May Yara Bala Kamo Pritilarya sa Inyo Hardin?

KON may yara, malingaw gid kamo sa katahom sini. Ano ang pritilarya? Isa ini sang linibo ka nanuhaytuhay nga sahi sang mga alibangbang nga nagapatahom sa aton kalibutan kag isa sang kapin sa 750 ka espesyi nga makit-an sa Estados Unidos kag sa Canada. Ang isa nga ginapakita diri, ang great spangle (nagaidlak-idlak), ginretratuhan sa isa ka hardin sa madabong nga kaumhan sang estado sang Virginia. Ang great spangle may duag-pilak nga idlak-idlak sa idalom sang iya pangulihi nga pakpak. Hungod nga gintamnan sang isa ka hardinero ang isa ka diutay nga hardin sing ilahas nga mga bulak nga nagatubo sing mataas kag ginaamag sang mga alibangbang​—may dalag nga mga rudbeckia kag daw duag-rosas nga mga phlox.

Kon luyag ninyo nga amagon sang mga alibangbang ang inyo hardin, tilawi nga magtanom sing ilahas nga mga bulak sa inyo hardin. Ayhan mabakal kamo sing isa ka putos nga liso sang ilahas nga bulak nga may nanuhaytuhay nga mga duag subong sa paleta sang pintor agod mapaamag mo ining matahom nga mga tinuga. Kon nagapuyo kamo sa nagakaigo nga rehiyon sang kalibutan, ang tanom nga buddleia magadapit sa mga alibangbang subong sang bato-balani. Nian magkuha kamo dayon sing kamera kag mga teleskopyo, kag maglingawlingaw!