Nagsaylo Sila sa Puerto Rico

SANG Mayo 9, 1993, ang Spanish Translation Department, nga ginatapuan sang 20 ka katapo, nagsaylo halin sa bug-os kalibutan nga ulong-talatapan sang mga Saksi ni Jehova sa Brooklyn, New York, padulong sa bag-o nga sanga talatapan sang Watch Tower Society sa Guaynabo, Puerto Rico. Ngaa? Ang isa ka responsable nga katapo sang talapuanan sang mga manunulat sa ulong-talatapan sang mga Saksi ni Jehova nagpaathag: “Nasapwan namon nga mas maayo ang trabaho sang mga manugbadbad kon nagapuyo sila sa duog diin ang hambal nga ila ginabadbaran ginahambal sa adlaw-adlaw. Dugang pa, makadungan sila sa bisan anong mga pagbag-o nga ginahimo sa sina nga hambal. Ang Puerto Rico napilian nga isa ka kombenyente nga sentro para sa bug-os nga nagahambal sing Espanyol nga kalibutan.”

Ang Spanish Translation Department nahamtang sa Brooklyn, New York, sugod sang 1928 kag nangin importante sa pagpalapnag sing mensahe sang Ginharian paagi sa pagbulig nga ang mga literatura sang Biblia matigayon sang mga 350,000,000 ka nagahambal sing Espanyol nga mga tawo sa bug-os nga kalibutan. Ang Lalantawan una nga ginbadbad sa Espanyol sang 1917. Sa karon, kapin sa 3,000,000 ka kopya sang Ang Lalantawan kag kapin sa 2,000,000 ka kopya sang Magmata! ang ginaimprinta sa Espanyol kada bulan. Sining nagliligad nga tinuig ang sanga sang Watch Tower Society sa Espanya nakahatag man sing mapuslanon nga bulig sa sining hilikuton, ilabi na sa pagbadbad sing Magmata! nga magasin. May yara kapin sa 1,100,000 ka nagahambal sing Espanyol nga mga Saksi ni Jehova sa kalibutan, mga 25 porsiento sang kabilugan nga kadamuon sang mga Saksi sa bug-os kalibutan. Ini nga kadamuon nagalakip sa tignapulo ka libo nga imigrante nga nagaalagad sa kadutaan nga wala nagahambal sing Espanyol, subong sang Australia, Alemanya, Sweden, kag Estados Unidos.

Ang pagsaylo sa mas daku kag mas bag-o nga mga pasilidad sa Puerto Rico may isa pa ka benepisyo. Nagatugot ini sa mga manugbadbad kag mga proofreader gikan sa nanuhaytuhay nga mga pungsod, subong sang Colombia, Mexico, Puerto Rico, Espanya, kag Venezuela, nga mahiusa sa isa ka sentral nga lokasyon agod nga ang internasyonal nga kinaiya sang mga publikasyon sang Sosiedad sa Espanyol mapauswag sing dugang pa. Magabulig ini sa pagpaalinton sang mensahe sang Ginharian sa isa ka matin-aw kag sibu nga paagi sa nagahambal sing Espanyol nga katawhan sa bug-os kalibutan. Ginapaabot namon ang pagpakamaayo ni Jehova sa sining bag-o nga pagbag-o.