Ang Pagtamod sang Biblia

Isa Bala ka Dios sang Inaway si Jehova?

ANG iban nga bumalasa sang Biblia madugay na nagasumbong nga si Jehova isa ka dios sang inaway, kag isa nga uhaw sa dugo. Halimbawa, sa iya libro nga The Story of Civilization​—Man’s Own Show, si George A. Dorsey, nagasiling nga ang Dios sang Biblia, nga si Jehova, “amo ang Dios sang mga manug-ati, manugpaantos, mga hangaway, sang pagpanalakay, sang tagsa ka sapat-sapaton nga handum.” Ang kritiko sang Biblia nga si H. Bainton matigdas nga nagasiling: “Ang inaway indi tuman kapintas kon wala nagapakigbahin sa sini ang Dios.”

Si Jehova isa gid bala ka dios sang inaway? Sia bala, subong sang ginasiling sang iban, nalipay sa pagpamatay sa mga tawo nga wala sing sala?

Nagligad nga mga Paghukom

Matuod, prangka nga ginasugid sang Biblia ang nagligad nga mga paghukom ni Jehova. Apang, masami nga batok ini sa didiosnon nga mga tawo. Halimbawa, tubtob lamang nga ang duta sang adlaw ni Noe “napuno sing panglugos” nga si Jehova nagsiling: “Yari karon, nagapadala ako sing anaw sang mga tubig sa ibabaw sang duta sa paglaglag sang tanan nga unod nga may ginhawa sang kabuhi.” (Genesis 6:​11, 17) Tuhoy sa isa pa ka paghukom, bangod lamang nga ang mga siudad sang Sodoma kag Gomorra “nagmakihilawason kag nagpatuyang sa dinagakaigo nga kailigbon” nga ginpaulan sang Dios ang “asupre kag kalayo.”​—Judas 7, The New Berkeley Version; Genesis 19:24.

Nalipay bala ang Dios sa paglaglag sa tanan nga unod sang adlaw ni Noe? Ukon nalipay bala sia sa paglaglag sa mga pumuluyo sang Sodoma kag Gomorra? Para sa sabat, tan-awon naton ang mga hitabo nga nagapalibot sang adlaw ni Noe. Sa tapos magsiling nga papason sang Dios ang malauton nga mga tawo gikan sa nawong sang duta agod tinluan ang duta gikan sa kasingki, ang Biblia nagasiling: “Si Jehova . . . nagkalisod sa iya tagipusuon.” Huo, nagkalisod ang Dios bangod nga “ang tagsa ka huyog sang painoino sang tagipuson sang [tawo] malaut gayod sing dalayon.” Busa, agod luwason ang madamo gikan sa nagapakari nga Anaw, ginpadala sang Dios si Noe, “nga manugbantala sing pagkamatarong,” agod ipahibalo ang nagapaandam nga mensahe kag tukuron ang arka para sa kaluwasan.​—Genesis 6:​5-18; 2 Pedro 2:5.

Sa kaanggid nga paagi, antes ginpadala ang mga anghel sa paglaglag sa Sodoma kag Gomorra, ang Dios nagsiling: “Magakunsad ako kag tan-awon kon nahimo nila sing bug-os ang suno sa singgit nga nag-abot sa akon batok sa ila . . . gusto ko mahibaluan ini.” (Genesis 18:​20-32, The Jerusalem Bible) Ginpasalig ni Jehova si Abraham (nga ang iya hinablos nga si Lot nga nagapuyo sa Sodoma) nga kon may makita Sia nga napulo lamang ka matarong nga tawo, indi niya paglaglagon ining mga siudad. Ang Dios bala nga nalipay sa pagpatulo sing dugo may amo sina nga sahi sing maluluy-on nga pag-ulikid? Sa kabaliskaran, indi bala makasiling kita nga ang isa sang panguna nga mga kinaiya ni Jehova amo ang kaluoy? (Exodo 34:6) Sia mismo nagasiling: “Wala ako sing kahamuot sa kamatayon sang malauton, kundi nga ang malauton magbiya sa iya dalanon kag magkabuhi.”​—Ezequiel 33:11.

Ang masakit nga mga paghukom gikan sa Dios masami nga natabo bangod ang malauton nga mga tawo matig-a nga nagdumili sa pagbiya sang ila malain nga dalanon, indi bangod nga nalipay si Jehova sa pagpatay sa mga tawo. Apang mahimo magpalibog ka, ‘Indi bala ginpalig-on ni Jehova ang mga Israelinhon nga makig-away batok sa mga Canaanhon kag papason sila?’

Ang mga Inaway sang Dios Kinahanglanon Para sa Paghidait

Ginalaragway sang maragtas ang malaw-ay nga larawan sang kabuhi sang mga Canaanhon​—tuman gid sila ka malauton. Kinaandan lamang ang espiritismo, paghalad sing bata, sadistiko nga kasingki, kag madamo nga porma sang pagsimba sa tiko nga sekso. Subong Dios sang katarungan nga nagapangayo sing eksklusibo nga debosyon, indi mapahanugutan ni Jehova ining malaw-ay nga mga buhat nga magtublag sa paghidait kag kalig-unan sang inosente nga mga tawo, ilabi na sang Israel. (Deuteronomio 5:9) Halimbawa, hunahunaa nga ang komunidad nga imo ginaistaran wala sing talahuron nga kapulisan ukon militar nga nagapatuman sa mga kasuguan sang duta​—indi ayhan ina magdul-ong sa tuman nga anarkiya kag kasingki? Sing kaanggid, si Jehova napahulag sa paghikot batok sa mga Canaanhon bangod sang ila pagkaimoral kag sang pat-od nga katalagman nga dalhon nila sa putli nga pagsimba. Busa, nagsugo sia: “Ang duta mahigko, kag silutan ko ang iya kalautan.”​—Levitico 18:25.

Ginpadapat ang diosnon nga katarungan sang ang nagapanglaglag nga puwersa sang Dios​—ang Israelinhon nga mga hangaway​—naglaglag sang mga Canaanhon. Ang katunayan nga gingamit sang Dios ang mga tawo sa pagpatuman sini nga paghukom, sa baylo sang kalayo ukon baha, wala magpahaganhagan sa pamatbat. Busa, sang nakig-away batok sa pito ka pungsod sang Canaan, ang mga hangaway sang Israel ginsugo: “Walay ibilin nga buhi sang bisan anong ginhawa.”​—Deuteronomio 20:16.

Apang, subong tagsakdag sang kabuhi, wala ginpahanugutan sang Dios ang dimakatarunganon nga pagpamatay. Halimbawa, sang nakiluoy ang mga pumuluyo sang isa ka siudad sa Canaan, ang Gabaon, ginkaluy-an sila ni Jehova. (Josue 9:​3-27) Himuon ayhan ini sang isa ka mapintas nga dios sang inaway? Indi, apang himuon ini sang Dios nga nagahigugma sa paghidait kag katarungan.​—Salmo 33:​5; 37:28.

Ang mga Talaksan ni Jehova Nagasakdag sang Paghidait

Sa liwat kag liwat, ginaangot sang Biblia ang pagpakamaayo sang Dios sa paghidait. Amo sina bangod si Jehova mahigugmaon sang paghidait, indi sang inaway. (Numeros 6:​24-26; Salmo 29:​11; 147:​12-14) Sa amo, sang luyag ni Hari David magpatindog sing templo sang pagsimba kay Jehova, ang Dios nagsiling sa iya: “Nakapaagay ka sing bugana nga dugo kag nakahimo sing dalagku nga mga inaway, dili ka magpatindog sing balay sa akon ngalan.”​—1 Cronica 22:​8; Binuhatan 13:22.

Sang diri sia sa duta, ang Daku nga David, si Jesucristo, naghambal tuhoy sa isa ka tion nga ang gugma sang Dios sa katarungan magadumili sa iya nga tugutan ang kalautan nga aton makit-an sa karon nga mga adlaw. (Mateo 24:​3, 36-39) Subong sang iya ginhimo sa Anaw sang adlaw ni Noe kag sa pagkalaglag sang Sodoma kag Gomorra, ang Dios sa indi madugay magahimo sing hudisyal nga aksion agod dulaon sa duta ang mga makagod, malauton nga mga tawo, sa amo magahawan sang dalanon sa pagluntad sang mahidaiton nga mga kahimtangan sa idalom sang paggahom sang iya langitnon nga Ginharian.​—Salmo 37:​10, 11, 29; Daniel 2:44.

Sing maathag, si Jehova indi isa ka Dios sang inaway nga uhaw sa dugo. Sa pihak nga bahin, wala sia nagaisol sa paghatag sing hudisyal nga silot kon ginakinahanglan. Bangod sang gugma sang Dios sa kaayuhan nagapanghikot sia tungod sa mga nagahigugma sa iya paagi sa paglaglag sa malauton nga sistema nga nagapigos sa ila. Sa tion nga himuon niya ini, ang matuod nga paghidait magabugana sa bug-os nga duta samtang ang matuod nga mga mahagop nahiusa nga magasimba kay Jehova, “ang Dios sang paghidait.”​—Filipos 4:9.

[Picture Credit Line sa pahina 20]

Si David kag si Goliat/The Doré Bible Illustrations/Dover Publications, Inc.