ka sing madamo nga mahatag sa materyal, sa gihapon matigayon mo ang kalipay sang paghatag. Sa masunod nga tion nga mabalitaan mo ang matuod nga pagkinahanglan sina nga bulig, ihatag ang masarangan mo sa espiritu sang 2 Corinto 8:12: “Kon ang pagkahanda yara, ginakahamut-an ini suno sa yara sa tawo, indi suno sa wala sa iya.”

Dumduma man nga kon kaisa indi lamang kuwarta ang may daku nga mabulig. Si Jesus nagsugo sa iya mga sumulunod nga “wali sa nagakadto kamo, nga nagasiling, ‘Ang ginharian sang langit malapit na.’ . . . Ginbaton ninyo sa walay bayad, ihatag sa walay bayad.” (Mateo 10:​7, 8) Sa karon man, narealisar sang mga Cristiano nga ang tion, kusog, kag kuwarta nga ginhinguyang sa pagsakdag sa pagpanaksi sang Ginharian​—nga nagapauswag sang kabuhi kag nagahatag sing paglaum—​amo ang pinakamaayo nga sahi sang maluluy-on nga paghatag.

Ang pagtamod sang Biblia, nian, amo ang mangin malulo, maalwan, kag praktikal. Nagapahanumdom ini sa aton nga ang materyal nga bulig masunson nga kinahanglan, kag ang nagakinahanglan indi dapat pagkalimtan. Sa amo man nga tion indi magbatyag nga obligado sa paghatag sa bisan ano kag sa tanan nga nagapangayo sing kuwarta sa imo. Binagbinaga kon paano labing maayo nga magamit ang imo kuwarta sa pagpahamuot sa Dios kag sa paghatag sing pinakadakung praktikal nga bulig sa imo kaugalingon nga pamilya kag sa imo isigkatawo. (1 Timoteo 5:8; Santiago 2:​15, 16) Iluga si Jesus sa pagkamapanilagon kag pagkamahunahunaon sa kinahanglanon sang iban​—sa espirituwal kag materyal. Ang Hebreo 13:16 nagasiling: “Dili malimot sa paghimo sing maayo kag sa pagpanagtag sang yara sa imo, kay sa amo nga mga halad nahamuot ang Dios.”