“Pagtuon sa Leksion sang Pagkamahinangpanon”

SAMTANG nagahilapit kita sa katapusan sang ika-20 nga siglo, nakatuon bala ang katawhan sa kabilugan sing bisan ano nga mga leksion gikan sa masingki nga maragtas sini kutob sang 1914? Si Federico Mayor, direktor heneral sang UNESCO (United Nations Educational, Scientific, and Cultural Organization), indi tuman ka malaumon sa isa ka artikulo nga iya ginsulat para sa The Unesco Courier. “Ang kalibutan nga ang paglutaw sini sarang mahantop . . . wala nagapukaw sing bug-os tagipusuon nga kakunyag. Relihioso nga pundamentalismo, nasyonalismo, pagkaugot sa iban nga mga rasa kag etniko nga mga grupo, kontra-semitismo: ang madlos sang kahilwayan nagpasingkal liwat sa mga baga sang dumot. . . . Ang pagkalusod sang daan nga kahimusan nagbilin sa latagon nga bukas para sa tanan nga sahi sang bag-ong mga inisyatibo, ang iban sini sobra kagubot​—kag ang kasingki nagadugang sa walay unod nga kahimtangan.”

Ngaa nagadugang ang kasingki? Ngaa ang katawhan nagadinumtanay kag nagapinatyanay bangod lamang sang mga pagkatuhay sa relihion ukon sa etniko nga ginhalinan? Kon bala sa anay Yugoslavia, sa India, sa Naaminhan nga Ireland, sa Estados Unidos, ukon bisan diin sa kalibutan, ang isa sang gamot nga mga kabangdanan daw amo ang sayop nga edukasyon. Sa baylo nga makatuon sing paghangpanay kag pagtahuray, ang katawhan nakatuon sing indi pagsalig kag dumot gikan sa ila mga ginikanan, gikan sa ila mga eskwelahan, kag gikan sa katilingban sa kabilugan.

Si Federico Mayor nagpadayon: “Bayaan naton inang kwestionable nga pagpabaya nga nagatugot sa aton nga batason ang indi mabatas​—ang kaimulon, gutom kag pag-antos sang minilyon ka tawo. Kon himuon naton ini, masugata naton ang kainit sang silak sang kaluoy kag paghiliutod.” Dungganon ini nga mga sentimiento. Apang anong praktikal nga mga paagi ang nagaluntad nga makapabag-o sang nadulman nga espiritu sang aton ginatawag nga nasanagan nga kalibutan?

Kapin sa 2,500 ka tuig ang nagligad, ginrekord ni Isaias ining mga pulong ni Jehova: “Ang tanan mo nga anak mangin tawo nga tinudluan ni Jehova, kag ang paghidait sang imo mga anak mangin bugana.” (Isaias 54:13) Sanglit ang “Dios gugma,” nagakahulugan ini nga ang mga nagasunod gid sa iya mga prinsipio makatuon sing paghidait, indi sing inaway; sing gugma, indi sing dumot; sing pagkamahinangpanon, indi sing pagkadimahinangpanon.​—1 Juan 4:8.

Sin-o ang nagasakdag sining panudlo nga nagadul-ong sa katawhan sa paghidait kag gugma kag pagkamahinangpanon? Sin-o ang mga nagapuyo nga may paghiusa walay sapayan sang ila ginhalinan nga pungsod? Sin-o ang nakabaton sing edukasyon sa Biblia nga nagpabag-o sang bug-os nga pagtamod halin sa pagkamadinumtanon padulong sa pagkamahigugmaon? Ginarekomendar namon nga usisaon mo ang mga panudlo kag mga buhat sang mga Saksi ni Jehova agod matukiban mo kon ngaa sila may bug-os kalibutan gid nga paghiusa.​—Juan 13:​34, 35; 1 Corinto 13:​4-8.