Minilyon ang Magatambong—Ikaw Bala?

KAPIN sa walo ka milyon ka tawo sa bug-os nga kalibutan ang nagatambong sa tuigan nga distrito nga mga kombension sang mga Saksi ni Jehova kada tuig. Sa Disiembre 1999 kag Enero 2000, 52 ka tatlo-ka-adlaw nga “Matagnaon nga Pulong Sang Dios” Distrito nga mga Kombension ang gin-eskedyul sa Pilipinas. Mahimo nga may isa nga pagahiwaton malapit sa inyo puluy-an. Ginapalig-on namon kamo sa pagtambong kon magsugod ang programa paagi sa musika sa alas 8:30 s.a. sa Biernes.

Ang programa sa aga magalakip sang nagaabiabi nga pamulongpulong subong man sang key­note ad­dress nga “Hatagi Sing Igtalupangod ang Matagnaon nga Pulong Sang Dios.” Sa hapon ang simposium nga “Magkalipay sa Pagbasa sa Pulong Sang Dios” magahatag sing praktikal nga mga panugda kon paano himuon nga mapuslanon kag makalilipay ang pagbasa sang Biblia. Ang katapusan nga diskurso sa sina nga adlaw, “Ang mga Nagapakig-away sa Dios Indi Magadaug,” magarepaso sang pagpakig-away nga ginahimo sa moderno nga mga tion batok sa mga manugbantala sang Ginharian sang Dios.

Ang programa sa Sabado sang aga nagalakip sang pagbinagbinag sang bawtismo, kag ang kahigayunan nga mabawtismuhan ginaaman sa mga kalipikado. Sa hapon ihatag ang makapalig-on nga mga report tuhoy sa tumalagsahon nga pagbaton sang mga tawo sa kamatuoran sa Biblia sa pila ka pungsod sa Latin nga Amerika, Aprika, kag Nasidlangan nga Europa, subong man sa daku nga pungsod sang ­Kazakhstan sa Asia. Ang bahin ginatig-uluhan “Ang ‘Kalahamut-an nga mga Butang’ Nagapuno sa Balay ni Jehova.” Ang programa sa Sabado matapos paagi sa duha ka diskurso, “Ang Matagnaon nga mga Kasulatan Nagapaalisto sa Aton nga Magbantay” kag “Ang Matagnaon nga Pulong sa Tion Sang Katapusan.” Ang katapusan magapatalupangod sa tulun-an nga Daniel sang Biblia kag magaaman sing mga rason agod hatagan sing igtalupangod ang mga tagna sini.

Sa Domingo sang aga ang tatlo-sing-bahin, isa ka oras nga simposium nga natig-uluhan sing “Matagnaon nga mga Pulong Para sa Gintalana nga Tion” magabinagbinag sang tagna sang Habacuc. Makita ninyo kon daw ano ka makapalig-on ining malip-ot nga tulun-an sang Biblia sa mga Cristiano karon. Pagkatapos sini ang full-costume nga drama, nga ginpasad sa kasaysayan nanday Jacob kag Esau sa Biblia, magapadaku sang tema nga “Pag-apresyar sa Aton Espirituwal nga Palanublion.” Ang programa sa Domingo sang aga magahinakop paagi sa makapahulag nga pamulongpulong nga “Ano ang Kahulugan sa Imo Sang Aton Hamili nga Palanublion?” Nian, sa hapon, malipay kamo sa pamulongpulong publiko nga “Paghimo sa Tanan nga Butang nga Bag-o—Subong Sang Gintagna.”

Magplano karon sa pagtambong. Agod mahibaluan ang duog nga pinakamalapit sa inyo, palihug pakig-anguti ang pinakamalapit nga lokal nga Kingdom Hall sang mga Saksi ni Jehova ukon magsulat sa mga manugbalhag sini nga magasin.