Ang Duta—Regalo sang Dios sa Aton

“SA GINSUGURAN gintuga sang Dios ang mga langit kag ang duta.” Nagsiling man sia nga ang duta “tama gid kaayo.” (Genesis 1:​1, 31) Wala sing mga tangkas sang basura nga magpalaw-ay sini; wala sing mga basurahan nga maghigko sini. Isa ka matahom nga regalo ang ginhatag sa katawhan: “Ang mga langit, mga langit ni Jehova, apang ang duta nahatag niya sa mga anak sang mga tawo.”​—Salmo 115:16.

Sa Isaias 45:​18, ginasugid niya kon ano ang iya katuyuan para sa duta: “Amo ini ang ginasiling ni Jehova, ang Manunuga sang mga langit, Sia nga matuod nga Dios, ang Taghuman sang duta kag Magbubuhat sini, Sia ang Isa nga nagpalig-on sini, nga wala magtuga sini sa walay pulos, nga naghuman sini agod puy-an: ‘Ako si Jehova, kag wala na gid sing iban.’ ”

Ginapakita niya sing espesipiko kon ano ang salabton sang tawo sa duta​—‘pangumahon ini kag atipanon ini.’​—Genesis 2:15.

Nagahatag si Jehova sing huwaran. Ginaatipan niya ang duta. Ang isa ka paagi amo ang pag-recycle sa importante nga mga aman sang duta, ang mga butang nga sa amo nasandig ang tanan nga kabuhi sa duta. Ang isa ka pinasahi nga guwa sang Scientific American nag-unod sing mga artikulo tuhoy sa pila sining mga siklo, nga naglakip sang siklo sang enerhiya sang duta, siklo sang enerhiya sang biosphere, siklo sang tubig, siklo sang oksineho, siklo sang carbon, siklo sang nitroheno, kag mga siklo sang mineral.

Ang Duta​—Makatilingala kag Matahom

Ang bantog nga biologo nga si Lewis Thomas, sa magasin tuhoy sa siensia nga Discover, nagsulat sining bug-os nga pagdayaw sa duta:

“Ang makatilingala gid, ang pinakatumalagsahon nga butang nga nahibaluan naton tubtob sa karon sa bug-os nga uniberso, ang pinakadaku sa tanan nga kalatingalahan sa uniberso nga nagapagumon sa mga sientipiko, nga nagapaslaw sang tanan naton nga panikasog sa paghangop sini, amo ang duta. Nagasugod pa lang kita karon sa paghangop kon daw ano ini ka makatilingala kag katahom, kon paano ini nagapahawathawat sang aton ginhawa, ang pinakamatahom nga butang nga nagalibutlibot sa adlaw, nga naputos sa iya kaugalingon asul nga atmospera, nagapatubas kag nagaginhawa sang iya kaugalingon nga oksiheno, nagakuha sang iya kaugalingon nga nitroheno gikan sa hangin padulong sa iya kaugalingon nga duta, nagapatubas sang iya kaugalingon nga klima sa kadaygan sang iya kagulangan, nagatukod sang iya kaugalingon nga tabon gikan sa buhi nga mga bahin: apog nga mga pil-as, kapagangan, mga fossil gikan sa nauna nga mga porma sang kabuhi nga natabunan na karon sang mga anib sang bag-o nga kabuhi nga nagasibuay sa bilog nga globo.”

Pila lamang ini sang mga aman nga ginsangkap ni Jehova agod huptan ang duta nga nagapanghikot subong isa ka matahom nga regalo para sa katawhan, isa ka puluy-an nga gintuga agod magpadayon tubtob sa walay katubtuban para sa katawhan kag sa minilyon sang iban pa buhi nga mga tinuga. Ang Salmo 104:5 nagasiling: “Ginpasad niya ang duta sa malig-on nga mga duog sini; indi ini mationg tubtob sa tion nga walay latid, ukon walay katubtuban.” Ang isa pa ka inspirado nga saksi nagtestigo sa sini man nga pagkapermanente sang duta: “Ang isa ka kaliwatan nagataliwan, kag ang isa pa ka kaliwatan nagaabot; apang ang duta nagapabilin tubtob sa tion nga walay latid.”​—Manugwali 1:4.

Ang mga astronot nga naglibot sa duta nangin talunsay sa sining matahom, halalungan nga planeta nga nagalibot sa orbito sini sa palibot sang adlaw kag nagpabutyag sing kinahanglanon nga apresyahon sang katawhan ang katahom sini kag atipanon ini. Ang astronot nga si Edgar Mitchell, sang una niya makita ang duta gikan sa kahawaan, nagradyo sa Houston: “Daw subong ini sang nagainggat nga asul kag puti nga hiyas . . . nga napunihan sing belo nga puti nga nagahapayhapay sing mahinay . . . , subong sang isa ka diutay nga perlas sa isa ka madamol itom nga dagat sang katanhagaan.” Ang komento sang astronot nga si Frank Borman amo naman sini: “May yara kita isa ka matahom nga planeta. . . . Ang daku gid nga katingalahan amo nga kon ngaa indi naton maapresyar ang yara sa aton.” Ang isa sang mga astronot sang Apollo 8 nga nagkadto sa bulan nagkomento: “Sa bug-os nga uniberso, bisan diin man kami magtulok, ang may duag lamang amo ang duta. Nakita namon didto ang asul nga duag sang kadagatan, ang mapulapula kag kakikakihon nga duag sang duta, kag ang puti nga duag sang mga panganod. . . . Amo ini ang pinakamatahom nga butang nga makita, sa bug-os nga kalangitan. Ang mga tawo diri sa ubos wala gid makarealisar kon ano ang yara sa ila.”

Ginapamatud-an sang mga katunayan nga matuod ini nga ginhambal​—wala marealisar sang katawhan kon ano nga bahandi ang yara sa ila. Sa baylo nga atipanon ining regalo halin sa Dios, ginadagtaan kag ginalaglag ini sang katawhan. Nakita man ini sang mga astronot. Si Paul Weitz, kumander sang una nga paglakbay sang salakyan sa kahawaan nga Challenger, nagsiling nga ang halit nga nahimo sang tawo sa atmospera sang duta “makakulugmat” kon tan-awon gikan sa kahawaan. “Sing makapasubo, ining kalibutan mangin isa ka abuabuhon nga planeta sa indi madugay.” Nagdugang pa sia: “Ano ang mensahe para sa aton? Ginahigkuan naton ang aton kaugalingon nga pugad.” Kag ining pagkamalaglagon ilabi na nga nagdugang sing makatalagam sa sining “katapusan nga mga adlaw.” Nabungat na ni Jehova ang iya paghukom batok sa mga nagalaglag sang duta, nga amo, nga “laglagon [niya] ang mga nagalaglag sang duta.”​—Bugna 11:18.

Isa ka Walay Kabalaslan nga Katilingban nga Ditakus sa Regalo sang Dios

Ginsikway sang isa ka materyalistiko nga katilingban ang espirituwal nga mga talaksan agod pasundan ang unod. Ang praktikal nga mga panuytoy nga ginhatag ni Jehova sa katawhan para sa malipayon kag kontento nga pagkabuhi ginpahigad sang makagod nga me-ismo nga nagalaragway sang aton tion.

Sibu nga ginalaragway sang 2 Timoteo 3:​1-5 ang makatalagam nga panahon nga aton ginakabuhian: “Hibalua ini, nga sa katapusan nga mga adlaw magaabot ang makahalanguyos nga mga tion nga mabudlay pakigbagayan. Kay ang mga tawo mangin mahigugmaon sang kaugalingon, mahigugmaon sang kuwarta, bugalon, palabilabihon, mapasipalahon, malalison sa mga ginikanan, dimapinasalamaton, dibalaan, wala sing kinaugali nga gugma, indi tampad sa bisan anong kasugtanan, mapatupatuon, wala sing pagpugong sang kaugalingon, mabangis, wala sing gugma sa kaayuhan, maluib, dasudaso, nagahabok sa pagpadayaw, mahigugmaon sa kinasadya sa baylo sang sa Dios, nga may dagway sang diosnon nga debosyon apang nagapanghiwala sang gahom sini; kag likawi ang subong nga mga tawo.”

Ginagatungan sang komersialismo ang interes sang bumalakal sa pagbakal, kag ang pasayod amo ang kasangkapan sini. Ang tuman nga pasayod nagakaigo; ang tuman indi nagakaigo. Ang naulihi nagasibu sa ginsiling ni Eric Clark sa The Want Makers: “Wala lamang ang pagpasayod nagabulig sa pagbaligya sing sayop nga mga butang sa mga tawo nga indi makasarang sini, masami nga ginahimo sini ini sa mga presyo nga indi nagakaigo ang kataason.” Si Alan Durning sang World Watch nagsiling: “Ang mga manugpasayod wala nagabaligya sing mga butang kundi sing mga estilo sang pagkabuhi, mga panimuot, kag mga pantasya, ginaangot ang ila mga baligya sa walay katapusan nga paghandum sang kalag.” Ginatuyo sang pasayod nga indi kita mangin kontento sa kon ano ang yara sa aton kag handumon ang wala naton ginakinahanglan. Nagatuga ini sing walay kaayawan nga handum; nagadul-ong ini sa makapaluya nga pagkonsumo sing sobra; ginapaluntad sini ang nagadamo nga basurahan nga nagadagta sang duta. Ang malalangon nga paghaylo sini nagadaya bisan gani sa lapyo na nga tagipusuon sang mga nagakabuhi sa walay paglaum nga kaimulon. Madamo nga mga manugpasayod ang masupog nga nagabaligya sing mga butang nga kilala nga nagapatay ukon nagapabalatian sa mga tawo.

Ang importante amo ang aton panindugan sa Dios, subong sang ginasiling sang Manugwali 12:13: “Ang konklusion sang butang, sa tapos mabatian ang tanan, amo: Kahadluki ang matuod nga Dios kag tumana ang iya mga sugo. Kay amo ini ang bug-os nga obligasyon sang tawo.” Ang mga nagahimo sini kalipikado para sa kabuhi sa matinlo nga Paraiso ni Jehova! Si Jesus nagsaad: “Dili kamo matingala sini, kay ang takna magaabot nga ang tanan nga yara sa mga lulubngan magapamati sang iya tingog kag magaguwa, ang mga nakahimo sing maayo sa pagkabanhaw nga sa kabuhi, ang mga nakahimo sing malaut, sa pagkabanhaw nga sa paghukom.”​—Juan 5:​28, 29.

Kon San-o Apresyahon ang Regalo sang Dios

Kag daw ano ka dimapatihan sa katahom mangin amo ang duta! Ginhatagan kita ni Jehova sining makahalawathawat nga laragway sini: “Nakita ko [Juan] ang bag-ong langit kag ang bag-ong duta; kay ang nahaunang langit kag ang nahaunang duta nagtaliwan, kag wala na ang dagat. Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—Bugna 21:​1, 4.

Wala naman ang nahaunang mga butang subong sang mga basurahan, makahililo nga mga basura, kag ang mga nagahaboy sang ila basura sa iban. Nian ang lamang nga mga tawo nga buhi sa duta mangin amo sila nga nagahigugma sa ila mga isigkatawo subong sang ila kaugalingon, nga nagadayaw kay Jehova bangod sang iya regalo nga duta, kag nagakalipay sa pag-atipan sini kag sa paghupot sini sa paraiso nga kahimtangan.​—Mateo 22:​37, 38; 2 Pedro 3:13.

[Kahon sa pahina 11]

Ang Pagkawalay Pulos sang Materyalismo

Nagpamulong si Jesus sing talangkod nga kamatuoran sang nagpaandam sia: “Hupti nga nagamuklat ang inyo mga mata kag magbantay batok sa tanan nga sahi sang pagkamahamkunon, kay bisan pa bugana ang isa ka tawo ang iya kabuhi wala nagaresulta gikan sa mga butang nga iya ginapanag-iyahan.” (Lucas 12:15) Indi ang ginapanag-iyahan naton ang importante; kundi ang kon ano kita. Mahapos kita mabuyo sa ginakawilihan sa kabuhi—​pagpangita sing kuwarta, pagpanipon sing mga butang, paghimakas agod matilawan ang tanan nga kalalipayan nga ginahingamo sang unod​—kag sa paghunahuna nga nagakabuhi kita sing bug-os, wala sing nawasi, samtang mahimo nga ginawasi naton ang labing maayo nga butang nga ginatanyag sang kabuhi.

Kon nagataliwan na ang kabuhi amo pa lang kag marealisar naton kon ano ang nadula naton. Marealisar naton ang kamatuoran sang ginasiling sang Biblia: Ang kabuhi tuman kalip-ot​—isa ka usbong nga nagataliwan, isa ka buga sang aso, isa ka alisngaw, isa ka landong nga nagalabay, berde nga hilamon nga nagakalaya, isa ka bulak nga nagakalayong. Sa diin ini nagakadto? Ano ang aton nahimo? Ngaa yari kita diri? Amo lamang bala sini ang kabuhi? Kadayawan lamang sang mga kadayawan, isa ka paglagas sa hangin?​—Job 14:2; Salmo 102:​3, 11; 103:​15, 16; 144:4; Isaias 40:7; Santiago 4:14.

Ang isa ka tawo sa ospital, nagatagumatayon, nagagawa sa bintana, nagatan-aw sa higad sang pukatod nga ginasilakan sang mainit nga adlaw, sa mga hilamon, sa pila ka diutay nga mga bulak, sa isa ka maya nga nagapangaykay sing pila ka binhi sa duta​—indi salapakon nga danyag. Apang para sa nagatagumatayon nga tawo, matahom ini. Ang masubo nga paghandum nagatandog sa iya, sa paghunahuna sang simple nga mga kalipay nga nawasi niya, ang diutay nga mga butang nga nagakahulugan sing daku gid. Ang tanan madula sa madali!

Ang Griegong Kasulatan sang Biblia nagapabutyag sini sing maathag: “Wala kita sing nadala sa kalibutan, kag wala gid kita sing makuha pa guwa sa kalibutan. Gani, kon kita may kalan-on kag panapton, mangin kontento kita sa sini.” (1 Timoteo 6:​7, 8) Mas prangka nga ginapabutyag ini sang Hebreong Kasulatan: “Subong sang iya pagguwa sa tiyan sang iya iloy, magataliwan sia nga hublas, subong sang iya pag-abot; kag wala sing madala tungod sang iya pagpangabudlay, nga madala niya sa iya kamot.”​—Manugwali 5:15.

[Picture Credit Line sa pahina 8]

Retrato sang NASA