Mga Iskandalo sa Sekso Nagbuyagyag sa mga Ebanghelista sa TV

KASAN-O lang ang mga ebanghelisa sa TV sa Estados Unidos paagisod nga nabuyagyag bangod sang dinagakaigo nga sekso. Ginpahayag nga ang anak sang ebanghelista anay nga si Pat Robertson, isa ka kandidato sa pagkapresidente sang E.U., ginmabdos sa guwa sang kasal. Kag ang iban pa nga mga ebanghelista, ang labing kilala amo si Jim Bakker, nabuyagyag subong mga makilahion.

Apang, ang iskandalo sang ulihi nagsentro kay Jimmy Swaggart, ang ebanghelista nga nagmulay sa seksuwal nga kabuangan sang karibal nga mga predicador sa TV nga sanday Jim Bakker kag Marvin Gorman. Suno sa mga report, si Gorman, man, nakakuha sing mga laragway ni Swaggart upod sa isa ka pampam. Sa pag-usisa sa mahigko nga kagamo, ang kolumnista sang New York Post nga si Carl T. Rowan nagsiling:

“Ang pinakamalain nga butang nga nahimo ni Swaggart, kon sa akon lang, indi ang iya pagdala sing pampam sa motel. Kundi amo ang iya salimpapaw nga panikasog sa paglaglag paagi sa pulong kay Rev. Jim Bakker sa tapos mabalahuba nga ang pangulo sang PTL Ministry may seksuwal nga relasyon sa sekretarya sang iglesia nga si Jessica Hahn.

“Ang salimpapaw nga pag-atake ni Swaggart kay Bakker kag sa PTL isa ka maathag nga paninguha nga dalhon sa iya emperyo ang mga dolyar nga ginahatag sang mga nadaya sa lugar ni Bakker.

“Ang butang nga kaanggid gid sa sini amo ang negosyo sa droga nga nagatinguha sa pagpierdi sa iban kag agawon ang iya teritoryo.

“Ang pagkaanggid indi malayo,” siling ni Rowan. “Ang mga Swaggart, mga Bakker, mga Gorman kag ang iban nagabaligya sing narkotiko nga ginatawag relihion, kag sa paghimo sini ginahatagan nila ang matuod nga relihion sing malain nga ngalan.”