Pagbantay sa Kalibutan

Ginapanugda sang mga Unitarian ang Pag-asawahay sang mga Homoseksuwal

Ang Unitarian nga Simbahan amo ang una nga denominasyon sa Estados Unidos nga opisyal nga nagsakdag sa pag-asawahay sang magkapareho nga sekso, report sang Christian Century. Ang mga delegado nga nagtambong sa tuigan nga kombension sining relihioso nga grupo nagbotar nga “iproklamar ang kabilihanan sang pag-asawahay sang bisan sin-ong duha ka tawo nga may relasyon.” Ang amo man relihiosong magasin nagasiling nga “sa idalom sang mga pagsulundan sang simbahan, ang tagsa sa 1,040 ka kongregasyon sang simbahan makapamat-od kon bala sakdagon sini ang pag-asawahay sang agi kag tomboy kag kon bala pagadumalahan nila ini nga sahi sang mga kasal.”

Paghibalo sa Sekso sang Lapsag

Suno sa magasin nga Popular Science, “posible na karon mahibaluan ang sekso sang lapsag paagi sa pag-usisa sa similya sang amay, kay ang tipo sang similya amo ang nagadesisyon sa sekso sang lapsag.” Una, ang similya ginasimbugan sing matin-aw nga lugom. Nian, ginagamit ang isa ka laser beam agod hibaluon ang X (babayi) nga similya gikan sa Y (lalaki) nga similya. Ginapakita sang kompyuter ang kinatuhayan, kag ang isa ka galamiton sa laboratoryo nga masami ‘ginagamit sa pag-usisa sa dugo nagahatag sing positive electric charge sa X nga similya kag sing negative charge sa Y nga similya. Nian ginausisa ang similya nga ginagamit ang mga terminal sang magkatuhay nga koryente agod simbugon ini.’ Suno sa sientipiko nga orihinal nga naghimo sang teknik para sa industriya sang mga hayop, ang pag-usisa 90 porsiento nga sigurado. Masunod, ang ginpili nga similya sang lalaki ginagamit sa pagpertilisar sa similya sang babayi, kag “ginabutang sa taguangkan ang kiring sang naluyagan nga sekso.” Apang, tubtob sa karon, isa pa lang ang natawo paagi sa sini nga proseso.

Makahalalit nga Binatabata nga Panghambal

Ang una nga mga panikasog sang mga bata sa paghambal pirme ginakabig nga makawiwili, kag madamo nga ginikanan ang mapinalanggaon nga nagahambal man sing binatabata sa ila anak. Apang, mahimo nga ginahalitan sini ang pagtubo sang ikasarang sang bata sa paghambal, sulat sang espesyalista sa paghambal sa Brazil nga si Eliane Regina Carrasco sa magasin nga Veja. Kon ginasulit sang mga ginikanan ang sayop nga pagmitlang sang bata, “ginapalig-on sini ang sayop nga sulundan sang paghambal,” siling ni Carrasco. Mahimo ini makatuga sing mga problema sa paghambal siling niya. Makaapekto man ini sa sosyal nga pagpakig-angot sang bata, dugang niya. “Sa masami, ini nga mga kabataan nagapain sang iya kaugalingon, mahuluy-on, kag wala sing pagsalig sa kaugalingon, nagalikaw sa mga kahimtangan nga [yagutaon] sia.” Kinaandan lamang sa magagmay nga kabataan nga mamitlang sing sayop ang mga tinaga, kag indi kinahanglan nga tadlungon sila sa gilayon, siling ni Carrasco. Apang importante nga hambalon sila sing husto kag dumdumon nga “maalam sila kag may ikasarang sa pagtuon.”

Buhinan sang China ang Polusyon sa Tubig

“Ang polusyon sa tubig isa ka daku nga problema sa China, kag ang pagbuhin sang polusyon sa tubig hilingagawon gid,” siling sang manughambal sang National Environmental Protection Agency sang China. Busa ang gobierno sang China nagahimo sing mga tikang agod mabuhinan ang polusyon sa tubig sa pinakamahigko nga mga suba sang China, report sang magasin nga China Today. Halimbawa, agod makontrol ang higko nga nagasulod sa isa sang pinakamahigko nga suba sang pungsod, ang Huaihe, ang gobierno “nagpasira sa 999 ka magagmay nga pabrika sang papel sa Nalupyakan sang Huaihe.” Ginabulubanta nga 154 milyones ka tawo ang nagapuyo sa Nalupyakan sang Huaihe, nga isa sang nagapanguna nga manugpatubas sing humay kag enerhiya nga mga rehiyon sang China.

“Balaan” nga mga Terorista

Sa panikasog nga “himuon liwat ang iya kaugalingon subong pungsudnon nga simbahan,” ang Ortodokso nga Simbahan sa Romania “naglansar sing malalangon nga kampanya sa pagpakanubo batok sa iban nga denominasyon,” report sang pamantalaan nga Compass Direct sa artikulo nga ginsulat ni Willy Fautré. Si Fautré nagdugang: “Ang pangunang mga lider kag lokal nga mga pari sang Ortodokso nga simbahan sa Romania” nagtukod sing pila ka grupo agod “gamuhon ang minoridad nga mga relihion kag dumilian sila sing sadsaran relihiosong mga kinamatarong.” Ginatawag ang nagawali nga mga broadcaster sa radyo nga “mga manugdagta sa pagtuo sang aton mga katigulangan,” ang arsobispo sang Suceava kag Rădăuţi nagsulat sa presidente sang hubon nga nagadumala sang mga programa sa radyo kag telebisyon sa Romania nga nagasiling: “Ginapangabay namon kamo nga pauntaton sila ukon limitahan, bangod makahuluya gid sila kag dayag nga nagapangumbertir sa aton pungsod.”