Sa Tion sang Kalamidad

ANG ika-20 nga siglo gintandaan sing dalagku nga mga kalamidad, kag ang kalabanan sini mga himo-tawo. Apang ang iban indi. Nagatagna sang aton mga adlaw, si Jesus nagsiling: “Ang pungsod magatindog batok sa pungsod kag ang ginharian batok sa ginharian, kag may kakulang sing kalan-on kag mga linog sa nagkalainlain nga mga duog.” (Mateo 24:7) Matuod, ang tawo amo ang balasulon sa mga inaway kag kakulang sing kalan-on, apang indi sa mga linog. Sa kaanggid nga paagi, samtang ang pila ka makahalapay nga mga baha gintuga sang mga buhat sang tawo, indi sia mabasol sa mga paglinog. Indi man mabasol ang tawo bangod sang mga bagyo ukon sang mga paglupok sang bulkan.

Ano man ang gintunaan sini, ginapakita sang kinaugali nga mga kalamidad ang pagkadiutay sang tawo, ang iya diikasarang sa atubang sang makahalawhaw kinaugali nga mga puwersa. Ining duta, nga aton puluy-an, malig-on kag mabakod. Apang kon mag-uyog ini bangod sang linog, makapanan bangod sang pagbaha sang tubig, ukon hapayon sang mabaskog nga hangin nga nagawaswas sing padayon subong kabaskog sang isa ka paglupok, inang malig-on nga balatyagon nagakadula.

Ang kinaugali nga mga kalamidad nagtuga sing daku nga kahalitan kag kadulaan sa kabuhi sang ika-20 nga siglo. Sarang bala ini malikawan? May mahimo bala agod mabuhinan ang makahalapay nga mga epekto? Subong mga indibiduwal, ano ang aton mahimo agod amligan ang aton kaugalingon? Wala gid bala kita sing mahimo sa tion sang mga kalamidad? Pirme na lang bala mabiktima ang katawhan sa sining paagi? Binagbinagon sang masunod nga mga artikulo ining mga pamangkot.