Magtambong sa “Pagtuo sa Pulong sang Dios” Distrito nga Kombension!

MINILYON ang magatambong sa ginatos ka duog sa bug-os nga kalibutan. Sa Pilipinas lamang, 49 ka mga kombension ang naiskedyul. Ang nahauna magasugod sa Disiembre 19-23 kag ang hingapusan, sa Enero 2-4, 1998. Mahimo nga ang isa sining tatlo-ka-adlaw nga mga pagtinipon​—⁠Biernes tubtob Sabado​—⁠hiwaton sa siudad nga malapit sa imo ginapuy-an.

Makabenepisyo ikaw gikan sa bugana praktikal nga mga panudlo sa Biblia. Sa kalabanan nga mga duog ang programa magasugod sa 8:30 kada aga upod sa musika. Sa aga sang Biernes mapamatian ang 25 minutos nga mga interbyu sa mga tawo nga ang ila mga kabuhi naimpluwensiahan sing daku sang ila pagtuo sa Pulong sang Dios. Ang una nga sesyon matapos paagi sa keynote address nga “Nagalakat Paagi sa Pagtuo, Indi Paagi sa Panulok.”

Ang unang pamulongpulong sa Biernes sang hapon magabinagbinag sa importante nga bahin sang mga pamatan-on sa Cristianong kongregasyon. Ang masunod nga tatlo-ka-bahin nga simposium magapaathag sing mga talaksan sang Biblia tuhoy sa paggawi sang mga Cristiano sa paghambal, pamatasan, kag personal nga pamustora. Masunod ang mga pamulongpulong nga “Magbantay Batok sa Kakulang Sing Pagtuo” kag “Ang Pulong Sang Dios Buhi” nasentro sa maayong mga laygay sa Hebreo kapitulo 3 kag 4. Ang programa sa Biernes matapos sa isa ka diskurso nga “Isa ka Libro Para sa Tanan nga Tawo.”

Ang una nga pamulongpulong sa Sabado sang aga amo “Ang Pagtuo nga Wala Sing mga Binuhatan Patay.” Ang isa pa ka importante nga pamulongpulong sina nga aga nga “Hupti nga Malig-on ang Imo Pagpanggamot sa Kamatuoran,” magapaathag kon paano mangin posible ang pagtubo sa espirituwal. Matapos ang sesyon paagi sa isa ka regular nga bahin sang kombension, “Ang Pagtuo sa Pulong Sang Dios Nagadul-ong sa Bawtismo,” kag sa tapos sini pagabawtismuhan ang bag-o nga mga disipulo.

Ang nagabukas nga pamulongpulong sa hapon sang Sabado, “Makig-away Sing Lakas Para sa Pagtuo,” magapaathag sa mga laygay sang tulun-an sa Biblia nga Judas. Ang isa ka oras nga simposium nga natig-uluhan “Makadto Kita sa Balay ni Jehova” magabinagbinag sa mga benepisyo sang Cristianong mga miting. Ang programa sa sina nga adlaw matapos sa pamulongpulong nga “Ang Kalidad Sang Imo Pagtuo​—⁠Ginatilawan Karon.”

Ang programa sa Domingo sang aga magapasundayag sa may tatlo-ka-bahin nga simposium nga magapaathag sa tulun-an sa Biblia nga Joel, lakip ang aplikasyon sini sa aton adlaw. Masunod amo ang isa ka drama sa Biblia nga natig-uluhan “Hupti ang Imo Mata nga Simple.” Ang importante gid nga bahin sang kombension amo ang pamulongpulong publiko sa hapon, “Ang Pagtuo kag ang Imo Palaabuton.”

Pat-od gid nga mapalig-on ikaw sa espirituwal sa pagtambong sa sini. Mainit ikaw nga ginaabiabi sa tagsa ka sesyon. Magplano karon sa pagtambong. Para sa duog malapit sa imo puluy-an, magpakig-angot sa lokal nga Kingdom Hall sang mga Saksi ni Jehova ukon magsulat sa manugbalhag sini nga magasin. Makita mo man ang mga direksion sang mga duog sang kombension sa Disiembre 8 nga guwa sang Magmata!