Ang Paha nga Nagaluwas sing Kabuhi

“ANG paggamit sing pangamlig nga paha (safety belt) amo ang isa sang pinakaepektibo nga paagi sang pagbuhin sa kadamuon kag kalubha sang mga kasamaran sa mga aksidente sa salakyan,” siling sang Morbidity and Mortality Weekly Report (MMWR). Suno sa isa ka pagtuon, ang risgo nga mapatay sa aksidente sa kotse naganubo sing 43 porsiento kon ginagamit sing nagakaigo sang mga pasahero ang pangamlig nga mga paha. Ang risgo sang malubha nga kasamaran naganubo sing mga 50 porsiento.

Ang kasuguan sa paggamit sing pangamlig nga paha, una nga ginlansar sang gobierno sang Australia sang 1970. Karon mga 35 ka pungsod ang nagapatuman sing paggamit sang pangamlig nga paha. Ang mga nagalapas masami nga ginamultahan kag sa iban nga kaso ginasuspende ang ila mga pribilehiyo sa pagmaneho. Naglansar sing kasuguan ang pila ka panguluhan nga nagapatuman sa mga pasahero sa bisan diin nga pulungkuan (sa atubangan kag sa likod) sa pagsuksok sing pangamlig nga mga paha.

Ang MMWR nagareport nga “ginabulubanta nga mga 300,000 ka tawo ang nagakapatay kag 10-15 milyones ka tawo ang nasamaran kada tuig sa mga aksidente sa trapiko sa bug-os nga kalibutan.” Mahimo nga ining kadamuon nagnubo sing daku kon yadtong tanan nga tawo nagagamit sing pangamlig nga mga paha.