Ang Tubig kag ang Imo Kapagros

“INDI ikaw makasalig sa imo kauhaw sa pagsugid sa imo kon daw ano kadamo nga tubig ang kinahanglan sang imo lawas,” siling sang magasin nga Health. Apang, ang pag-inom sing madamo nga tubig kinahanglanon sa aton pisikal kag emosyonal nga kaayuhan, kag bisan pa gani sa aton dagway. Padayon nga nagapaguwa sing tubig ang aton lawas paagi sa balhas, luha, ihi, subong man sa aton pagginhawa. Ining nagguwa nga pluido dapat tal-usan. Daw ano kadamo ang kinahanglan? Madamo nga eksperto ang nagapanugyan sa pag-inom sing dimagkubos walo ka baso sang tubig​—⁠duha ka quart​—⁠kada adlaw.

Ngaa? Ang tubig kinahanglanon sa pagliton sang mga sustansia sa nanuhaytuhay nga bahin sa sulod sang aton lawas kag sa pagpaguwa sing mga higko. Kinahanglanon ini sa pagkontrol sang aton temperatura kag sa pagpadanlog sang aton mga lutalutahan. “Bisan ang diutay nga kakulang sini mahimo makapakapoy sa imo . . . ukon makapamasakit,” siling sang Health. “Ang pagkanahubsan sing tubig amo sa masami ang wala mahibaluan nga kabangdanan sing kalapyo.” Ang magasin nagapanugyan: “Indi magpadaya sa pagkalikido sang kape kag tsa, may caffeine nga mga soft drink, kag alkohol; sa pagkamatuod nagabulig ini sa pagkahubas sing tubig sa lawas.” Ang caffeine kag alkohol nagapadamo sang imo ihi kag sa amo madamo nga tubig ang madula sang imo lawas.

Tuhoy sa dagway: “Kinahanglan sang imo panit ang tubig agod mangin malum-ok kag mahumok.” Makabulig man ang paghaplas sing moisturizer sa panit. Apang wala ini nagadugang sing tubig. Sa baylo, ginakulapan sini ang panit agod indi makaguwa ang tubig nga yara na nga daan sa panit. Ang paghupot sining tubig sa panit labi nga importante kon nagaedad na, sanglit ang ikasarang sang aton panit sa paghupot sing tubig nagakadula samtang nagatigulang kita.

Sing makapasubo, sa madamo nga bahin sang kalibutan, kinahanglanon ang daku nga panikasog agod makakuha sing bastante nga matin-aw kag matinlo nga tubig. Apang takus ini sa pagpanikasog. Sing pat-od gid, mag-inom sing madamo nga tubig, kag panginpusli ining simple nga paagi agod maayo ikaw tulukon kag maayo ang pamatyag!