Ang Pagkaon Butang nga Dapat Kabalak-an
“LAKAT ka, magkaon nga may kalipay sang imo kalan-on,” siling sang Biblia sa Manugwali 9:7. Sa pagkamatuod, ang pagkaon, indi lamang kinahanglanon kundi isa man sa pinakadaku nga kalipay sa kabuhi.
Binagbinaga ang 34-anyos nga si Thomas. Nanamitan gid sia sa karne. Kag adlaw-adlaw sia nga nagakaon sini—sa masami sing pila ka beses kada adlaw. Ang iya kinaandan nga pamahaw nagalakip sing gatas, pila ka itlog, tinapay ukon tustado nga may mantikilya, kag soriso ukon hamon. Sa fast-food nga mga kalan-an, nagaorder sia sing mga cheeseburger, mga French fry, kag milk shake. Kon nagakaon sa restawran, ang iya paborito amo ang beefsteak. Ang iya paborito nga restawran nagaserbe sing 680 gramos nga steak kag baked potato nga ginbutangan sing sour cream, subong amo gid ang luyag niya. Ang iya paborito nga panam-is amo ang chocolate cake nga may tsokolate nga ice cream sa ibabaw.
Si Thomas nagataas sing 178 sentimetros kag nagabug-at sing 89 kilos; sobra 9 kilos ang iya kabug-aton, suno sa giya sa pagkaon sang gobierno sang Estados Unidos sang 1995. “Wala ako nagakabalaka sa akon kabug-aton,” siling ni Thomas. “Maayo gid ang akon panglawas. Wala gid ako makapalya bisan sing isa ka adlaw sa trabaho sa sulod sang 12 ka tuig. Pirme maayo ang akon pamatyag kag mapagsik—magluwas, siempre, kon makakaon ako sing 680 gramos nga steak.”
Apang, nagahalit bala kay Thomas ang iya ginakaon, amat-amat nga nagahimo sa iya nga kandidato sa atake sa tagipusuon? Sa iya libro nga How We Die, si Dr. Sherwin Nuland nagahambal tuhoy sa ‘mga sulundan sang makatalagam nga pagkabuhi’ kag ginalakip sa sini ang pagkaon sing ‘pula nga karne, daku nga kihad sing hamon, kag mantikilya.’
Paano ang pila ka pagkaon nagadul-ong sa balatian sa tagipusuon sa madamo? Ano ang yari sa sini nga nagatuga sing katalagman? Antes naton binagbinagon ining mga pamangkot, usisaon anay naton sing maayo ang mga katalagman sa panglawas sang sobra nga kabug-aton.
[Retrato sa pahina 3]
Ngaa dapat kabalak-an ang amo nga sahi sang pagkaon?