Halin sa Pagkabaganihan sa Inaway Padulong sa Pagkasoldado ni Cristo

PANUGIRON NI LOUIS LOLLIOT

Sang Agosto 16, 1944, katapo ako sang Alyado nga puwersa nga nagdungka sa mga baybayon sa bagatnan nga Pransia sadtong Inaway Kalibutanon II. Pagkatapos sang isa ka semana nga inaway sa Baybayon sang Mediteraneo, ang akon grupo sang mga tangke de guerra nagsulod sa pantalan sang Marseilles kag nagtaklad sa bungyod padulong sa Notre-Dame-de-la-Garde Basilica. Ang amo misyon amon ang pag-agaw sa mga pamakod sang Aleman didto.

MASANDUKOT ang inaway. Naigo ang isa ka tangke sa akon grupo, kag tatlo sang akon kaupdanan ang napatay. Nian isa ka mina [bomba sa duta] ang nag-utod sa mga aruga sang akon tangke, kag indi na ini makadalagan. Determinado nga pangapinan ang amon puwesto, nakig-away kami sa masunod nga pila ka oras.

Nagauyat sing machine gun ang pihak nga kamot kag sing bandera sang Pransia sa isa pa ka kamot, ginhimuslan ko ang pagdulog sang inaway kag nag-abante nga nagalakat upod sa Free French nga hangaway. Lapyo kag nag-itom bangod sang pulbura sang armas, ginpatindog ko ang bandera sang Pransia sa puwertahan sang simbahan.

Ang Kahilwayan

Sang masunod nga mga semana, nagpadayon kami sa aminhan nga ginalagas ang nagpalagyo nga mga tropa sang Alemanya. Bangod sang mga snip­er kag sang mga kable nga nagakinabit sa ibabaw sang kalsada napilitan kami nga mag-abante nga sirado ang mga atop sang amon mga tangke.

Sang Oktubre ang amon tropa nakalab-ot sa Ramonchamp, isa ka gamay nga banwa sa ­Vosges Mountains sa naaminhan-nasidlangan sang Pransia. Ang banwa daw ginbiyaan. Samtang nagatindog sa turret sang akon tangke nga ginausisa ang palibot, isa ka raket nga naghalin sa isa ka bintana ang hinali nga nagsulod sa tangke, nga gilayon nga nagpatay sa tatlo sang akon tinawo sang maglupok ini. Ako kag ang isa pa ka soldado malubha nga nasamaran kag naguba ang tangke. Walay sapayan sang 17 ka perdigones sang bala sa akon tiil, ginmaneho ko ang tangke samtang ginaguyod kami sang isa pa.

Bangod sining mga hitabo nakabaton ako sing komendasyon. Pila ka adlaw sang ulihi, sang ginpadunggan ako ni Heneral de Lattre de Tassigny, kumander sang 1st Army sang Pransia, bangod sa akon nahimo sa Marseilles, nagsiling sia: “Makitaay kita liwat sa indi madugay.”

Wala madugay sang ulihi, gindestino ako subong personal nga tinawo. Sang ulihi, gin-updan ko sia sa Berlin, diin ginrepresentar niya ang Pransia sa pagsungka sang Alemanya sang Mayo 8, 1945. Sang masunod nga apat ka tuig, nagserbisyo ako sa idalom sang iya pagmando.

Apang, paano nga nadalahig gid ako sa dalagku nga mga hitabo sang Inaway Kalibutanon II?

Ginhanas sa Relihion kag sa Inaway

Nagdaku ako nga isa ka debotado nga Romano Katoliko nga nagahandum nga mag-alagad sa akon Dios kag sa akon pungsod. Sang Agosto 29, 1939, pila ka adlaw lamang antes nag-entra ang Pransia sa Inaway Kalibutanon II, nagsulod ako sa motorized cavalry. Disiotso anyos lamang ako sadto. Pagkatapos sang lima ka bulan nga paghanas sa École Militaire sa Paris, ginpadala ako subong bataon noncommission nga opisyal sa nasidlangan nga patag-awayan sa Pransia.

Amo ini ang tion nga gintawag nga lahoglahog nga inaway, bangod wala kami sang ginhimo kundi hulaton ang mga tropa sang Alemanya nga masako sa pagpakig-away sa iban nga duog. Nian, sang magsalakay sang ulihi ang mga Aleman, ginbilanggo ako sadtong 1940. Duha ka bulan sang ulihi nakapalagyo ako, kag sang ulihi nakasulod ako sa mga puwersa sang Pransia sa Aminhan nga Aprika.

Sa inaway sa Tunisia batok sa Aleman nga mga tropa sa idalom ni Heneral Erwin Rommel, nga ginbansagan nga Desert Fox, nasunog ang kapin sa 70 porsiento nga bahin sang akon lawas kag nadulaan ako sing pangalibutan sa sulod sang siam ka adlaw. Tatlo ka bulan ako nga naospital sa Sidi-bel-Abbès, sa aminhan-katundan sang Algeria, diin nahamtang ang ulong talatapan sang French Foreign Legion. Samtang didto sa Aminhan nga Aprika, nabaton ko ang Croix de Guerre, ang Militar nga Krus (medalya sang kaisog).

Ginapalig-on kami sang Katoliko nga mga kapelyan nga himuon ang amon “Cristiano” nga katungdanan. Bilang pagsunod sa ila ginasugo, handa ako nga ihalad ang ako kabuhi para sa Pransia. Kon posible para sa akon, Nagapangalawat ako antes magkadto sa inaway. Kag sa tion sang masandukot nga inaway, nagapangamuyo ako sa Dios kag kay Birhen Maria.

Ginatahod ko ang kaaway nga mga soldado, madamo sa ila ang debotado man nga mga Romano Katoliko. Ang pila nagasuksok sing paha nga natigib sa bilya sini ang Gott mit uns (ang Dios kaupod namon). Indi bala makalilibog hunahunaon nga sabton sang Dios ang mga pangamuyo sang mga soldado nga yara sa magkaaway nga mga bahin nga may pareho nga relihion?

Mga Pagbag-o Pagkatapos Sang Inaway

Pagkatapos sang inaway, sang Abril 10, 1947, ginpangasawa ko si ­Reine, isa ka lin-ay halin sa banwa ni Heneral de Lattre de Tassigny sa ­Mouilleron-en-Pareds, sa ­Vendée. Nangin maninoy ko sa kasal ang heneral. Sang napatay sia sang Enero 1952, gindala ko ang iya bandera sa lubong nga ginhatag sa iya sang estado.

Nian, isa ka Domingo sang aga sang ulihi nga bahin sang 1952, sang nagahanda na kami sang akon asawa nga magkadto sa Simbahan upod sa amon gamay nga anak nga babayi, duha ka Saksi ni Jehova ang nagpindot sang amon doorbell. Napukaw ang amon interes sa ila ginsiling tuhoy sa Biblia. Walay sapayan nga relihioso gid kami sang akon asawa, wala kami sing nahibaluan sa Biblia, bangod wala kami ginapalig-on sang simbahan nga basahon ini. Ang Saksi nga nagtanyag sing pagtuon sa Biblia sa amon amo si Léopold Jontès, manugtatap sadto sang sanga talatapan sang mga Saksi ni Jehova sa Pransia. Sa amon pagtuon sa Biblia, nasapwan ko gid man sa ulihi ang mga sabat sa mga pamangkot nga wala masabat kutob sang bata pa ako.

Halimbawa, pirme ako nagapalibog tuhoy sa Amay Namon, ukon ang Pangamuyo Sang Ginuo. Subong Katoliko, nagapati ako nga ang tanan nga maayo nga tawo magakadto sa langit kon mapatay sila, gani indi ko mahangpan kon ngaa nagapangamuyo kami sa Dios: “Matuman ang imo kabubut-on sa duta.” (Mateo 6:9, 10, Douay Version; italiko amon.) Apang wala ako makontento sa iya sabat.

Indi man masabat sang mga pari ang akon mga pamangkot tuhoy sa Trinidad. Ining Katoliko nga panudlo nagasiling, nga suno sa mga pinamulong sang kredo sang simbahan, ‘ang Amay Dios, ang Anak Dios, kag ang Balaan nga Espiritu Dios, apang indi sila tatlo ka Dios kundi isa ka Dios.’ Gani nalipay gid kami sang akon asawa sang matun-an namon nga maathag nga ginatudlo sang Biblia nga si Jesus amo ang Anak sang Dios kag indi ang Labing Gamhanan nga Dios.—Marcos 12:30, 32; Lucas 22:42; Juan 14:28; Binuhatan 2:32; 1 Corinto 11:3.

Pamatyag namon nga daw nabuksan ang amon mga mata sa una nga tion kag nga nakakita kami sang isa ka malahalon nga perlas, nga takus sang bisan anong pagsakripisyo. (Mateo 13:46) Narealisar namon nga kinahanglan nga maghimo kami sing pagpili agod matigayon ini nga manggad. Gilayon namon nga gin-ilog ang pagtamod ni apostol Pablo, nga nagsiling nga ginakabig niya ang “tanan nga butang nga kadulaan bangod sa labaw nga bili sang ihibalo tuhoy kay Cristo Jesus.” Sa amo naghimo kami sing mga pagbag-o sa amon kabuhi agod makaalagad kami sa Dios.—Filipos 3:8.

Nanindugan Ako

Sang Abril 1953, pila ka bulan lamang sang magtuon kami sing Biblia upod sa mga Saksi, nakabaton ako sing mga sugo nga magsulod sa mga yunit sa ekspedisyon nga ipadala agod makig-away sa Indochina. Sadto nga tion, isa ako ka ayudante sa kumandante opisyal sa Senado sa Paris. Sanglit nahangpan ko na sadto ang prinsipio sang Biblia tuhoy sa neutralidad, narealisar ko nga dapat ako maghimo sang desisyon. (Juan 17:16) Ginpahibalo ko ang akon mga opisyal nga indi ko masunod ang mando nga makig-away sa Indochina, nga ginasambit ang akon luyag nga indi na makigbahin pa sa inaway.—Isaias 2:4.

“Nahibaluan mo bala nga makaguba ini sa imo kag mahimo nga madula mo ang maayong mga oportunidad sa palaabuton?” pamangkot sang akon mga opisyal. Kutob sadto ginpahigad na lamang ako, kon sa aton pa. Apang isa ini ka proteksion, kay walay na ako pagtawga sa pagserbisyo sa militar. Madamo sa amon pamilya kag mga abyan ang wala makahangop kon paano nga ginwasi ko ang ginakabig nila nga isa ka importante nga posisyon sa katilingban.

Subong resulta sang akon rekord sa militar, ginapasulabi ako sang mga awtoridad, nga nagatahod sa akon walay sapayan sang akon mga pagtuluuhan. Sang masunod nga duha ka tuig, ginhatagan ako sing dugang pa nga health ­leave, kag wala ako makabalik sa bisan ano sang akon trabaho. Sa pihak nga bahin, kami sang akon asawa nagatambong sa mga miting sang lokal nga kongregasyon sang mga Saksi ni Jehova kag ginapaambit pa gani ang amon bag-o nasapwan nga pagtuluuhan sa iban.

Sa Katapusan—Isa ka Soldado ni Cristo!

Sa katapusan, sang maaga nga bahin sang 1955, nahilway ako sa tanan ko nga obligasyon sa militar. Kinse ka adlaw sang ulihi, sang Marso 12, ginsimbuluhan namon sang akon asawa ang amon dedikasyon kay Jehova nga Dios paagi sa bawtismo sa tubig sa isa ka asambleya sa Versailles. Bangod nagbag-o na ang akon propesyon, dapat ako mangita sing lain nga trabaho agod masagod ang akon pamilya. Sang masunod nga apat ka tuig, nagtrabaho ako subong isa ka kargador sa Halles (ang sentro nga merkado), sa Paris. Walay sapayan nga ini nga pagbag-o indi mahapos, ginpakamaayo ni Jehova ang akon mga panikasog.

Sa sulod sang mga tinuig, kami sang akon asawa nakabulig sa madamo nga tawo nga magbaton sang mensahe sang Biblia. Natigayon ko nga ipaathag ang Cristianong pagtamod tuhoy sa neutralidad sa madamo nga opisyal sa militar kag sibilyan. Ang akon anay karera subong isa ka soldado nangin mapuslanon sa paglandas sa mga pagtamitami sang madamo tuhoy sa mga Saksi ni Jehova. Naghatag ini sa akon sing kahigayunan nga mapaathag ang Cristianong panindugan sa neutralidad tuhoy sa mga inaway sang mga pungsod, ginapakita nga amo man sini anay ang panindugan sang unang mga sumulunod ni Cristo. Halimbawa, si Propesor C. J. Cadoux nagsulat sa iya libro nga The Early Church and the World: “Tubtob sa paggahom ni Marcus Aurelius halos [161-180 C.E.], wala sing Cristiano ang nagsoldado sang mabawtismuhan sia.”

Ang isa sang pinakamabudlay nga mga pagtilaw nga akon naatubang amo ang pagkapatay sang akon asawa sang 1977. Napatay sia pagkatapos sang isa ka tuig nga pagbalatian, maisugon nga nagpabutyag sang iya pagtuo tubtob sa tion sang iya kamatayon. Ang makadalayaw nga paglaum sang pagkabanhaw nagpalig-on sa akon. (Juan 5:28, 29) Ang isa pa ka bulig nga nalandas ko ang akon kalisod amo ang pagpalista subong regular payunir, subong amo ang pagtawag sa bug-os tion nga mga ministro sang mga Saksi ni Jehova. Ginhimo ko ini sang 1982 pagkatapos nga nakaretiro ako sa akon sekular nga trabaho. Sang ulihi, sang 1988, malipayon gid ako sang mag-alagad ako subong isa ka instruktor sa eskwelahan sa paghanas sa mga payunir!

Kutob sang mapatay ang akon asawa, ginaatake ako kon kaisa sing kapung-aw. Apang, ginbuligan ako sang suod, mabakod sa espirituwal nga mga kaabyanan nga maumpawan. Sa tanan sining mga pagtilaw, pirme ko mabatyagan ang pagpalig-on kag mahigugmaon nga kaayo ni Jehova, nga nagaatipan sa tanan nga nagasalig sa iya. (Salmo 18:2) Nagapati man ako nga ang mga pagtilaw nga aton ginaatubang makabulig sa paghanas sa aton nga magpadayon sa aton espirituwal nga pagpakig-away. (1 Pedro 1:6, 7) Subong isa ka gulang sa kongregasyon, nakabulig man ako sa iban nga ginapung-awan.—1 Tesalonica 5:14.

Sang bata pa ako, ginhandum ko nga mangin isa ka soldado, kag sa isa ka kahulugan, nangin soldado ako tubtob karon. Naghalin ako sa isa ka hubon sang mga soldado agod magsulod sa isa pa ka hubon, nangin isa ka “soldado ni Cristo Jesus.” (2 Timoteo 2:3) Sa karon, walay sapayan sang mapigaw nga panglawas, ginahimo ko ang akon bug-os nga masarangan nga makapadayon sa pagpakig-away subong soldado ni Cristo sa “maayo nga inaway” nga magadangat sa ulihi sa kadalag-an, sa kadungganan kag himaya sang aton Dios, si Jehova.—1 Timoteo 1:⁠18.

Si Louis Lolliot napatay sang Marso 1, 1998, samtang ginahanda nga ibalhag ini nga artikulo.

[Laragway sa pahina 13]

Ang amon kasal, nga gintambungan ni Heneral de Lattre de Tassigny

[Laragway sa pahina 15]

Si Louis Lolliot kag ang iya asawa, si Reine, sang 1976