Mahalungon Ka Bala nga Tsuper?

ANG imo panimuot samtang nagauyat sing manibela sang kotse makaimpluwensia sing daku sang imo ikasarang sa pagmaneho. Ang ginhimo nga pagtuon sang British Automobile Association nagpakita nga kada tuig 22 porsiento sang kalalakin-an sa Britanya nga nagaedad sing 17 tubtob 20 anyos ang nagakadalahig sa isa ka aksidente sa dalan.

Ano ang pangunang mga kabangdanan sang ila dimahalungon nga pagmaneho? Magluwas sa alkohol, pagkaalabuton, kag matunog nga musika, ang deputy director-general sang Automobile Association, nga si Kenneth Faircloth, nagsiling: “Madamo ang naimpluwensiahan sang ila katubotubo sa pagmaneho sing makatalagam.” Subong resulta, nagapanugyan ang Automobile Association nga ang paghanas labi nga isentro sa panimuot sang tsuper sangsa pamaagi kag metodo sang pagmaneho.

Halimbawa, pamangkuta ang imo kaugalingon: ‘Gusto ko lang bala magpadayawdayaw sa akon mga pasahero sa kotse paagi sa hinarasharas nga pagmaneho? Ang akon bala panimuot nagapakilala sang akon batasan sa pagmaneho? Ginatamod ko bala ang iban nga mga tsuper subong mga samong lamang sa dalan nga dapat unahan?’ Ang imo mga sabat sa sinang mga pamangkot nagapakilala kon ano ka nga sahi sang tsuper.

Bisan lalaki man ukon babayi, bata man ukon tigulang, magpakita sing pag-ulikid samtang nagamaneho. “Tratuha ninyo ang iban nga mga tawo suno sa luyag ninyo nga itrato nila sa inyo.” (Mateo 7:​12, Phillips) Ang paghimo sini makabulig sa imo sa pagmaneho sing mahalungon.