Ang Pagtamod sang Biblia

Ginatugutan Bala sang Cristianong Paghiusa ang Pagkananuhaytuhay?

ANG paghiusa sa sulod sang Cristianong kongregasyon importante. Ang wala nagahilisugot nga mga pagpati sa doktrina magaresulta sa mainit nga pagbaisay, pagbinahinbahin, kag kaawayon pa gani. (Binuhatan 23:​6-​10) Ang Biblia nagasiling nga “ang Dios isa ka Dios, indi sang kagamo, kundi sang paghidait.” (1 Corinto 14:33) Busa, ginapalig-on ang mga Cristiano sa paghambal nga may paghilisugot kag mag-isa sa painuino kag kaisipan.​—⁠1 Corinto 1:⁠10.

Ginapalig-on bala sining mga pulong kag sang iban pa kaangay nga mga teksto sa Biblia ang estrikto nga pagkapareho sa tunga sang mga Cristiano sa tanan nga bahin? (Juan 17:​20-​23; Galacia 3:​28) Ginapalas-ay bala sang matuod nga Cristianismo subong ginalaragway sa Biblia ang pagkananuhaytuhay kon nahanungod sa indibiduwal nga mga personalidad? Ginapaabot bala ang tanan nga Cristiano nga magsanto sa pila ka sahi sang estrikto nga kinaiya?

Indibiduwal nga Ginabuyok Kita Sang Dios

Malig-on nga ginapatihan sang pila ka tawo nga ang Biblia isa lamang ka instrumento para sa bug-os nga pagkontrol sa mga timawa. Ibutang ta, nga sa masami sayop nga ginahimo ini sang pila ka sekta. Apang, tuhay gid ang pagtamod ni Jesus sa Kasulatan kag sa Balaan nga Awtor sini. Ginlaragway niya ang Dios subong ang isa nga may hanuot nga interes sa tagsa sang iya mga tinuga.

Sa Juan 6:​44, si Jesus nagpaathag: “Wala sing tawo nga makakari sa akon luwas kon ang Amay, nga nagpadala sa akon, magbuyok sa iya.” Ang berbo nga gingamit diri wala nagapahangop nga ginapuwersa sang Dios ang mga tawo, nga batok sa ila kabubut-on. Sa baylo, ang Dios mapinalanggaon nga nagabuyok, nagapukaw sang aton tagipusuon. Subong ginpaathag sang isa ka iskolar sa Biblia, may ‘isa ka impluwensia halin sa Dios nga nagabuyok sang hunahuna sa pagpati.’ Wala ginatamod sang Manunuga ang tawhanon nga pamilya subong katawhan nga wala sing personalidad. Ginausisa niya ang mga indibiduwal kag mapinalanggaon nga ginabuyok ang mga may tagipusuon nga nahuyog sa pagkamatarong.​—⁠Salmo 11:5; Hulubaton 21:2; Binuhatan 13:⁠48.

Talupangda kon daw ano anay ka mapasibuon si apostol Pablo. Ginakilala niya ang pinasahi nga mga kinahanglanon sang mga indibiduwal kag ginbaton niya nga ang pila ka pagtamod kinaandan sa partikular nga nasyonalidad ukon ginhalinan. Nian, ginpasibu niya sa sini ang iya pamaagi. Sia nagsulat: “Sa mga Judiyo nangin subong ako sang Judiyo, agod nga madaug ko ang mga Judiyo . . . Sa mga maluya nangin maluya ako, agod madaug ko ang mga maluya. Nangin tanan nga butang ako sa tanan nga sahi sang tawo, agod nga sa tanan nga paagi maluwas ko ang iban.”​—⁠1 Corinto 9:​20-22.

Sing maathag, wala ginpalareho ni Pablo ang mga tawo ukon gintratar sila tanan sa pareho nga paagi. Ginpalig-on niya sila: “Tuguti nga ang inyo pagpamulong pirme nga may maayong kabubut-on, nga naunawan sing asin, agod mahibaluan ninyo kon paano sabton ang kada isa.” (Colosas 4:⁠6) Huo, dapat kilalahon kag tahuron ni Pablo kag sang iban nga mga Cristiano ang pagkapinasahi sang kada tawo agod mabuligan sia.

Ang Orihinal nga Katuyuan Sang Dios

Ining pagtahod para sa isa ka tawo subong indibiduwal nagapadayon pagkatapos nga ang isa mangin bahin sang Cristianong kongregasyon. Wala ginadula sang katawhan sang Dios ang ila indibiduwal nga pagkatawo sa isa ka organisasyon nga may bug-os nga pag-alalangay kag bug-os nga paghilisugot agod maghisanto sa luyag sang mga may awtoridad. Sa baylo, nanuhaytuhay ang ila personalidad kag nanuhaytuhay ang ila mga abilidad, pamatasan, kag opinyon. Ang personalidad sang kada isa wala ginatamod subong makailinit ukon makaulugot. Bahin ini sang orihinal nga katuyuan sang Dios.

Busa, sa bag-ong kalibutan nga ginsaad sa Biblia para sa mga matarong, may pagkananuhaytuhay gihapon sa tunga sang himpit nga katawhan. (2 Pedro 3:13) Sa idalom sang tig-ulo nga “Perfection,” ang insiklopedia sa Biblia nga Insight on the Scripturesa nagakaigo nga nagkomento: “Apang, ang pagkahimpit wala nagakahulugan nga wala na sing pagkananuhaytuhay, subong amo ang masami nga ginahunahuna sang mga tawo. Ang kalibutan sang kasapatan, nga resulta sang ‘himpit nga hilikuton’ ni Jehova (Ge[nesis] 1:​20-​24; De[uteronomio] 32:⁠4), may madamo kaayo nga sahi.”

Ang Insight nagdugang: “Ang pagkahimpit sang planeta nga Duta may pagkananuhaytuhay man, pagbag-o, ukon pagkatuhay; ginatugot sini ang pagkasimple kag pagkasibod, ang ordinaryo kag diordinaryo, ang maaslom kag matam-is, ang magaras kag mahining, ang mga patag kag ang kagulangan, ang kabukiran kag ang mga nalupyakan. Nagalakip ini sa makarepresko nga pamuno sang tigpamulak, kainit sang tingadlaw upod ang duag-asul sang masinaw nga kalangitan, katahom sang mga duag sa tigragas, putli nga katahom sang bag-o lang nagtupa nga niebe. (Ge[nesis] 8:​22) Sa amo indi dapat pagkabigon nga ang himpit nga mga tawo may pareho nga personalidad, kinaadman, kag abilidad.”

Pagkabalaka sa Iban

Apang, wala ginapalig-on sang matuod nga Cristianismo ang isa ka maiyaiyahon nga pagpasapayan sa mga yara sa palibot naton. Ginbantayan gid ni apostol Pablo ang tagsa ka bahin sang iya kabuhi kag paggawi agod indi masandad ang iban. Nagsiling sia sa iya sulat sa kongregasyon sa Corinto: “Wala kami nagahatag sing bisan ano nga kabangdanan sa kasandaran, agod wala sing masapwan nga sayop sa amon ministeryo.” (2 Corinto 6:⁠3) Kon kaisa, dapat naton kontrolon ang aton personal nga mga handum kag unahon ang mga kinahanglanon sang iban. Halimbawa, nagsulat si Pablo sa mga Cristiano sa Roma: “Maayo nga indi magkaon sing unod ukon mag-inom sing alak ukon maghimo sing bisan ano nga butang nga nagapasandad sa imo utod.”​—⁠Roma 14:⁠21.

Amo man sa karon, mahimo nga ang isa ka tawo maglikaw sa pag-inom sing alkohol sa presensia sang isa nga may problema sa pagkontrol sang iya pag-inom. (1 Corinto 10:​23, 24) Ginahimo ini, indi bangod napilitan sa pagpasugot sa luyag sang isa, kundi subong isa ka dungganon nga buhat sang kaayo kag gugma. “Bisan si Cristo wala magpahamuot sa iya kaugalingon.” Si Jesus isa ka indibiduwal, apang wala niya ginpilit ang iya mga luyag kabaylo sa balatyagon sang iban.​—⁠Roma 15:⁠3.

Sa gihapon, ang isa sang makapaumpaw nga bahin sang matuod nga Cristianismo amo ang pagtahod sini sa mga kahilwayan kag mga luyag sang indibiduwal suno sa mga panuytoy sang Biblia. Nagatudlo ini nga ginhimo kita sang Dios nga mangin tuhay kag pinasahi. Sa 1 Corinto 2:​11, aton mabasa: “Sin-o sa mga tawo ang nakahibalo sa mga butang sang isa ka tawo luwas sa espiritu sang tawo nga yara sa iya?” Ginahangop naton ang iban tubtob mahimo naton. Apang ginapahangop sining bersikulo nga ang kada isa sa aton may pagkapinasahi nga mahangpan lamang sang aton kaugalingon kag sang aton Manunuga. May isa kita ka “natago nga tawo sang tagipusuon” nga aton ginapadayag kon luyag naton.​—⁠1 Pedro 3:⁠4.

Paghiusa kag Pagkananuhaytuhay ​—⁠Mabudlay nga Pagkabalanse

Si apostol Pablo nagpahamtang sing maayo nga huwaran sa Cristianong pagkabalanse. Bisan pa may awtoridad subong isa ka apostoles ni Cristo, naghalong sia nga indi pag-ipilit ang iya opinyon sa iban.

Halimbawa, may mabaskog gid nga opinyon si Pablo tuhoy sa mga bentaha sang pagkadiminyo sa sining dihimpit nga kalibutan. Sia mismo diminyo sang magsulat sia: “Ang mga [nagaminyo] may kapipit-an sa ila unod,” kag, “[ang isa ka balo nga babayi] mas malipayon kon magpabilin sia subong nga amo sia, suno sa akon opinyon.” Ang katunayan nga ang iya mga pulong nangin bahin sang inspirado nga Pulong sang Dios nagapakita nga wala sing malain sa iya opinyon. Apang, nagpaathag man sia: “Bisan kon magminyo ka, wala ka makahimo sing sala.”​—⁠1 Corinto 7:​28, 40.

Maathag nga kalabanan sang mga apostoles minyo nga mga tawo, subong ginbaton ni Pablo sang magsiling sia: “May awtoridad kita nga i-upod ang isa ka utod nga babayi subong asawa, subong sang iban nga mga apostoles kag sang mga utod sang Ginuo kag ni Cefas, indi bala?” (1 Corinto 9:⁠5) Nahibaluan sang mga Cristiano nga tuhoy sini mahimo sila makapili sing tuhay sangsa iya ni Pablo kag iya gihapon sila nga tahuron.

Ang mga sumilimba sang Dios pirme ginatugutan sa pagpahayag sang ila pagtuo nahisuno sa ila pinasahi nga personalidad. Sa katunayan, gintugutan pa gani sang Dios ang mga manunulat sang Biblia nga gamiton ang ila kaugalingon nga estilo sang pagsulat. Halimbawa, mapainubuson si Nehemias bisan pa ginpatuhuyan niya ang iya kaugalingon sang ginsulat niya ang iya rekord. (Nehemias 5:​6, 19) Sa pihak nga bahin, bangod maugdang sia, wala gid gingamit ni apostol Juan ang iya ngalan sa iya Ebanghelyo kag malaka gid nga ginpatuhuyan ang iya kaugalingon. Ginkahamut-an sang Dios ang amo nga mga estilo kag gintipigan ini sa Biblia.

Masapwan man ang kaangay nga mga halimbawa sang pagkabalanse kag pagkamakatarunganon sa bug-os nga Kasulatan. Sing maathag, ginatugutan sang Cristianong paghiusa ang pagkananuhaytuhay. Sa pagkamatuod, ang pagkananuhaytuhay sang mga ginhalinan kag mga opinyon mahimo magresulta sa dipaghiusa kon wala sing espirituwal nga mga kinaiya. (Roma 16:​17, 18) Apang kon ‘sul-uban [naton] ang aton kaugalingon sing gugma, ang himpit nga higot sang paghiusa,’ matun-an naton nga batunon kag malipay sa pinasahi nga personalidad sang iban.​—⁠Colosas 3:​14.

“Busa mag-abiabihay kamo,” siling sang Biblia, “subong nga si Cristo man nag-abiabi sa aton, nga sa himaya sang Dios.” (Roma 15:⁠7) Sa bulig sang espiritu sang Dios, matigayon sang mga Cristiano ang mabudlay nga pagkabalanse nga mahuptan ang paghiusa kag sa amo man nga tion apresyahon ang nanuhaytuhay pinasahi nga mga personalidad sa sulod sang kongregasyon.

[Mga footnote]

[Kapsion sa pahina 14]

Wala ginatamod sang Manunuga ang tawhanon nga pamilya subong katawhan nga wala sing personalidad

[Kapsion sa pahina 15]

Ang kada isa sa aton may pagkapinasahi nga mahangpan lamang sang aton kaugalingon kag sang aton Manunuga