Ano ang Bag-ong Dag-on nga Kahublagan?

INDI ini isa ka organisasyon, apang ginatos ka organisasyon ang nagasakdag sa mga panudlo sini. Wala ini sing sentral nga lider, apang mahimo nga linibo ang mga pilosopo kag mga manunudlo sini. Wala ini sing isa ka opisyal nga libro sang mga doktrina kag mga pagtuluuhan, apang sarang mapalambo sang mga sumalakdag sini ang ila kredo sa halos tanan nga librarya publiko sa bug-os nga kalibutan. Wala ini sing personal nga dios nga dapat simbahon, apang masami nga ginasakdag sini ang ideya nga may isa ka dios nga masapwan sa tanan nga duog.

Ano ini? Amo ini ang Bag-ong Dag-on nga kahublagan: isa ka hugak nga kombinasyon sang relihioso, kultural, sosyal, politikanhon, kag sientipiko nga mga ideolohiya, upod sa pagkawili sa mistisismo sang Sidlangan, indi mapaathag nga mga hitabo, okulto, kag sa pila pa gani ka sahi sang modernong sikolohiya. Ang kombinasyon nagalakip sang pagpati sa astrolohiya, reinkarnasyon, kabuhi sa guwa sang duta, ebolusyon, kag sa pihak nga kinabuhi. Importante man nga mga bahin sini ang kabalaka sa palibot kag sa panglawas.

Ang bisan sin-o makabuylog sa sining kahublagan. Wala sing rito sa pagsulod ukon bawtismo. Ukon kinahanglan nga biyaan sang mga tawo ang ila relihion. Sa pihak nga bahin, madamo ang nagapangakig nga kilalahon sila nga katapo sang “Bag-ong Dag-on” nga kahublagan bangod lamang nagapati sila sa pila ka mga ideya nga ginalakip sang Bag-ong Dag-on nga kahublagan ukon nagakalipay sa pila sang ginatawag nga arte ukon musika sang Bag-ong Dag-on.

Ang mga debotado talagsa lang nagapakilala sang ila kaugalingon nga katapo sila sang Bag-ong Dag-on nga kahublagan. Ang matuod, ang media ang masami nga nagagamit sa ekspresyon nga “Bag-ong Dag-on.” Sining karon lang, masami nga ginalikawan sang mga libro, mga balaligyaan, mga seminar, kag mga programa tuhoy sa Bag-ong Dag-on nga kahublagan ini nga termino. Ang Library Journal nagpaathag nga ang “sobra nga pagsambit sang media sang talipuspusan sang katuigan 80 nagtuga sing malain nga reaksion sa dugang pa nga Bag-ong Dag-on nga mga elemento, (ang pagkomunikar sa mga espiritu paagi sa UFO, ang mga kristal nga ginagamit sa pagbulong kag sa pagpamalandong, kbp.); ginapakita ini sang katunayan nga ang dalagku nga mga imprintahan . . . kag bisan gani ang Bag-ong Dag-on nga mga imprintahan malaka na lang nagagamit sing termino nga Bag-ong Dag-on.” Sa amo, mahimo nga lipod sa ila madamo nga tawo ang yara sa idalom sang impluwensia sang Bag-ong Dag-on nga panghunahuna.

Ano ang Bag-o sa Sini?

Ginakabig sang madamo ang Bag-ong Dag-on nga kahublagan subong isa ka moderno nga butang. Suno kay Propesor Carl Raschke sang University of Denver, ang Bag-ong Dag-on nga panghunahuna isa gid ka “banaag sang batok sa katilingban nga pagsinalayo sang Dekada 60.” Ginatudlo man sang iban nga mga analista ang dekada 60, sang ang mga hippie nangita sing kahilwayan kag kamatuoran, subong amo ang pamuno sang Bag-ong Dag-on nga kahublagan. Madamo sang anay mga hippie, nga karon kwarentahon kag singkwentahon na, ang nagapangita gihapon sa sinang maila nga kamatuoran. Apang ang ila pagpangita wala na ginasikway subong kapritso lamang sang mga tin-edyer. Madamo sa ila ang mga propesyonal sa kilala nga mga latagon sang ihibalo, aktibo sa politika, kag ginatamod karon subong makatarunganon nga mga katapo sang komunidad.

Sang mga dekada 70 kag 80, gingamit nila ang ila kinaalam kag manggad sa pagpadayon sang ila pagpangita. Ang mga resulta? Ang ila salakot nga mga pagtuluuhan lapnag nga ginbaton kag gintahod. Madasig ini nga ginpabantog sang media, nga nagresulta sa lapnag nga pagkahibalo sa Bag-ong Dag-on nga pilosopiya.

Ang matuod, diutay gid lang ang bag-o nahanungod sa Bag-ong Dag-on nga mga pagtuluuhan. Halimbawa, ang pilosopiya sini napasad ilabi na sa mistisismo sang Sidlangan, nga linibo ka tuig na ang kadugayon. Binagbinaga ang pila lamang sang Bag-ong Dag-on nga mga ideya.

Ang Bag-ong Dag-on nga Paglaum

Samtang nagahilapit ang tuig 2000, ang ideya tuhoy sa isa ka mas maayo nga palaabuton, mas maayo nga milenyo, nagapopular. Ang daku nga pagpati amo nga ang modernong katilingban nga nakilal-an naton pagabuslan sing isa ka Utopianhon nga katilingban.a Suno sa Bag-ong Dag-on nga mga manunudlo, mahimo ini kon ang kabug-usan sang ginakilala nga panghunahuna islan sing mistiko nga ihibalo nga natago ukon ginsikway sa madugay nga tion kag nadayag lamang sining karon nga mga tinuig. Nagasiling sila nga ining bag-ong dag-on sang paghiusa magapaguwa sang bug-os nga ikasarang sang tawo kag magapaluntad sing bug-os uniberso nga espirituwal nga paghidait.

Ining paglaum daw ginapasad ilabi na sa mga pakutpakot sang mga astrologo nga nagatudlo sang aton adlaw subong amo ang talakdangan sa ulot sang nagligad nga dag-on sang Pisces kag sang nagapakari nga dag-on sang Aquarius. Ang mga sumalakdag sini nga teoriya nagapangangkon nga ang tanda sang Pisces sa zodiac may negatibo nga epekto sa katawhan sa halos 2,000 ka tuig. Ginasumbong nila ang Cristiandad subong amo ang una nga salaon sa pagtuga sing isa ka materyalistiko kag balingag nga katilingban. Ginasumbong ang Cristiandad sing pag-upang sa pag-uswag sang kamatuoran. Apang karon ina nga kamatuoran sarang kono masapwan sa okulto kag ipaathag sa nagahilapit nga dag-on sang Aquarius, ang dag-on sang espirituwal nga kasanagan, ang bag-ong dag-on.

Ang mga katapo sang Bag-ong Dag-on nga kahublagan wala nagahisantuanay sa kon bala ining bag-ong katilingban paluntaron paagi sa mga puwersa sa guwa sang kalibutan ukon paagi sa panikasog sang tawo. Ang isa ka teoriya nagapangangkon nga ang “isa ka rasa sang nagbag-o nga mga Homo sapien sang Bag-ong Dag-on, gikan sa genetiko nga mga binhi nga gintanom sang nasanagan nga mga mangin-alamon sang nagligad nga 3,500 ka tuig, magadamo sa indi madugay kag magaluwas sa kalibutan gikan sa kakagod.”​—The Wall Street Journal, Enero 11, 1989.

Apang, ina nga paglaum tuhoy sa isa ka bulawanon nga dag-on, Utopia, ukon bag-ong kalibutan, indi bag-o. Ang leyenda sang halos tanan sang dalagku nga kultura nagalakip sing paglaum sa isa ka palaabuton nga Utopianhon nga katilingban. Ang Sumerianhon, Griego, Romano, kag Scandinavianhon nga mga mitolohiya naglakip sini nga pagpati. Ang Encyclopedia of Religion nagasiling: “Ang pagkalangkag sa utopia diin ang isa hilway sa kaimulon kag diin ang paghidait kag kabuganaan nagahari isa gid anay ka kinahanglanon nga bahin sang Intsik nga relihion antes pa sang panahon ni Ch‘in (antes sang 221 BCE).” Ang pinakadumaan nga sagrado nga tulun-an, ang Biblia, nagapamulong tuhoy sa isa ka milenyo nga sa sulod sang amo nga tion ang katawhan mangin himpit, kag ang inaway, krimen, kasakit, kag kamatayon pagadulaon.​—Bugna 21:​1-4.

Kaugalingon ang Relihion

Sa iya awtobiograpiko nga pelikula nga Out on a Limb, ang bantog nga artista kag awtor sang Bag-ong Dag-on nga kahublagan nga si Shirley MacLaine nagatindog sa mahangin nga baybayon nga nahumlad ang iya mga butkon kag nagatuaw: “Dios ako! Dios ako!” Kaangay niya, madamo nga katapo sang Bag-ong Dag-on nga kahublagan ang nagapangita sa mataas nga kaugalingon kag sa ideya nga ang dios yara sa sulod sang kaugalingon. Ginatudlo nila nga dapat lamang pauswagon sang mga tawo ang ila ihibalo agod makit-an ang ila pagkadios.

Kon mahimo na ini, siling nila, magaathag nga ang tanan sa uniberso may kaangtanan sa tanan nga butang​—ang tanan dios, kag ang dios tanan. Indi gid ini isa ka bag-ong ideya. Ang dumaan nga mga relihion sang Mesopotamia kag Egipto nagapati anay sa pagkadios sang mga sapat, tubig, hangin, kag langit. Sining ulihi lang, ginpalig-on kono ni Adolf Hitler ang iban nga batunon ang “mabaskog, maisog nga pagpati sa Dios sa Kinaugali, Dios sa aton kaugalingon nga katawhan, sa aton destinasyon, sa aton dugo.”

Ang Bag-ong Dag-on nga kultura may madamo sing literatura, mga seminar, kag mga programa sa paghanas agod paguwaon ang bug-os nga ikasarang sang kaugalingon kag pauswagon ang kaugalingon. “Ang paghangop sa akon nasulod nga kaugalingon ” amo ang popular nga halambalanon. Ginapalig-on ang katawhan nga tilawan ang bisan ano kag tanan nga butang nga makabulig sa ila sa pagpabutyag sang ila kaugalingon nga mga posibilidad. Subong sang ginsiling sang isa ka manunulat sa magasin nga Wilson Quarterly, ang “sentro nga panudlo sang kahublagan amo ‘nga indi importante kon ano ang imo ginapatihan basta epektibo lamang ini para sa imo.’ ”

Si Margot Adler, sumalakdag sang Bag-ong Dag-on nga kahublagan, nagapaathag nga ang kadam-an sang kababayin-an nga nagabuylog sa Bag-ong Dag-on nga mga kahublagan sang mga babayi nagahimo sini “bangod sang mga rason nga tuman ka personal. . . . Ginadumtan nila ang ila lawas, ginadumtan nila ang ila kaugalingon. Nagakari sila sa sini nga mga grupo nga nagasiling sa imo, ‘Ikaw ang Diosa, dalayawon ikaw.’ ”

Ginlaragway sang New York nga magasin ang pagpangita sang isa ka grupo sa mataas nga sahi sang kaugalingon: “Ang isa ka babayi nagapangadi, ‘Kita ang mga manunudlo sang Bag-ong Pamanagbanag. Kita ang importante.’ Ang iban nga mga umalambit, nga nagasuksok sing may sungay nga mga purongpurong, balahibuon nga mga maskara, kag manipis nga malaba nga mga panapton, nagasaotsaot sa kagulangan, nagapalangadion kag nagakumpasan, nagapanganduhoy kag nagaugayong.”

Gintinluan nga Okultismo

Ang iban sang Bag-ong Dag-on nga mga ideya nagasakdag sing isa ka bag-o, gintinluan nga pagtamod sa okulto. Ang Satanismo wala na ginaangot sa okulto sa hunahuna sang madamo nga katapo sang Bag-ong Dag-on. Ang isa ka manunulat sa magasin nga Free Inquiry nagsiling: “Nagadugang ang kadamuon sang mga nagabuhat sing pangaswang, wala sing bisan sin-o sa ila ang may pagpati nga nagalakip sa Satanismo.”

Ginpakita sang isa ka surbe kasan-o lang sa Alemanya nga may 10,000 ka aktibo nga manughiwit sa sina nga pungsod. Bisan ang kabataan malalangon nga nagakaganyat sa okulto. Ang Aleman nga libro nga Der Griff nach unseren Kindern (The Grasp for Our Children) nagapaathag nga paagi sa “drama nga casette sang kabataan, ang kabataan nagakaanad sa bag-o nga dagway sang manughiwit subong isa ka normal nga babayi nga nagagamit sing madyik para sa maayong mga katuyuan.” Ang libro nagdugang: “Sa amo, ang igtalupangod sang bisan diutay nga kabataan ginaganyat sa dalanon sang Bag-ong Dag-on nga makadul-ong sa ila sa labaw sa kinaugali.”

Sa iya mga libro, ginasakdag ni Shirley MacLaine ang ideya nga ang okulto isa lamang ka natago nga ihibalo kag nga ang pagkanatago sini wala nagakahulugan nga indi ini kamatuoran. Ining pilosopiya nagganyat sa dimaisip nga katawhan nga eksperimentuhan ang espiritistiko nga mga buhat, subong sang pagpamakot, astrolohiya, telepatiya, kag pagkomunikar sa mga espiritu. Ang naulihi nakilal-an na sa linibo ka tinuig nga spiritistic mediumship (pagpatunga sang espiritista). Apang ginatawag ini sang mga katapo sang Bag-ong Dag-on nga kahublagan nga channeling (pagpaagi sa alagyan). Ang ila teoriya nagapangangkon nga ang mga espiritu sang mga patay nagapili sa pila ka indibiduwal nga mangin ila mga alagyan sa pagkomunikar sa katawhan.

Ini kono nga mga tawo nga alagyan mahimo makapanganinaw kon luyag nila kag maghambal ukon magsulat sing mga mensahe sang “kasanagan,” nga naghalin kono sa mga patay nga mga tawo ukon sa mga persona sa guwa sang kalibutan. Ang mga espiritu sang mga patay ginakabig subong agalon nga mga mangin-alamon nga nagahulat sing husto nga tion sa pagsaylo sa iban nga lawas sang mga buhi. Samtang wala pa ina, ginatuytuyan nila kono ang katawhan padulong sa bag-ong dag-on.

Madamo nga katapo sang Bag-ong Dag-on nga kahublagan ang regular nga nagatipon agod mamati sa kon ano ang isiling sining mga agalon kono paagi sa ila mga alagyan. Kag mahimo makapili ang mga tumuluo kon sin-o nga mga espiritu ang konsultahon nila. Lakip kono sa mga nagapakighambal karon amo ang mga espiritu ni John Lennon kag ni Elvis Presley, mga persona sa guwa sang kalibutan nga ang mga ngalan amo sanday Attarro kag Rakorczy, kag ang 35,000-anyos nga hangaway gikan sa ginasugidsugid nga Atlantis nga si Ramtha.

Ang Bag-ong Dag-on kag ang Panglawas

Nagadugang nga kadamuon sang mga doktor ang nagapati nga ang mga pasyente indi dapat kabigon nga daw guba nga mga makina lamang kag dapat hatagan sing konsiderasyon ang mental kag emosyonal nga kapagros sang indibiduwal. Nakilal-an ini nga tikang subong holistic ukon wholistic nga pagpamulong, halin sa Ingles nga tinaga nga “whole,” kag indi buot silingon nga may kaangtanan sa Bag-ong Dag-on nga huyog. Apang, madamo nga katapo sang Bag-ong Dag-on nga kahublagan ang malangkagon nga nagbaton sa holistic nga pagpamulong. Ang libro nga The Cosmic Self nagapaathag nga bisan pa wala ginasikway ang medikal nga establisamento, ginasakdag sang mga katapo sang Bag-ong Dag-on nga kahublagan ang pagtratar sa pasyente subong isa ka bug-os nga persona, “isa ka buhi nga organismo nga may lawas, hunahuna, kag espiritu.”

Ang mga katapo sang Bag-ong Dag-on nga kahublagan nagasiling nga ang maayong panglawas sarang masapwan sa guwa sang kinaandan nga pagpamulong. “Ang duog diin una nga masumalang sang kalabanan nga tawo ang Bag-ong Dag-on nga mga ideya amo ang kalibutan sang tal-us nga pagpamulong,” siling sang Britaniko nga pamantalaan nga The Herald. Kag ginausisa ang labing tumalagsahon nga mga ideya. Halimbawa, ang Australiano nga manugbusbos sa mga sapat kag awtor nga si Ian Gawler nagsiling nga ang kanser mahimo mabulong sang pagpamalandong. Ang iban pa sang mga metodo nga bulong nga popular nga ginaangot sa Bag-ong Dag-on nga kahublagan nagalakip sa astrolohiko nga pag-usisa, pag-analisar sandig sa silak nga nagaguwa sa lawas, hypnotherapy, sikiko nga operasyon nga wala nagagamit sing kutsilyo, kag terapiya nga ginabalikan ang nagligad nga kabuhi agod hibaluon ang bug-os nga ikasarang sang isa ka tawo. Ini nga mga metodo sang pagbulong masami nga ginasakdag sa espesyal nga sahi sang mga magasin tuhoy sa panglawas, kinaugali nga mga remedyo, mga bitamina, ehersisyo, kag masustansia nga mga kalan-on.

Ang Bag-ong Dag-on kag ang mga Kristal

Ang isa ka popular nga metodo sang Bag-ong Dag-on nga pagpamulong nagadalahig sing paggamit sing mga kristal kag mga hiyas, subong sang quartz, amatista, topasio, rubi, opal, kag esmeralda. Ang Bag-ong Dag-on nga alahero nga si Uma Silbey nagsiling: “Sa bug-os nga maragtas makakita ikaw sing mga halimbawa sang mga kultura nga nagapati nga ang mga quartz makapadaku sang sikiko nga enerhiya kag sang mga gahom sa pagbulong.” Nagdugang sia: “Ang mga Sumerianhon, mga Maya kag ang iban pa nga mga sibilisasyon naggamit sing quartz nga mga kristal sa pagbulong.”

Paano ginagamit ang mga kristal? Ang mga terapista nga nagagamit sing kristal sa pagbulong nagasiling nga ang pisikal kag mental nga mga balatian sarang mabulong paagi sa pagduon sing quartz kag iban pa nga mga hiyas sa espesipiko nga mga bahin sang lawas. Si Katrina Raphaell, sumalakdag sang Bag-ong Dag-on nga kahublagan sa paggamit sing kristal, nagapaathag nga ang mga kristal “sarang mabutang sa idalom sang ulunan sa tion sang pagtulog agod magdamgo sing mataas kag matagnaon nga mga damgo. Sarang ini magamit sa pagpamulong agod palig-unon ang mahuyang nga mga emosyon, pakalmahon ang magamo nga mga panghunahuna kag buligan ang lawas sa pagpaayo sang pagkaditimbang sini. Sarang ini mauyatan sa tion nga ang babayi ginasakitan sa iya pagbata agod makatigayon sing dugang nga kusog.”

Ang Bag-ong Dag-on kag ang Palibot

Ang Bag-ong Dag-on nga kahublagan “matinlo, mainulikdon sa palibot, uso,” siling sang TSBeat, Britaniko nga magasin para sa mga tin-edyer. Ang aktibo nga pagpakigbahin sa pag-amlig sa ekolohiya kag palibot nakadugang sing isa ka positibo nga dagway para sa Bag-ong Dag-on nga kahublagan, kag ining mainabyanon sa palibot nga mensahe nagganyat sa madamo sa mga panudlo sini. Apang, ang kabalaka sang Bag-ong Dag-on nga kahublagan sa palibot masami nga ginapabutyag subong dayag nga pagsimba sa kinaugali, nga may mga rito nga kaanggid sa sinadto nga mga seremonya nga ginadedikar sa duta nga diosa.

Amo bala ining moderno nga ekspresyon sang dumaan nga mistisismo ang sabat sa aton mga problema? Maluwas ayhan ang planeta sang kaalam sang mga manughiwit kag sang mga persona kono sa guwa sang duta? Maabot ayhan ang isa ka bag-ong dag-on sang paghidait kag kabuganaan?

[Mga footnote]

[Kahon sa pahina 6]

Si MacLaine, ang Bag-ong Dag-on, kag si Ramtha

“ANG kasangkaron sang duog sang mga espiritu matuod gid bisan pa indi naton ini makita ukon matakus. Mas daku ang katunayan sangsa aton ‘nahangpan’ nga katunayan. Amo ini ang gintawag nga bag-ong dag-on nga panghunahuna. Isa ka bag-ong dag-on sang pagkahibalo. . . .

“Ginduaw ko ang ginakilala nga mga espiritista nga ginagamit sang manugtuytoy nga mga espiritu gikan sa kalibutan sang mga espiritu. Nakatigayon ako sing kaangtanan sa sining ‘mga espiritu.’ . . . Ang isa mas mahinangpanon sangsa tanan nga iban. Ang iya ngalan amo si . . . Ramtha ang Isa nga Nasanagan. . . . Nagsiling sia nga sang una nag-inkarnasyon sia sadtong tiempo Atlantis kag nakatigayon sing bug-os nga paghangop sadto nga pagkabuhi. . . . Samtang ginatulok ko ang mga mata ni Ramtha, nabatian ko ang akon kaugalingon nga nagasiling, ‘Utod ko bala ikaw sang mag-inkarnasyon ka sang tiempo Atlantis?’

“. . . Nagtulo ang mga luha gikan sa iya mga mata. ‘Huo, palangga,’ siling niya, ‘utod ko ikaw anay.’ ”

Si MacLaine nagpadayon sa pagsiling: “Ang punto sang iya espirituwal nga pagtudlo sa akon amo ang pagpaambit sing kamatuoran nga Dios kita. May ikasarang kita sa paghibalo kaangay niya.”​—Dancing in the Light, ni Shirley MacLaine.

Ipaanggid ang Genesis 3:​5, diin ang Man-ug (si Satanas) binutig nga nagsiling kay Eva: “Ang Dios nakahibalo nga sa adlaw gid nga magkaon kamo sa sini magamuklat ang inyo mga mata kag mangin kaangay kamo sang Dios, nga nakakilala sing maayo kag malaut.” Ang mga nagahandum nga kahamut-an sang Dios dapat maglikaw sa pagpakig-angot sa malaut kag malimbungon nga mga espiritu. Ang Kasuguan ni Moises nagsiling: “Dili kamo magliso sa mga espiritista, kag dili kamo magkadto sa propesyonal nga mga manugpakot, agod indi kamo madagtaan nila. Ako si Jehova nga inyo Dios.”​—Levitico 19:31.

[Kahon sa pahina 9]

“Isa Pa ka Droga sa Puno sing Droga nga Katilingban”?

“ANG Bag-ong Dag-on nga kahublagan​—pinakabag-o nga amot sa aton malawig nga maragtas sang makatilingala nga espirituwal nga mga uso kag mga bulong sa tanan nga balatian​—ginauligyat kag ginakaugtan. Indi lamang ang pagpakanubo sa pagkadios kundi ang hilmunon nga pagpangumersio sini ang nagapautwas sing suspetsa nga isa ini ka daku nga relihioso nga daya. . . .

“Ang Bag-ong Dag-on nga kahublagan nagatinguha sa pagtingob sang pagpamalandong, positibo nga paghunahuna, pagpamulong pasad sa pagtuo, . . . mistisismo, yoga, pagpamulong paagi sa tubig, acupuncture, incienso, astrolohiya, Jungianhon nga sikolohiya, biofeedback, extrasensory perception, espirituwalismo, . . . teoriya sang ebolusyon, Reichianhon nga terapiya paagi sa sekso, dumaan nga mga mitolohiya, . . . paglupay, kag madamo pa sang iban nga mga teknik nga gindesinyo sa pagpauswag sang ikasarang sa paghangop, lakip ang mga elemento nga ginhulam sa dalagku nga mga tradisyon sang relihion. . . .

“Ang Bag-ong Dag-on nga mga tal-us sa relihion nagapakalma sa konsiensia sa baylo nga tublagon ini. Ang sentral nga panudlo sini amo nga indi importante kon ano ang imo ginapatihan basta epektibo lamang ini sa imo. ‘Matuod ini kon ginapatihan mo ini’: eslogan sang Bag-ong Dag-on. . . .

“Ang pamangkot indi ang kon bala ang Bag-ong Dag-on nga mga terapiya epektibo gid kundi ang kon bala ang relihion dapat himuon nga terapiya na lang. Kon wala ini sing ginahatag kundi ang pagbatyag sing espirituwal nga kapagsik lamang, ang relihion mangin isa pa ka droga sa isa ka puno sing droga nga katilingban.”​—“The New Age Movement: No Effort, No Truth, No Solutions, Notes on Gnosticism​—Part V,” ni Christopher Lasch, Watson Professor of History sa University of Rochester, New York, E.U.A.

[Retrato sa Pahina 7]

Ang Bag-ong Dag-on nga mga kulto nagaeksperimento sa astrolohiya, telepatiya, pagpamalandong, kag mga kristal, lakip sa iban nga mga butang

[Retrato sa Pahina 8]

Ang mga metodo sang Bag-ong Dag-on nga pagpamulong nagalakip sing paggamit sing mga kristal