Ang Labi nga Pagpadayag sa Kapawa Kon Adlaw Nagaresulta sa Maayo nga Katulugon sa Gab-i

NABUDLAYAN ka bala sa pagtulog? Mahimo nga bangod ini sang kulang nga pagpadayag sa kapawa kon adlaw, ilabi na kon tigulang ka na. Ang mga manugpanalawsaw sa Japan naghimo sining karon lang sing pagtuon sa mga may insomnia nga nagapuyo sa mga balay-alaypan, kag nakita nila nga indi bastante ang tulog sang mga pumuluyo bangod limitado ang ila pagpadayag sa kapawa. Sa amo man nga tion, ginapakita sang mga blood test nga ining mga tigulang may manubo nga nibel sang hormone nga melatonin.

Ang melatonin ginapaguwa sang pineal gland sa utok. Sa normal nga kahimtangan, ang adlaw-adlaw nga siklo sang pagpaguwa sang melatonin ginatunaan sang konsentrasyon sa dugo nga mangin “mataas kon gab-i kag daw indi mamutikan kon adlaw,” report sang The Journal of Clinical Endocrinology & Metabolism. Apang, kon indi mapadayag sing bastante sa kapawa ang mga tigulang kon adlaw, naganubo ang nibel sang melatonin sa dugo. Daw subong bala nga kon tuhoy sa lawas, nagapaburon ini sang kinatuhayan sang adlaw sa gab-i, nga ginapatihan sang mga manugpanalawsaw nga may epekto sa pagtulog.

Sang ang mga tigulang nga may insomnia ginpadayag sa apat ka oras nga masanag nga artipisyal nga kapawa malapit sa kaudtuhon (alas dies tubtob sa udto kag alas dos tubtob alas kuatro) sa sulod sang apat ka semana, ang pagpaguwa sang ila melatonin nagtaas “tubtob sa nibel nga pareho sa grupo sang mga pamatan-on nga napaidalom man sa pagtuon,” siling sang report.a Sa amo man nga tion, nag-uswag ang ila pagtulog.

Bangod sini nga mga resulta, ang mga manugpanalawsaw “naghinakop nga ang mga tigulang, ilabi na ang mga EI [elderly insomniac (tigulang nga may insomnia)], nga yara lamang sa sulod sang may suga nga kuwarto sa daku nga bahin sang adlaw, indi makabaton sing bastante nga kapawa agod mapasibu ang nasulod nga orasan sang ila lawas.” Bangod ang iban nga mga tigulang nagainom sing bulong nga may melatonin agod makatulog, ang report nagsiling: “Bangod sang posible nga epekto sa ulihi sang pag-inom sing melatonin, ang pagpadayag sa kapawa kon udto mahimo maghatag sing mas maayo, epektibo, di-peligruso, kag makontrol nga bulong para sa mga EI nga diutay ang ginapaguwa nga melatonin.”

Gani kon pirme ka sa sulod balay kag gina-insomnia, ngaa indi pagtilawi nga magguwa sa malawiglawig nga tion—ukon mahimo mo pasanagan ang sulod sang imo balay kon adlaw, kag padulmon ang imo hulot-tulugan kon gab-i. Mahimo mo mapamatud-an nga ang labi nga pagpadayag sa kapawa kon adlaw nagaresulta sa maayo nga katulugon sa gab-i.

[Nota]