Pag-atipan sa Tigulang na nga mga Ginikanan
“MASAKO ako kon adlaw, kag nagabugtaw man ako kon gab-i, apang ginbatyag ko gihapon nga pribilehiyo ko yadto.” Amo sina ang paglaragway sang isa ka babayi sa pag-atipan niya sa iya nagatigulang nga iloy. Para sa sini nga babayi, kag sa madamo pa, ang pag-atipan sa tigulang na nga mga ginikanan isa ka positibo nga eksperiensia.
Nangin kinaandan naman ini nga eksperiensia. Ang pinakamadasig magdamo nga grupo sang edad sa Estados Unidos amo kono ang lampas sa 75 anyos nga kategoriya. Sang 1900, wala pa sa isa ka milyon ka Amerikano ang 75 ukon kapin. Sang 1980 halos napulo ka milyon ang kapin sa 75. Mas malawig ang kabuhi sang mga tigulang, kag mga un-tersia sang mga 85 anyos na ukon mas tigulang pa ang nagakinahanglan sing regular nga bulig.
Samtang ang pag-atipan sa nagabalatian nga tawo mahimo nga isa ka makapaladya nga eksperiensia, may kahuol ini. Kon ang isa ukon duha sang imo mga ginikanan tigulang na kag nagakinahanglan sang imo pag-atipan, mahimo nga mabudlayan ikaw sa pila ka butang. Ang pagtan-aw lamang sa ila nga nagaluya ang lawas pat-od gid nga nagapasakit sa imo buot. Kag kon diutay lamang ukon wala gid ikaw sing bulig nga ginabaton sa iban nga mga katapo sang pamilya, nian ikaw ang matam-an sa pag-atipan.
Mahimo matukiban mo man nga bisan pa may edad na ikaw, wala gid ikaw nagatigulang para sa imo mga ginikanan. Ang ila huyog mahimo nga tratahon gihapon ikaw kaangay sang bata, kag ang imo huyog mahimo nga makig-angot sa ila nga daw bata gihapon. Ang kakulang sing emosyonal nga pagsakdag gikan sa mga abyan mahimo nga makadugang sing kahuol sa imo pag-atipan.
Walay sapayan, ang mga hangkat sang pag-atipan indi dapat mag-upang sa imo paghupot sing isa ka suod nga kaangtanan sa imo mga ginikanan. Ang Kasulatan maathag nga nagasugo sa mga adulto nga “magpakita sing diosnon nga debosyon sa ila kaugalingon nga panimalay kag magpadayon sa paghatag sing nagakaigo nga balos sa ila mga ginikanan kag mga lolo kag mga lola, kay ini kalahamut-an sa itululok sang Dios.” Sa pihak nga bahin, sia nga “nagalagas sa iya iloy isa ka anak nga nagapanghikot sing makahuluya kag makatalamay.”—1 Timoteo 5:4; Hulubaton 19:26.
Ang diosnon nga debosyon nga ginapabutyag paagi sa pag-atipan mahimo mangin isa ka makapauswag nga eksperiensia. Apang una anay, dapat mo hibaluon kon ano gid nga bulig ang ginakinahanglan sa imo sang imo mga ginikanan. Ang masunod nga mga artikulo mahimo nga makabulig sa imo sa pagkilala kag sa pagtuman sina nga mga kinahanglanon. Kag samtang ginabinagbinag sining mga artikulo ang sarang mahimo sa balay, halangpunon nga sa pila ka kaso, bangod sang mapigaw gid nga panglawason ukon katigulangon, ang isa ka ginikanan mahimo nga nagakinahanglan sing propesyonal nga bulig, subong sang makita sa isa ka nursing home.