Ang mga Saksi ni Jehova sa Bug-os nga Kalibutan—Puerto Rico

SA ULOT sang Caribbean Sea kag At­lan­tic ­Ocean nahamtang ang matambok kag tropiko nga pulo sang Puer­to Ri­co. Gin-angkon ini ni Christopher Co­lum­bus para sa Espanya sang 1493 kag ginhingalanan ini nga San Juan Bautista sunod kay Juan Bautista. Ang labing daku nga siudad sini madugay na nga ginatawag nga Puer­to Ri­co, ukon “Manggaranon nga Pantalan.” Sang ulihi, ini nga ngalan gingamit para sa bug-os nga pulo, samtang ang siudad gintawag nga San Juan.

Ang Puerto Rico napamatud-an nga isa ka manggaranon nga pantalan sa madamo nga paagi. Madamo nga bulawan ang ginpadala halin diri sadtong una nga mga tinuig sang paggahom sang Katsila. Ang pulo nagabaligya karon sa luwas sing tubo, kape, plan­tain, kag sitrus nga mga prutas, bisan pa nga ang mga industriya sa pagpatubas kag pagpangabudlay amo ang daku nga palangabuhian karon. Apang, ang Puerto Rico napamatud-an nga isa ka manggaranon nga pantalan sa labi pa ka importante nga kahulugan.

Ang maayong balita nahanungod sa Ginharian sang Dios ginsugdan nga ibantala diri sang katuigan 1930. Karon, may yara kapin sa 25,000 ka manugbantala sang maayong balita sa Puer­to Ri­co. Sang 1993 ang katapo sa sining sanga sang Watch Tower Society nagdugang halin sa 23 tubtob sa kapin sa 100. Ini nga pagdugang kinahanglanon agod matatap sang sanga ang pagbadbad sing literatura sa Biblia sa Espanyol, nagahimo sina nga mga publikasyon nga matigayon sa mga 350,000,000 ka nagahambal sing Espanyol nga katawhan sa bug-os nga kalibutan.

Isa ka Bag-ong Latagon

Ang sanga talatapan nagareport man: “Ang bag-o nga latagon ginbuksan sa Puerto Rico bangod nagapanikasog kami nga mapalab-ot ang mensahe sang Ginharian sa mga bungol. Isa ka utod nga babayi ang nagasugid sang masunod nga eksperiensia: ‘Nagapangabudlay ako sa tunga sang mga bungol kag ginduaw ang isa ka babayi nga may duha ka magagmay nga kabataan. Sang mahibaluan niya nga Saksi ako, ginpalakat niya ako sa gilayon bangod indi luyag sang iya bana, nga isa man ka bungol, ang mga Saksi ni Jehova.

“‘Mga pila ka bulan sang ulihi ginduaw sini nga babayi ang isa ka abyan nga nagatuon sing Biblia upod sa mga Saksi. Nagbuylog sia sa pagtuon kag naluyagan gid niya ini. Ginduaw ko liwat ang babayi, kag ginsulit niya nga indi luyag sang iya bana ining mga Saksi. Apang, luyag niya mahangpan ang Biblia kag natak-an na sia sa iya simbahan bangod wala ini nagatudlo sang Biblia. Nagsugod kami sa pagtuon, nga nagagamit sing tract. Isa ka adlaw ginsingganan niya ako nga magbalik sa Sabado bangod yara ang iya bana. “Apang indi bala nga indi niya luyag sa amon?” pamangkot ko. Sia nagsabat: “Luyag niya mahibaluan kon ano gid ang ginatudlo sang mga Saksi ni Jehova.”

“‘Pagkadason nga adlaw nanuktok sila nga duha sa akon ganhaan! Sanglit madamo sing pamangkot ang bana, gin-agda ko sila sa amon mga miting para sa mga bungol. Nag-abot sia sing una pa sa akon kag wala magpalya sa miting sugod sadto. Nagabantala sia sa iban pa nga mga bungol, nagtambong sa asambleya, kag malangkagon nga nagahulat sa pagpabawtismo.’ ”

Ang report sang sanga nagapadayon: “Sa amon distrito nga kombension sini nga tuig, ang bug-os nga programa ginhatag sa ­sign lan­guage (de-senyas), gani madamo nga bungol ang nagtambong kaupod sang ila mga pamilya. Ang katapusan nga pamulongpulong nangin isa gid ka makatalandog nga higayon sang ginsambit sang humalambal ang hilikuton nga ginahimo sa tunga sang mga bungol kag nagsiling nga mga 70 ang nagtambong. May mabaskog nga palakpak, apang, subong sang ginsiling sang humalambal, indi ini mabatian sang mga bungol. Gani nagapangabay sa mga bungol nga magtulok sa tumalambong, ginsulit sang humalambal ang pamangkot, ‘Nalipay bala kamo nga makaupod ninyo diri ang inyo bungol nga mga kauturan?’ kag ginpangabay ang tumalambong sa pagpamalakpak paagi sa pagkaway sang duha ka kamot. Isa ka makalilipay nga talan-awon nga makita ang 11,000 ka kauturan nga lalaki kag babayi nga nagasabat paagi sa pagkaway sang ila kamot. Nalipay gid sing daku ang amon bungol nga mga kauturan nga lalaki kag babayi kag nagbatyag nga bahin sila sang daku nga paghiliutod. Madamo ang nakahibi sa kalipay.”

Samtang ang mga Saksi ni Jehova nagapakigbahin sa hilikuton sa pag-ani sa Puerto Rico, walay duhaduha nga magapadayon ini nga mangin manggaranon nga pantalan. Ang “mga karnero” sang Dios, nga ginatawag niya nga “bilidhon nga mga butang sang tanan nga pungsod,” padayon nga magasulod agod ang balay ni Jehova mapuno sing himaya.​—⁠Juan 10:16; Hageo 2:⁠7.

[Kahon sa pahina 9]

LARAWAN SANG PUNGSOD

1994 nga Tuig sang Pag-alagad

KATAASON SANG KADAMUON NGA NAGAPANAKSI: 25,428

RATIO: 1 ka Saksi sa 139

TUMALAMBONG SA MEMORYAL: 60,252

PROMEDYO NGA PAYUNIR NGA MGA MANUGBANTALA: 2,329

PROMEDYO NGA PAGTUON SA BIBLIA: 19,012

KADAMUON NGA NABAWTISMUHAN: 919

KADAMUON SANG KONGREGASYON: 312

SANGA TALATAPAN: GUAYNABO