Sa Katapusan—Isa ka Panguluhan nga Magadula sing Krimen

ANG Biblia nagatagna nga sa aton mga adlaw ang mga tawo mangin “mga mahigugmaon sang kaugalingon, mga mahigugmaon sang kuwarta, mga bugalon, mga palabilabihon, mga mapasipalahon, mga malalison sa mga ginikanan, mga dimapinasalamaton, mga dimatutom, mga wala sing kinaugali nga gugma, mga indi tampad sa bisan anong kasugtanan, mga mapatupatuon, mga wala sing pagpugong sa kaugalingon, mga mabangis, mga wala sing gugma sa kaayuhan.” (2 Timoteo 3:2, 3) Ina nga sahi sang mga tawo ang nagahimo sing mga krimen.

Sanglit ang mga tawo amo ang nagahimo sing mga krimen, kon magbag-o sila, ang krimen nagabuhin. Apang indi mahapos para sa mga tawo ang magbag-o. Mas mabudlay ini himuon karon sangsa nagligad, kay kutob sang 1914, ang petsa nga gintalana sang kronolohiya sang Biblia, nagakabuhi kita sa “katapusan nga mga adlaw” sining sistema sang mga butang. Subong sang gintagna sang Biblia, ini nga tion ginatandaan sing “makahalanguyos nga mga tion nga mabudlay pakigbagayan.” Ining makahalanguyos nga tion ginpahanabo ni Satanas nga Yawa, ang pinakadaku nga kriminal, nga may “dakung kaakig, nakahibalo nga may malip-ot na lamang sia nga tion.”—2 Timoteo 3:1; Bugna 12:12.

Amo sina ang kabangdanan sing pagdamo sing krimen karon. Nahibaluan ni Satanas nga sia kag ang iya sistema pagalaglagon sa indi madugay. Sa sulod sang nabilin nga malip-ot nga tion, ginahimo niya ang tanan nga paagi agod patubuon sa mga tawo ang malain nga mga kinaiya nga ginsambit sa 2 Timoteo kapitulo 3. Busa, agod madula sang isa ka panguluhan ang krimen, dapat dulaon sini ang impluwensia ni Satanas kag buligan man ang mga tawo sa pagbag-o agod indi na sila magagawi sa paagi nga ginalaragway sa ibabaw. Apang may panguluhan bala nga makahimo sining labaw sa ikasarang sang tawo nga hilikuton?

Wala sing tawhanon nga panguluhan ang makasarang sa paghimo sini. Si J. Vasko­vich, isa ka manunudlo sang kasuguan sa Uk­raine, nagapanugda sing kinahanglanon para sa “isa ka pangkabilugan sangkol nga hubon, nga magahiusa kag magahituhog sa mga panikasog sang tanan nga estado kag publikong mga organisasyon.” Kag si Presidente Fidel Ramos sang Pilipinas nagsiling sa bug-os kalibutan nga komperensia sang krimen: “Bangod ginpagamay sang modernisasyon ang aton kalibutan, ang krimen nakalab-ot sa madamo nga pungsod kag nangin isa ka internasyonal nga problema. Bangod sini, ang mga solusyon dapat man mangin internasyonal.”

“Isa ka Bug-os Kalibutan nga Trahedya”

Ang Nasyones Unidas isa ka internasyonal nga hubon. Kutob sang pagkatukod sini, gintinguhaan sini nga tapnaon ang krimen. Apang wala ini sing mga solusyon subong sangsa pungsudnon nga mga panguluhan. Ang libro nga The Unit­ed Na­tions and ­Crime Pre­ven­tion nagasiling: “Ang lokal nga krimen indi makontrol sang kalabanan indibiduwal nga mga pungsod kag ang internasyonal nga krimen indi na malab-ot sang internasyonal nga komunidad. . . . Ang krimen sang organisado kriminal nga mga grupo naglapnag sa makahaladlok nga kasangkaron, nga may serioso nga mga resulta sa pisikal nga kasingki, pagpamahog kag kagarukan sang publiko nga mga opisyal. Ang terorismo nagpatay sing linibo ka inosente nga mga biktima. Ang makahalalit nga pagbaligya sing makapagiyan nga mga droga nangin isa ka bug-os kalibutan nga trahedya.”

Si James Madison, ang ikaapat nga presidente sang Estados Unidos, nagsiling anay: “Sa pagtukod sing isa ka panguluhan nga pagapamunuan sang tawo, ang daku nga kabudlayan nahamtang sa sini: dapat mo anay tinguhaan nga makontrol sang panguluhan ang katawhan; kag masunod piliton ini nga kontrolon ang iya kaugalingon.” (Ipaanggid ang Manugwali 8:⁠9.) Busa ang maayo nga solusyon amo ang pag-ilis sa mga panguluhan nga “ginadumalahan sang mga tawo” sang isa ka sistema nga ginadumalahan sang Dios. Apang realistiko bala ina nga solusyon?

Ang Panguluhan nga Magadula sang Krimen

Ang matuod nga mga Cristiano nagapati sa ginasiling sang Biblia tuhoy sa Ginharian sang Dios.a Isa ini ka matuod nga panguluhan. Walay sapayan nga ang Ginharian indi makita bangod yari ini sa langit, ang mga nahimuan sini sa duta kitaon. (Mateo 6:9, 10) Ginahuman ini ni Cristo Jesus kag sang 144,000 ka tawo nga ginkuha “gikan sa tanan nga tribo kag hambal kag katawhan kag pungsod . . . sa paggahom subong mga hari sa ibabaw sang duta.” Ining gamhanan nga panguluhan magagahom sa ibabaw sang “dakung kadam-an” nga mga sinakpan nga, subong sang ginatagna sang Biblia, naghalin man sa “tanan nga pungsod kag tribo kag katawhan kag hambal.” (Bugna 5:9, 10; 7:9) Busa, lunsay ang mga manuggahom kag ang mga sinakpan may internasyonal nga ginhalinan, isa gid ka nahiusa nga katawhan gikan sa tanan nga pungsod, nga ginakahamut-an sang Dios.

Ginabaton ang paggahom sang Dios, nalandas sing daku sang mga Saksi ni Jehova ang problema nga krimen sa tunga nila. Paano? Paagi sa pag-apresyar sa kaalam sang mga prinsipio sang Biblia, paagi sa pag-aplikar sini sa ila kabuhi, kag paagi sa pagtugot sa ila kaugalingon nga mapahulag sang pinakamabaskog nga puwersa sa bug-os nga uniberso, ang espiritu sang Dios, kag ang bunga sini—ang gugma. Ang Pulong sang Dios nagasiling: “Panapti ninyo ang inyo kaugalingon sang gugma, kay amo ini ang himpit nga higot sang paghiusa.” (Colosas 3:14) Sa kapin sa 230 ka kadutaan, ginabuhat sang mga Saksi ni Jehova ining gugma kag paghiusa, ginapasundayag kon paano nga ang Ginharian sang Dios nagsugod na sa pagdula sa krimen.

Malaragway ini paagi sa mga resulta sang isa ka surbe sang 1994 diin 145,958 ka Saksi ni Jehova sa Alemanya ang nakigbahin. Madamo sa ila ang nagbaton nga kinahanglan nila landason ang serioso nga kasaypanan agod mangin mga Saksi. Napahulag sila sa paghimo sini paagi sa ila pagtuon sang Biblia. Halimbawa, 30,060 ang nakalandas sa pagkagiyan sa tabako ukon sa droga; 1,437 ang nag-untat sa pagsugal; 4,362 ang nagbiya sa masingki ukon kriminal nga ugali; 11,149 ang naglandas sa mga kinaiya subong sang kahisa ukon kaugot; kag 12,820 ang nakapasag-uli sing kalinong sa puluy-an sa magamo nga pamilya.

Walay sapayan nga ining mga tukib nagdalahig sa mga Saksi ni Jehova sa isa lamang ka pungsod, tipiko ini sa mga Saksi sa bug-os nga kalibutan. Binagbinaga, halimbawa, ang isa ka pamatan-on sa Uk­raine nga si Yu­ri. Sang tion nga nagtuon sia sang Biblia upod sa mga Saksi ni Jehova, isa sia anay ka switik. Nagabiyahe pa gani sia padulong sa Moscow diin nahibaluan niya nga mahapos sia “makapangswitik” sa madamo nga tawo.

Sang 1993, didto liwat si Yuri sa Mos­cow, sa tunga sang kadam-an sang mga tawo. Apang wala sang isa sa kapin sa 23,000 ka tawo didto sa Lo­co­mo­tive nga Istadyum sang Biernes, Hulyo 23, ang nahadlok sa iya, kay isa na sia karon sang mga Saksi ni Jehova. Sa pagkamatuod, si Yuri didto sa entablado nga nakigbahin sa isa ka programa nga ginpasundayag sa internasyonal nga tumalambong. Sa iya pagbag-o, ginsunod niya ang sugo sang Biblia: “Ang makawat indi na magapangawat pa.”​—⁠Efeso 4:28.

Madamong iban pa kaangay ni Yuri ang nagbiya sing kriminal nga kabuhi agod makalipikar para sa kabuhi sa bag-ong kalibutan sang pagkamatarong sang Dios. Ginapadaku sini ang kamatuoran sang ginsiling ni ­Sir Pe­ter Im­bert, anay opisyal sang pulis sa Britanya: “Ang krimen sarang makontrol sa gilayon kon ang tanan handa sa pagpanikasog.” Ang edukasyunal nga programa sang Biblia nga ginatanyag sang panguluhan sang Dios nagapahulag sa bunayag sing tagipusuon nga mga tawo “sa pagpanikasog.”

Isa ka Kalibutan nga Wala sing Krimen

Ang bisan anong sahi sang krimen nagapakita sing kakulang sing gugma sa iban. Ginasunod sang mga Cristiano ang halimbawa ni Jesus, nga nagsiling: “Higugmaa si Jehova nga imo Dios sa bug-os mong tagipusuon kag sa bug-os mong kalag kag sa bug-os mong hunahuna.” Kag, “Higugmaa ang imo isigkatawo kaangay sang imo kaugalingon.”—Mateo 22:37-39.

Ang lamang nga panguluhan nga nadedikar sa pagdula sang krimen paagi sa pagtudlo sa mga tawo nga sundon ining duha ka kasuguan amo ang Ginharian sang Dios. Sa karon, kapin sa lima ka milyon ka Saksi ni Jehova ang nagabenepisyo gikan sa sining panudlo. Determinado sila nga indi pagtugutan ang kriminal nga mga huyog nga magtubo sa ila mga tagipusuon, nga nakahanda sa paghimo sing bisan anong personal nga panikasog sa pag-amot sa isa ka kalibutan nga wala sing krimen. Ang nahimo sang Dios sa ila kabuhi isa lamang ka pagpatilaw sang kon ano ang iya himuon sa iya bag-ong kalibutan sa idalom sang pagginahom sang iya langitnon nga panguluhan. Handurawa ang isa ka kalibutan nga wala nagakinahanglan sing mga pulis, hukom, abogado, ukon mga prisuhan!

Ang pagtigayon sini sa bug-os kalibutan nga kasangkaron magadalahig sing pinakadaku nga kinagubot sa panguluhan sa maragtas, nga pahanabuon mismo sang Dios. Ang Daniel 2:44 nagasiling: “Sa mga adlaw sadtong mga hari [nagaluntad sa karon] ang Dios sang langit magapatindog sang [langitnon] nga ginharian nga indi malaglag. Kag ang ginharian indi pag-itugyan sa iban nga mga tawo. Pagadugmukon sini kag pagadulaon ining tanan nga ginharian, kag ini magatindog sa walay katubtuban.” Dugmukon sang Dios si Satanas, dulaon ang iya malauton nga impluwensia.—Roma 16:20.

Sa tion nga ang mga panguluhan sang tawo mabuslan na sang langitnon nga Ginharian sang Dios, indi na liwat magagahom ang mga tawo sa ibabaw sang isa. Ang langitnon nga mga hari—mga hari nga mas mataas pa sa mga anghel—magatudlo sa katawhan sa mga dalanon sing pagkamatarong. Nian, wala na sing pagpamatay, pagpamomba sing makahililo nga gas, ukon sing pagpamomba sang mga terorista! Wala na sing sosyal nga mga inhustisya nga nagapatubas sing krimen! Wala na sing tuman ka manggaranon kag tuman ka puraot!

Si Propesor S. A. Aluko, sang Unibersidad sang Oba­fe­mi Awo­lo­wo sa Ni­ge­ria, nagsiling: “Ang mga imol indi makatulog kon gab-i bangod ginagutom sila; ang mga manggaranon indi makatulog bangod nagabugtaw ang mga imol.” Apang sa indi madugay ang tanan magatulog sing mahamuok sa paghibalo nga ang panguluhan—panguluhan sang Dios—nagdula na sa krimen!

[Footnote]

[Laragway sa pahina 10]

Ang isa anay ka kawatan kag ang iya biktima, karon nahiusa subong Cristianong mag-utod