Ano ang Yara sa mga Bituon Para sa Imo?
SANG KORESPONSAL SANG MAGMATA! SA BRAZIL
“NABATIAN mo bala nga suno sa mga bituon, sa masunod nga Hulyo magabunggo kita sa Mars?” Ini nga mga pulong sang masadya nga ambahanon ni Cole Porter nagapabutyag gid sang kinaandan kag dumaan nga pagpati nga ang palaabuton sang tawo sa pila ka paagi may kaangtanan sa mga bituon.a Apang may kaangtanan gid bala ang langitnon nga mga butang kag ang kabuhi sang katawhan sa sini nga duta? Kon matuod, paano naapektuhan ang katawhan? Kon indi matuod, ano gid nga katuyuan ang ginatuman sang mga bituon?
Indi makapakibot nga madamo gid nga mga tawo ang interesado sa palaabuton kon binagbinagon naton ang pila sang dramatiko nga mga nagkalatabo sining karon lang—ang pagkalusod sang Pader sang Berlin kag ang madasig nga pagkabungkag sang anay Unyon Sobyet, ang kakulang sing pagsalig sa politikanhon nga mga lider, ang dumot sa minoridad nga kaliwatan nga nagalutaw sa Aprika kag Europa, ang relihioso nga kaawayon sa India kag sa Ireland, ang madasig nga implasyon nga nagapaantos sa madamo gid nga mga pungsod, kag ang pagrebelde sang mga pamatan-on. Suno sa isa ka report gikan sa University of Hamburg, ang 1992 amo ang labing makiawayon nga tuig sugod sang matapos ang Inaway Kalibutanon II, kay 52 ka nagagamit sing mga armas nga mga inaway ang natabo sa nanuhaytuhay nga mga pungsod. Natural lamang nga mamangkot ang mahigugmaon sa paghidait nga katawhan: ‘Sa diin kita makapaabot sing kalig-unan, paghidait, kag seguridad?’
Ang pagkawalay kalig-unan sang palaabuton nagdul-ong sa pagdagsa sang nanuhaytuhay nga mga porma sang pagpamakot. Ang astrolohiya mahimo nga amo ang pinakapopular. Tuhay sa siensia sang astronomiya, ang astrolohiya isa ka “pagpamakot tuhoy sa ginapatihan nga mga impluwensia sang mga bituon kag mga planeta sa mga hilikuton sang tawo kag sa mga hitabo sa duta suno sa mga posisyon kag mga bahin sang mga bituon kag mga planeta.” Sa karon, minilyon ka tawo ang indi makapugong sa pagbasa sang ila horoscope agod makakuha sing mga ideya nahanungod sa ila palaabuton.b
Ang iban nga mga bahin diin nagapangangkon ang mga astrologo nga pakton ang palaabuton nagalakip sa mga resulta sang mga problema sa pag-asawahay kag mga problema sa panglawas, pagbangon kag pagkalusod sang politikanhon nga mga lider, ang pinakamaayo nga petsa sa pagbukas sing bag-o nga negosyo, kag ang mga numero nga gamiton agod magdaug sa loterya.
Ang isa ka balita sang Reuters nagreport nga ang astrologo nga si Joan Quigley regular nga ginakonsulta ni Nancy Reagan sa kon san-o ang iya bana, presidente sadto sang Estados Unidos, dapat maghatag sang iya mga pamulongpulong kag kon san-o dapat maglupad kag maghugpa ang iya eroplano. Ginpahayag sang New Catholic Encyclopedia nga “gingamit ni Papa Julius II [1503-13] ang astrolohiya sa pagtalana sang adlaw sang iya koronasyon kag ni Paulo III [1534-49] sa pagpat-od sang nagakaigo nga oras para sa tagsa ka pagtinipon sang mga kardinal.” Si Alfred Hug, direktor sang isa ka Swiso nga kompanya nga nagagamit sing astrolohiya sa paglaygay sa mga kapitalista sa stock market, nagagarantiya sing ekselente nga mga resulta. “Nasulat na ini sa mga bituon,” palig-on niya.
Sing hayag, madamo ang nagapati nga ang mga bituon may impluwensia gid sa mga kabuhi sang mga tawo. Paano nagsugod ang astrolohiya? May masiling bala ang Biblia, ang dumaan nga libro, nahanungod sa astrolohiya kag mga astrologo?
[Mga footnote]
a “Sa dumaan nga China, . . . ang mga tanda sa langit subong man ang kinaugali nga mga kalamidad ginapatihan anay nga nagapabanaag sang maayo kag dimaayo nga mga binuhatan sang Emperador kag sang iya panguluhan.”—The International Encyclopedia of Astronomy.
b Ang horoscope isa ka “tsart sang relatibo nga mga posisyon sang mga planeta kag mga tanda sang zodiac sa isa ka espesipiko nga tion (subong sang pagkabun-ag sang isa ka tawo)” kag ginagamit sang mga astrologo sa pagtinguha nga pakton ang palaabuton nga mga hitabo sa kabuhi sang isa ka tawo.