Paano Magaabot ang Matuod nga Bag-ong Dag-on?
ANG awtor sang bag-ong dag-on nga kahublagan nga si Shirley MacLaine nagpabutyag sing kinaandan nga sentimiento sang magsulat sia: “Nasapwan ko ang akon kaugalingon nga nagapamensar sing daku nahanungod sa sayop nga butang sa kalibutan. Indi mo ini malikawan kon makita mo gid ang kaimulon, ang pagkagutom, ang dumtanay. Nagsugod ako sa pagbiyahe sang disinuebe anyos ako, kag karon, sa edad nga mga 45 anyos, masiling ko nga ang mga butang amat-amat nga naglain.”
Sing kaanggid, ang mga tawo bisan diin natak-an na sa relihioso nga pagkasalimpapaw kag kabutigan. Napaslawan sila bangod sang pagpatumbaya kag pagkadisangkol sang mga gobierno. Nagakabalaka sila sa namutikan nga indi mainulikdon nga mga panimuot kag sa mga sayop sang medikal nga establisamento. Kag madamo ang ginabiktima sang aligutgot sa rasa ukon sekso.
Isa ka Realistiko nga Solusyon?
Indi ini maduhaduhaan, kinahanglan gid naton ang isa ka bag-ong kalibutan. Apang realistiko bala ang mga paglaum sang Bag-ong Dag-on nga kahublagan? Ukon kaanggid lamang bala sa science fiction nga mga pelikula sang Hollywood ang mga paglaragway sini sa palaabuton? Daw maalamon bala ang magpahamtang sing pagtuo sa mga tagna nga ginpasad sa nalipatan na nga mga tradisyon, dumaan nga mga mito, kag mga ispekulasyon?
Matuod, madamo sang mga ideya nga ginbaton sang Bag-ong Dag-on nga kahublagan ang mahimo magapauswag sang mental kag pisikal nga ikaayo sa isa ka limitado nga paagi. Ang maayong kalan-on, ehersisyo, pagpahunayhunay, kag ang kabalaka sa palibot makatarunganon tanan nga mga bahin sang kabuhi. Ang mga doktor mahimo nga nakatigayon kuntani sing mas daku nga kadalag-an kon ginhatagan nila sing kapin nga igtalupangod ang emosyonal nga mga kinahanglanon sang mga nagabalatian samtang ginaatipan ang ila pisikal nga mga balatian. Apang ang tanan nagamasakit sa ulihi, kag bisan ang pinakamapagros mapatay sa ulihi. Indi naton maagom ang kabuhi sing bug-os bangod sang balatian kag kamatayon nga nagaabot sa aton. Nagahatag bala ang mga sumalakdag sang Bag-ong Dag-on nga kahublagan sing makatarunganon nga solusyon sa sini nga mga problema?
Kapin kag kapin nga mga tawo ang ginasubuan kag ginapung-awan, kag diutay gid lamang ang mahimo sa sini sang Bag-ong Dag-on nga kahublagan. Ang International Herald Tribune sang London nagsiling: “Kon ang ika-20 nga siglo nagpasulod sing Dag-on sang Kabalaka, ang pagguwa sini nagasaksi sa pagpamanagbanag sang Dag-on sang Kapung-aw.” Ang pamantalaan nagdugang nga ang “una nga internasyonal nga pagtuon sa daku nga kapung-aw nagapahayag sing isa ka dalayon nga pagdugang sang kagamo sa bug-os nga kalibutan.”
Ang Bag-ong Dag-on nga kahublagan, upod ang daw relihioso nga kinaiya sini, wala gid nagabusog sa espirituwal nga pagkawalay unod sa modernong katilingban. Bisan sa pinakamaayo nga mga kahimtangan ang ginakilala nga espirituwal nga kaumpawan nga ginatanyag sini umalagi lamang. Ang ginakilala nga relihion, ilabi na ang Cristiandad, wala makapaumpaw sa kabilugan nga pagkagutom sa espirituwal. Dayag nga ginpakamalaut sang isa ka pamantalaan ang “kapaslawan sang Iglesia sa pagbulig sa mga nagabatyag nga napain sila, wala ginaatipan, wala ginahigugma.” Ginlaragway sang pamantalaan ang modernong relihion subong walay interes, “ginakawatan ang indibiduwal sing ikasarang nga masumalang ang Dios sing direkta.”
Ang Biblia—Isa ka Tulun-an sang mga Sabat
Ginsimbugan kag ginpakadiutay sang Cristiandad ang mga kamatuoran sang Biblia. Subong man, madamo nga doktrina sang Bag-ong Dag-on nga kahublagan ang batok man sa mga panudlo sang Biblia. Binagbinaga, halimbawa, ang Bag-ong Dag-on nga ideya nga ang mga tawo makadala sing solusyon sa mga problema sang duta. Maathag nga nagasiling ang Biblia sa Jeremias 10:23: “Ang dalanon sang tawo wala sa iya kaugalingon. Wala sa tawo nga nagalakat ang pagmando sa iya mga tikang.” Ang isa pa ka kasulatan nagasiling: “Ang kaluwasan iya ni Jehova.”—Salmo 3:8.
Ang Biblia wala nagatudlo nga ang mga tawo may dimamalatyon nga kalag nga nagakabuhi subong isa ka independiente nga persona, napain sa lawas. Suno sa Kasulatan, ang kalag nagakapatay, kag ang kamatayon amo ang katapusan sang tanan nga panghunahuna kag pagpanghikot. (Numeros 23:10; 35:11; Manugwali 9:5, 10) Maathag nga ginasikway sini ang ideya sang Bag-ong Dag-on nga kahublagan tuhoy sa reinkarnasyon.
Dugang pa, imposible nga makakomunikar sa mga patay. Suno sa Biblia, ang ginasiling nga pagkomunikar sa mga patay amo sa kamatuoran ang pagkomunikar sa mga demonyo—espiritu nga mga kaaway sang Dios kag sang katawhan. Busa, ginhimo sang Kasuguan sang Dios ang pagbuhat sing espiritismo, lakip ang tanan nga porma sang pagpamakot, astrolohiya, kag pagkaespiritista, nga isa ka sala nga sililutan sing kamatayon.—Levitico 19:31; 20:6, 27; Deuteronomio 18:10-12.
Ang Biblia amo ang tuburan sang matuod nga espirituwal nga pagpaayo. Ang mga panudlo sini nagabulig sa mga Cristiano nga mahangpan ang ila nasulod nga kaugalingon kag bag-uhon ang ila personalidad. (Roma 12:2; 2 Corinto 13:5; Efeso 4:21-24) Nagatudlo ini sing disiplina sa kaugalingon, maligdong nga panghunahuna, pagtahod sa kaugalingon kag sa iban.
Ang Biblia nagabulig sa aton nga makakomunikar sa pinakamataas nga gahom sa uniberso, ang aton Manunuga. (Binuhatan 17:24-28) Ginapakita sini nga paagi sa pagtuo sa halad nga gawad sang iya anak, mahimo matigayon sang katawhan ang kabuhi nga walay katapusan sa paraiso nga duta. (Roma 6:23) Nagahatag ini sing makaalayaw nga sabat sa mga pamangkot subong sang: Ngaa gintugutan sang Dios ang madamo nga pag-antos? Sin-o ang gamhanan nga mga persona sa dikitaon nga duog? Sila bala ang may salabton sa madamo sang ginatawag nga dikinaugali nga mga hitabo?
Para sa palaabuton, nagasaad ang Biblia sing himpit nga panglawas kag walay katapusan nga kabuhi kag isa ka bag-ong kalibutan nga may paghidait kag paghiusa, kag matinlo nga palibot, diri mismo sa duta. (Isaias 33:24; 2 Pedro 3:13) Sa sinang bag-ong kalibutan, ang mga tawo walay duhaduha nga magapauswag sang ila ihibalo kag, sa idalom sang pagtuytoy sang Dios, magatukib sing madamo nga tanhaga nahanungod sa lawas sang tawo, sa aton planeta, kag sa nabilin nga bahin sang uniberso. Ini tanan pagahimuon paagi sa gahom ni Jehova, isa ka Dios nga nagahigugma sa katawhan.
Mangin Didto Ka Ayhan?
Apang, ginatudlo man sang Biblia nga ining mga pagpakamaayo bukas lamang sa mga nagakabuhi nahisuno sa kasuguan sang Dios. Ining kasuguan indi mapiguson. Apang dapat ini tumanon. (Hulubaton 4:18, 19; 1 Juan 5:3) Indi posible nga magsunod sa dimakasulatanhon nga panghunahuna sang Bag-ong Dag-on nga kahublagan kag sa amo man nga tion magpati sa Biblia.—1 Corinto 3:18-20; 10:18-22; Santiago 4:4.
Busa, ang matuod nga mga Cristiano nagalikaw nga masiod sa dimakasulatanhon nga panghunahuna sang Bag-ong Dag-on nga kahublagan. Kinahanglan ang maayong desisyon kag pagkamakatarunganon. Dapat tandaan nga ang “Bag-ong Dag-on” nga ngalan ginagamit na sing lapnag para sa mga butang nga wala maghalin sa Bag-ong Dag-on nga kahublagan kag sa mga butang nga mahimo wala nagakahulugan nga dimakasulatanhon. Matuod ini ilabi na sa mga latagon sang maayong panglawas, kalan-on, arte, kag musika. Busa dapat magpakita ang mga Cristiano sing pagkamahinantupon kag intelihente nga pagkabalanse samtang ginapat-od nga magpalayo sila sa bisan ano nga ginapakamalaut sa Biblia. Sing nagakaigo, ang Hulubaton 14:15 maalamon nga nagalaygay: “Ang bisan sin-o nga walay eksperiensia nagapati sa tagsa ka pulong, apang ang maalamon nagabinagbinag sang iya mga tikang.”
Huo, ang Biblia amo ang yabi sa matuod nga kasanagan. Ang kabilugan nga pagsikway sang mga katapo sang Bag-ong Dag-on nga kahublagan sa Kasulatan makadala lamang sing dugang pa nga kadulom sa kalibutan. Apang ang Biblia nagahatag sing espirituwal nga kapawa kag paglaum sa isa ka bag-ong kalibutan subong ginsaad sang Dios: “ ‘Yari karon! Ang kayangkayang sang Dios upod sa mga tawo, kag magapuyo sia kaupod nila kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Kay ang nahaunang mga butang nagtaliwan.’ Kag ang Isa nga nagalingkod sa trono nagsiling: ‘Yari karon! Ginahimo ko nga bag-o ang tanan nga butang.’ Subong man, sia nagasiling: ‘Isulat, kay ining mga pulong matutom kag matuod.’ ”—Bugna 21:3-5.