Ang Matuod nga Kahulugan sang 1914

SUBONG ginapakita sa pahina 4, “ini nga magasin nagapalig-on sing pagsalig sa saad sang Manunuga tuhoy sa isa ka malinong kag may kalig-unan nga bag-ong kalibutan sa wala pa magtaliwan ang kaliwatan nga nakasaksi sang mga hitabo sang 1914.”

Wala sing duhaduha nga madamo sang amon mga bumalasa ang nakibot sa sina nga pinamulong. Apang, bisan sadto pa sang Disiembre 1879​—mga 35 ka tuig antes sang 1914​—ang The Watchtower (kilala sadto nga Zion’s Watch Tower and Herald of Christ’s Presence) naghatag sing pamatuod gikan sa Biblia nga ang 1914 mangin isa ka may kahulugan nga tuig. Bisan antes sini​—sang tungatunga sang ika-19 nga siglo—​ginpahangop sang iban nga mga estudyante sang Biblia nga ang 1914 mahimo nga isa ka tuig nga gintandaan sa tagna sang Biblia.a

Ang tagna ginlaragway subong isa ka maragtas nga ginsulat sing abanse. Ini nga bahin sang Biblia nagapamatuod nga naghalin ini sa Dios. Dugang sa pagsugid sa aton sang palaabuton nga mga hitabo, kon kaisa ginasugid sa aton sang Biblia ang kalawigon sang tion nga magalipas antes mahanabo ang isa ka butang. Ang iban sining espesipiko nga mga tagna nagapatuhoy sa pila ka mga adlaw, ang iban sa mga tinuig, kag ang iban pa gid sa mga siglo.

Si Daniel, nga nagtagna nahanungod sa tion sang una nga pag-abot sang Mesias, nagpahayag man kon san-o mabalik ang Mesias para sa iya “presensia” sa ginatawag nga “tion sang katapusan.” (Daniel 8:​17, 19; 9:​24-27) Ini nga tagna sang Biblia nagakobre sing malawig nga panahon, indi lamang pila ka gatos ka tuig, kundi kapin sa duha ka milenyo​—2,520 ka tuig! Sa Lucas 21:​24, ginatawag ni Jesus ining panahon nga “gintalana nga panag-on sang mga pungsod.”b

Ginsugdan sang 1914 ang Isa ka Tion sang Kasisit-an

Ginapakita sang katumanan sang tagna sang Biblia nga nagakabuhi kita sa tion sang katapusan sugod sang 1914. Ginlaragway ni Jesus ining tion subong ‘pamuno sang mga kasakit.’ (Mateo 24:8) Sa Bugna 12:12 aton mabasa: “Kailo sa duta kag sa dagat, kay ang Yawa nagapanaug sa inyo, nga may dakung kaakig, bangod nga nakahibalo sia nga malip-ot na lamang ang iya tion.” Amo sini kon ngaa ang kalibutan yara sa mas daku nga kagamo sugod sang 1914.

Apang, ining tion sang katapusan, mangin malip-ot lamang nga panahon​—nga magakobre sa isa ka kaliwatan. (Lucas 21:​31, 32) Ang kamatuoran nga kita karon 80 ka tuig na halin sang 1914 nagapakita nga sa indi madugay mapaabot naton ang pagluwas sang Ginharian sang Dios. Nagakahulugan ini nga makita naton si Jesucristo nga amo “ang isa nga pinakakubos sa katawhan” nga magagahom sing bug-os sa “ginharian sang katawhan” kag magapaluntad sing isa ka malinong, kag matarong nga bag-ong kalibutan.​—Daniel 4:17.

[Mga footnote]

[Kahon sa pahina 11]

Mga Komento Tuhoy sa 1914 kag Pagkatapos

“Mahimo nga, pagkatapos sang daw indi malikawan nga pagkatabo sang duha ka inaway kalibutanon, ang paghimo sa nuklear nga mga hinganiban isa ka paandam, nga nagluwas sa aton gikan sa ikatlo nga pag-inaway sang dalagku nga mga pungsod kag nagdala sing pinakamalawig nga panahon sang kabilugan nga paghidait, apang isa ka paghidait nga may kakugmat, sugod sang paggahom ni Reyna Victoria. . . . Ano ang malain nga natabo sa katawhan? Ngaa wala matuman ang panaad sang ika-disinuebe nga siglo? Ngaa ang ika-beinte nga siglo nangin isa ka dag-on sang kakugmat ukon, suno sa iban, kalaut?”​—A History of the Modern World​—From 1917 to the 1980s, ni Paul Johnson.

“Sa tanan sang daku nga mga pagbag-o sa sistema sang Europa, ang Dakung Inaway kag ang paghusay para sa paghidait amo ang hinali nga nagtunga gikan sa nagligad, sa ekonomiya, sa sosyal kag sa politika man. . . . Ang makalilipay nga himaya sadtong nagapanghikot sing hilway kag mapatubason nga sistema nadula sa inaway. Sa baylo, gin-atubang sang Europa ang pagkahubas sang ekonomiya kag ang bug-os nga pagkabungkag sang establisado nga sistema sang ekonomiya. . . . Tuman gid ka daku ang kapierdihan amo kon ngaa ang ekonomiya sang Europa wala na makabawi gikan sa nagkunol kag mahuyang nga kahimtangan antes magdabdab ang masunod nga inaway kalibutanon.”​—The World in the Crucible 1914-1919, nanday Bernadotte E. Schmitt kag Harold C. Vedeler.

“Sa Ikaduha nga Inaway Kalibutanon ang tagsa ka higot sa ulot sang tawo kag sang tawo nautod. Gintugutan sang mga Aleman sa idalom sang paggahom ni Hitler ang ila kaugalingon nga maghimo sing mga krimen nga walay tupong sa kasangkaron kag pagkamalauton nga nagmusing sa maragtas sang katawhan. Ang sistematiko nga pagpamatay sa anom ukon pito ka milyon ka lalaki, babayi, kag kabataan sa palatyan nga mga kampo sang mga Aleman labaw ka makakulugmat sangsa indi sistematiko nga pagpamatay ni Genghis Khan, kag wala sa kamalingkingan kon ipaanggid ang pagpamatay ni Genghis Khan. Ang hungod nga pagpapas sa bug-os nga mga populasyon ginplano kag ginhimo sang Alemanya kag Rusya sa inaway sa Sidlangan. . . . Nakaguwa kita sang ulihi gikan sa isa ka esena sang materyal nga kapierdihan kag kahapayan sa moral nga indi mahanduraw sang katawhan sang nagligad nga mga siglo.”​—The Gathering Storm, Tomo I sang The Second World War, ni Winston S. Churchill.

“Ginakilala na karon ang tawhanon nga mga kinamatarong sang katawhan sang tanan nga klase, pungsod, kag rasa; apang sa amo man nga tion naglugdang kita sa ayhan wala pa mabatii nga kadadalman sang pag-ilinaway sang mga klase, nasyonalismo, kag rasyalismo. Ining malain nga mga balatyagon nakasapo sing palautwasan sa wala kaluoy, ginplano sing sientipiko nga mga kapintas; kag ang duha ka indi maghisantuanay nga kahimtangan sang hunahuna kag sang talaksan sang paggawi sarang makita karon, nga nagaupdanay, indi lamang sa isa ka kalibutan, kundi kon kaisa sa isa ka pungsod kag sa sulod pa gani sang isa ka tawo.”​—Civilization on Trial, ni Arnold Toynbee.

“Kaangay sang isa ka murto nga nagdugay pa sangsa gintalana nga oras para sa sini, ang ika-disinuebe nga siglo​—upod ang kinahanglanon nga kahim-ong sini, ang kompiansa sa kaugalingon sini, kag ang pagsalig sini sa pag-uswag sang tawo​—nagpadugaydugay pa tubtob sang Agosto 1914, sang magumon ang panghunahuna sang dalagku nga mga kagamhanan sa Europa nga nagdul-ong sa indi makatarunganon nga pagpamatay sa minilyon sang pinakaali nga mga pamatan-on nga lalaki sang isa ka kaliwatan. Apat ka tuig kag tunga sang ulihi, samtang ang kalibutan nagatinguha sa pagpasag-uli pagkatapos sang makapasubo nga kalaglagan sang Dakung Inaway, nangin maathag sa madamo (apang sa pagkamatuod indi sa tanan) nga mga manugpanilag sadto nga ang katapusan nga bilin sang nagligad nga kahimusan nadula, kag nga ang katawhan nagsulod sa isa ka bag-ong dag-on nga kubos ka makatarunganon kag kubos ka mapinatawaron sa mga dikahimpitan sang tawo. Ang nagpaabot sing paghidait sa isa ka mas maayo nga kalibutan napaslawan sa ila paglaum sang 1919.”​—Introduksion sa 1919​—The Year Our World Began ni William K. Klingaman.

[Retrato sa Pahina 10]

Bavarian Alps