Ang Pagtamod sang Biblia

Daw Ano ka Matinuguton ang Dios?

“ANG DIOS, WALAY SAPAYAN NGA MAY KABUBUT-ON NGA IPAKITA ANG IYA KAAKIG KAG IPAKILALA ANG IYA GAHOM, NAGBATAS NGA MAY DAKU NGA PAGPAILOB SA MGA SULUDLAN SANG KAAKIG NGA GINHIMO NGA TAKUS SA KALAGLAGAN.”​—⁠ROMA 9:22.

GINTUGUTAN sang Dios ang madamo nga kalainan kag dayag nga kalautan sa bug-os nga maragtas. Kapin sa 3,000 ka tuig na ang nagligad, nanalambiton si Job: “Ngaa ang mga malauton padayon nga nagakabuhi, nagatigulang, kag nangin manggaranon man? Ang ila mga anak nagatindog sing malig-on kaupod nila nga ila makita, kag ang ila mga kaliwatan sa atubangan sang ila mga mata. Ang ila mga balay paghidait, hilway sa kakugmat, kag ang bilugon sang Dios wala sa ila.” (Job 21:​7-9) Ang iban nga mahigugmaon sa katarungan, kaangay ni manalagna Jeremias, nagpakita man sing kabalaka sa daw pagkamatinuguton sang Dios sa malaut nga mga tawo.​​—⁠Jeremias 12:​1, 2.

Ano sa banta mo? Naligban ka bala sa pagpahanugot sang Dios sa kalautan? Ginahunahuna mo bala kon kaisa nga dapat kuntani papason na gilayon sang Dios ang malaut nga katawhan? Binagbinaga ang ginasiling sang Biblia tuhoy sa mga limitasyon sang pagkamatinuguton sang Dios kag ang mga rason sini.

Ngaa Matinuguton ang Dios?

Una, dapat mamangkot kita: Ngaa abi ang Dios, nga amo ang may pinakamataas nga talaksan sang pagkamatarong, nagatugot pa gid sa kalautan? (Deuteronomio 32:⁠4; Habacuc 1:13) Nagkahulugan bala ini nga ginakunsinte sang Dios ang kalainan? Indi gid! Binagbinaga ang masunod nga ilustrasyon: Handurawa nga may isa ka manugbusbos nga nagalapas sa sadsaran nga pagsulundan sa katinlo kag nagatuga sing tuman nga kasakit sa iya mga pasyente. Kon nagatrabaho sia sa isa ka ospital, indi ayhan sia pahalinon sa gilayon? Apang may mga sirkunstansia nga kinahanglan ang tumalagsahon nga pagkamatinuguton. Sa isa ka emerhensia katama, halimbawa sa patag-awayan, indi bala kinahanglan nga tugutan ang mga manugbusbos sa pagbulong sa kinaraan kag makatalagam nga mga kahimtangan, ayhan sa paggamit pa gani sang ginakabig nga mapigaw nga kagamitan sa pagbusbos?

Sing kaanggid, mapailubon nga ginatugutan karon sang Dios ang madamong butang nga ginakabig niya nga indi gid kalahamut-an. Bisan pa ginadumtan niya ang kalautan, ginapahanugutan niya nga magpadayon ini sing temporaryo. May nagakaigo ini nga mga rason. Kay man, nagatugot ini sing tion para malubad sing permanente ang importante nga mga hulusayon nga ginpautwas sang nagrebelde si Satanas sa hardin sang Eden. Ini nga mga hulusayon may suod nga kaangtanan sa pagkamatarong kag nagakaigo nga paagi sang Dios sa paggahom. Isa pa, ang iya mapailubon nga pagbatas sang kalapasan nagahatag sing tion kag kahigayunan sa mga malaut para magbag-o.

Isa ka Maluluy-on kag Mapailubon nga Dios

Ang aton unang mga ginikanan, si Adan kag si Eva, naghimbon kay Satanas sa pagrebelde batok sa Dios. May rason kuntani ang Dios nga papason sila sing insigida. Sa baylo, nangin maluluy-on kag mapailubon sia, mahigugmaon nga gintugutan sila nga magtigayon sing mga anak. Apang ining mga anak, kag ang bug-os nga pamilya sang tawo nga gikan sa ila, nabun-ag nga makasasala.​​—⁠Roma 5:​12; 8:​20-​22.

Gintuyo sang Dios nga tabangan ang tawo sa sining makaluluoy nga kahimtangan. (Genesis 3:15) Apang, samtang wala pa, nagapakita sia sang daku gid nga pagpailob kag kaluoy, bangod nahangpan niya kon paano nagaapektar sa aton ang di-kahimpitan nga napanubli kay Adan. (Salmo 51:⁠5; 103:13) Sia “bugana sa mahigugmaon nga kaayo” kag handa kag luyag ‘magpatawad sing bugana.’​​—⁠Salmo 86:​5, 15; Isaias 55:​6, 7.

Mga Limitasyon sang Pagkamatinuguton sang Dios

Apang, mangin di-mahigugmaon kag di-makatarunganon para sa Dios nga tugutan ang kalapasan nga magpadayon sing dayon. Wala sing mahigugmaon nga amay nga magatugot sing dayon sa kalautan sang isa sang iya kabataan nga padayon kag hungod nga nagahatag sing grabe nga kabudlayan sa iban nga katapo sang pamilya. Busa, ang pagpailob sang Dios sa pagpahanugot sa sala pirme nga balanse sa iban pa nga mga kinaiya kaangay sang gugma, kaalam, kag katarungan. (Exodo 34:​6, 7) Sa tion nga matuman na ang katuyuan sang iya pagkamainantuson, ang pagtugot niya sa kalainan matapos na.​​—⁠Roma 9:⁠22.

Ginpatalupangod ini sing maathag ni apostol Pablo. “Sa nagligad nga mga kaliwatan,” siling niya sa isa ka okasyon, “gintugutan [sang Dios] ang tanan nga pungsod nga maglakat sa ila mga dalanon.” (Binuhatan 14:16) Sa isa pa ka okasyon ginsambit ni Pablo kon paano “ginpaligad sang Dios ang mga tion sina nga pagkawalay hinalung-ong” sa bahin sang mga tawo nga naglapas sa iya mga kasuguan kag mga prinsipio. “Karon,” padayon ni Pablo, “nagasiling [ang Dios] sa katawhan nga sila tanan bisan diin dapat maghinulsol.” Ngaa? “Bangod nagtalana sia sing isa ka adlaw nga tuyo niya nga hukman ang napuy-an nga duta sa pagkamatarong.”​​—⁠Binuhatan 17:​30, 31.

Magbenepisyo Karon Gikan sa Pagkamatinuguton sang Dios

Matuod, nian, nga indi dapat maghaumhaum ang bisan sin-o nga mahimo niya isikway ang mga kasuguan sang Dios kag nian mangayo lang sing kapatawaran sa Dios kon luyag niya maglikaw sa mga resulta sang iya mga buhat. (Josue 24:19) Madamo sa dumaan nga Israel ang naghunahuna nga puwede nila ini mahimo. Wala gid sila nagbag-o. Nawasi nila ang katuyuan sang pagkamatinuguton kag pagpailob sang Dios. Wala gintugutan sing dayon sang Dios ang ila kalautan.​​—⁠Isaias 1:​16-​20.

Ginapakita sang Biblia nga agod malikawan ang katapusan nga paghukom sang Dios, ang isa dapat ‘maghinulsol’​​—⁠buot silingon, masinulub-on niya nga kilalahon ang iya di-himpit, makasasala nga kahimtangan sa atubangan sang Dios kag nian matuodtuod nga maglikaw sa kalainan. (Binuhatan 3:​19-​21) Nian, pasad sa halad nga gawad ni Cristo, magapatawad si Jehova nga Dios. (Binuhatan 2:​38; Efeso 1:​6, 7) Sa iya gintalana nga tion, dulaon sang Dios ang tanan grabe nga epekto sang Adamiko nga sala. May yara “isa ka bag-ong langit kag isa ka bag-ong duta” diin indi na sia magtugot “sa presensia . . . sang mga butang nga nagasiyagit para laglagon.” (Bugna 21:​1-5; Roma 9:​22, Phillips) Daw ano katahom nga resulta sang di-kinaandan, apang may limitasyon, nga pagkamatinuguton sang Dios!

[Retrato sa pahina 23]

Gintugutan sang Dios si Adan kag si Eva nga magpanganak