Isa ka Pangabay Halin sa Tagipusuon

ANG Mayo 8, 1996 nga Awake!, may serye sang mga artikulo tuhoy sa tema sang pag-adoptar. Nakibot kami nga may kalipay sang nabaton namon ang reaksion sang mga bumalasa gikan sa bug-os nga kalibutan. Ang masunod nga sulat makatalandog gid.

“Napahulag ako nga ipahibalo nga madamo sa amon nga nagpaadoptar sang amon kabataan ang luyag gid nga mahuptan sila. Isa ako anay ka diminyo nga tin-edyer, nga nagaeskwela pa. Sang mahibaluan sang akon mga ginikanan nga nagabusong ako, ginhambalan nila ako nga dapat ko unahon ang kaayuhan sang bata sangsa akon kaayuhan kag ipaadoptar ini. Ginhambalan nila ako nga ‘nagakinahanglan ang bata sing iloy kag amay,’ nga indi ko mahatag. Indi luyag sang akon mga ginikanan nga huptan ko ang bata​—⁠indi nila ako pagpaistaron sa balay kon may bata ako. Ano ang mahimo ko? Nagsiling sila: ‘Kaugtan mo ang imo bata bangod ginkuha niya ang imo kahilwayan.’

“Sang hilmunon na ang akon pagbusong, ginpauntat ako sa pag-eskwela kag ginpaistar sa isa ka paryente sa malayo. Sang paghalin ko sa balay, nahibaluan ko nga indi ako makapauli tubtob nga magbata ako kag ipaadoptar ang bata.

“Ginpadala ako sa balay-alaypan para sa diminyo nga mga iloy. Sang ginpamangkot ako sang social worker kon bala sigurado ako sa akon desisyon nga ipaadoptar ang bata, nahibal-an ko nga wala niya marealisar nga wala na ako sing mahimo. LUYAG KO HUPTAN ANG AKON ANAK! Ginakahidlawan ko pirme ang makita sia nga nagakadlaw kag malipayon. Dapat mahibaluan sang inyo mga bumalasa nga madamo sang mga iloy ang nagabatyag subong sang ginbatyag ko.

“Wala ako ginpapili sing nagakaigo. Gani ginhimo ko ang ginsiling sa akon nga ‘sa kaayuhan’ sang bata. Kag kutob sadto nagakabuhi ako nga may kasakit. Nabalaka ako basi hunahunaon sang akon anak nga lalaki nga wala gid ako sing pag-ulikid sa iya kag nga indi ko sia palangga.

“Karon, subong isa ka Cristiano, ginaapresyar ko pirme ang mga laygay sang Biblia tuhoy sa mas mabudlay nga kahimtangan nga ginatuga naton sa aton kaugalingon bangod sang indi pag-aplikar sang Pulong sang Dios sa aton kabuhi. Ginapakita sini ang masakit kag nagadugay nga mga epekto sang kalibutanon nga pagpangatarungan. Apang dapat mahibaluan sang gin-adoptar nga mga tawo nga bangod lang ginpaadoptar sila, wala ini nagakahulugan nga indi sila palangga. Palihug pahibalua sila!”