Ang Pagtamod sang Biblia

Alternatibo nga mga Estilo sang Pagkabuhi​—⁠Ginakahamut-an Bala sang Dios?

“SAN-O ko mahibaluan kon ano ang pilion ko nga sekso?” Amo sini ang ginsulat sang isa ka 13-anyos nga dalagita sa kolumna sang isa ka balasahon nga nagalaygay sa mga tin-edyer. Ginapabanaag sang iya pamangkot ang panimuot sang madamo nga ang mga tawo dapat nga hilway sa pagpili sang naluyagan nila nga estilo sang kabuhi sa sekso.

Mahimo indi mapat-od sang iban nga mga tawo kon ano gid ang ila seksuwal nga mga balatyagon. Dayag nga ginahimo sang iban ang alternatibo nga mga estilo sang pagkabuhi subong sang homoseksuwalidad. Ang iban naman makahas nga nagahulag kag nagapanapot subong sang iya sang tuhay nga sekso. Ang iban nagapabag-o sing sekso paagi sa operasyon. May mga indibiduwal pa gani nga nagapangatarungan nga ang mga adulto dapat tugutan nga makighilawas sa mga kabataan.

Ang seksuwal nga mga buhat kag sekso isa lamang bala ka personal nga desisyon? Ano ang ginasiling sang Pulong sang Dios tuhoy sini?

“Lalaki kag Babayi Gintuga Niya Sila”

Suno sa tulun-an sang Biblia nga Genesis, gintuga mismo sang Dios ang mga lalaki kag mga babayi nga magkatuhay. Ang rekord nagasiling: “Gintuga sang Dios ang tawo sa iya dagway . . . Lalaki kag babayi gintuga niya sila. Dugang pa, ginpakamaayo sila sang Dios kag ang Dios nagsiling sa ila: ‘Magmabungahon kamo kag magbuad kag pun-on ninyo ang duta kag gamhi ini.’ ”​​—⁠Genesis 1:​27, 28.

Gintuga sang Dios ang mga tawo nga may kahilwayan sa pagbuot kag ginhatagan sila sing mga kahigayunan agod gamiton ang ila kahilwayan. (Salmo 115:16) Ang tawo gintulinan sing responsabilidad nga tatapon ang tanan nga iban pa nga buhi nga mga butang sa duta, amo nga gintugutan pa gani ang tawo nga hatagan sila sing nagakaigo nga mga ngalan. (Genesis 2:19) Apang, kon tuhoy sa sekso, ang Dios naghatag sing espesipiko nga mga panuytoy.​​—⁠Genesis 2:⁠24.

Bangod sang pagkadimatinumanon ni Adan, napanubli naton tanan ang pagkadihimpit. Gani dapat batuan naton ang aton undanon nga mga kaluyahon kag mabaskog nga mga kailigbon nga wala nahisuno sa orihinal nga katuyuan sang Dios. Busa, sa kasuguan nga ginhatag paagi kay Moises, gindetalye sang Dios ang seksuwal nga mga buhat nga iya ginakangil-aran​​—⁠nga amo, ang pagpakighilahi, incesto, homoseksuwalidad, kag bestialidad. (Levitico 18:​6-​23) Espesipiko man nga gindumilian sang Dios ang isa ka tawo nga magpakunokuno subong tuhay nga sekso para sa imoral nga mga katuyuan. (Deuteronomio 22:5) Dalayon nga ginatudlo sang Biblia nga ang lamang nga ginatugot sang Dios amo ang paghirupay sang duha nga magkatuhay sing sekso sa sulod sang kahimusan sang pag-asawahay. (Genesis 20:​1-5, 14; 39:​7-9; Hulubaton 5:​15-​19; Hebreo 13:⁠4) Makatarunganon bala ini nga mga talaksan?

Sin-o ang Magapili?

Ginpaanggid sang Biblia ang kahimtangan sang tawo sa atubangan sang iya Manunuga sa daga sa mga kamot sang isa ka maninihon. Ini nagasiling: “O tawo, sin-o ka gid bala nga magasabat sa Dios? Ang butang bala nga gindihon magasiling sa nagdihon sini, ‘Ngaa bala ginhimo mo ako sing subong sini?’ ” (Roma 9:⁠20) Maathag nga ginhimo sang Dios ang mga lalaki kag mga babayi nga natural lang nga magluyagay sa isa kag isa. Busa, indi natural nga ang isa ka tawo maluyag sa pareho nga sekso, sa isa ka sapat, ukon sa isa ka bata.​ ​—⁠Roma 1:⁠26, 27, 32.

Bangod sini, ang mga tawo nga nagapalambo sining indi natural nga mga huyog sa sekso nagapakigbato sa Dios. Ang Biblia nagapaandam: “Kailo sa isa nga nagapakigsuay sa iya Manughuman, subong sang isa ka bika sa iban pa nga mga bika sa duta! Magasiling bala ang daga sa manughuman sini: ‘Ano ang ginahimo mo?’ ” (Isaias 45:⁠9) Gani makatarunganon gid nga ang Manughuman sang mga tawo magahatag sing panuytoy tuhoy sa sekso. Indi man bala makatarunganon nga dapat sundon sang mga tawo ini nga panuytoy?

Pagpanag-iya sing Kaugalingon nga Suludlan

Gingamit sang manunulat sang Biblia nga si Pablo ang kaanggid man nga ilustrasyon sang naghatag sia sing panuytoy sa mga Cristiano tuhoy sa seksuwal nga paggawi. Sia nagsiling: “Ang tagsa sa inyo makahibalo kon paano panag-iyahan ang iya kaugalingon nga suludlan sa pagkabalaan kag sa kadungganan, indi sa mahamkunon nga seksuwal nga kailigbon.” (1 Tesalonica 4:​4, 5) Ginkomparar ni Pablo ang lawas sang tawo sa isa ka suludlan. Ang pagpanag-iya sini nga suludlan nagakahulugan nga ginapahisuno sang isa ang iya mga panghunahuna kag mga handum sa mga kasuguan sang Dios sa moral.

Matuod, mahimo indi ini mahapos. Halangpunon nga ang isa nga gin-abusuhan sa sekso sang bata pa, ang isa nga ang iya mga ginikanan ukon iban pa nga manug-atipan nagpahamtang sing isa ka tiko nga halimbawa sang pagkalalaki ukon pagkababayi, ukon ang isa nga nadayag sa pornograpiya sang bataon pa sia mahimo mabudlayan. Ang gene, hormone, kag hunahuna mahimo mga rason man kon ngaa ang isa ka tawo may tiko nga balatyagon sa sekso. Apang, makalulugpay mahibaluan nga ang aton Manunuga makabulig kag makasakdag sa mga nagakinahanglan sini.​​—⁠Salmo 33:20; Hebreo 4:⁠16.

Magpadihon Ka sa Daku nga Maninihon

Ang daga dapat isentro sa ginadihunan sang maninihon antes niya ini dihunon. Nian, samtang nagatiyog ang ginadihunan, ang maninihon malantipon nga nagatum-ok sang iya mga tudlo agod maporma ang daga sa iya naluyagan nga korte. Antes kita madihon nga mangin isa ka kalahamut-an nga tawo sa mga mata sang Dios, dapat naton isentro ang aton kabuhi sa wala nagabag-o nga mga prinsipio kag mga kasuguan sang Dios. Sa tion nga nagpanikasog na kita, mahigugmaon nga ginadihon kita sang Dios paagi sa Biblia, sa iya balaan nga espiritu, kag sa Cristianong paghiliutod. Nian mabatyagan kag maeksperiensiahan sang isa ka tawo ang personal nga pag-ulikid sang Dios sa iya kabuhi.

Apang, dapat palambuon naton ang pagsalig sa kaalam sang Manunuga, nagasalig nga nahibaluan niya kon ano ang pinakamaayo para sa aton. Mapalambo ining pagsalig paagi sa pangamuyo kag sa maukod nga pagtuon sang Biblia. Ang isa ka tawo nga nagalubad sang problema tuhoy sa indi nagakaigo nga seksuwal nga mga balatyagon nga may amo sini nga pagsalig kay Jehova mangin mahapos dihunon sa mga kamot sang Manunuga. Ang 1 Pedro 5:​6, 7 nagasiling: “Busa, magpaubos kamo sang inyo kaugalingon sa idalom sang gamhanan nga kamot sang Dios, agod nga bayawon niya kamo sa nagakaigo nga tion; samtang ginatugyan ninyo sa iya ang tanan ninyo nga kabalaka, kay sia nagaulikid sa inyo.”

Paagi sa regular nga pagbasa sang Biblia, makilala naton ang madamo nga matutom nga mga alagad sang Dios nga nakigbato sa undanon nga mga kailigbon apang wala nangampo. Makapalig-on gid ini nga mga halimbawa! Mahangpan naton ang kapaslawan nga ginbatyag kon kaisa ni apostol Pablo sang sia nagsiling: “Kailo ako nga tawo! Sin-o bala ang magaluwas sa akon gikan sa lawas nga nagaagom sini nga kamatayon?” Apang, gintudlo man niya sa aton ang pinakatuburan sang bulig sang ginsabat niya mismo ang iya pamangkot: “Salamat sa Dios paagi kay Jesucristo nga aton Ginuo!”​​—⁠Roma 7:​24, 25.

Ang Puersa nga Makapabag-o

Matigayon man naton ang balaan nga espiritu sang Dios. Isa ini ka gamhanan nga puersa nga makapabag-o. Buligan kita sang balaan nga espiritu nga ‘ubahon ang daan nga personalidad’ kag ‘isuklob ang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.’ (Efeso 4:​22-​24) Ang aton mahigugmaon nga langitnon nga Amay wala gid nagakapaslawan sa pagsabat sa aton sinsero nga mga pangabay nga buligan kita sang balaan nga espiritu sa paghimo sini nga pagbag-o. Ginpasalig kita ni Jesus nga ang Amay “magahatag sing balaan nga espiritu sa mga nagapangayo sa iya.” (Lucas 11:13) Apang, importante ang padayon nga pagpangamuyo subong sang ginapakita sang iya mga pulong: “Padayon sa pagpangamuyo, kag ihatag ini sa inyo.” (Mateo 7:⁠7) Matuod ini ilabi na kon nagatinguha kita nga kontrolon ang mabaskog nga mga kailigbon sa sekso.

Ginabuligan man kita sang Dios paagi sa matuod nga Cristianong paghiliutod, nga ginahuman sang mga tawo gikan sa tanan nga ginhalinan. Ang pila ka Cristiano sa unang-siglo nga kongregasyon sa Corinto “mga lalaki [anay] nga ginagamit ang kaugalingon para sa di-kinaugali nga mga katuyuan” kag “mga lalaki nga nagahulid sa mga lalaki.” Apang, nagbag-o sila. Gintinluan sila sang dugo ni Cristo, kag nangin kalahamut-an sila sa panulok sang Dios. (1 Corinto 6:​9-​11) Ang pila karon dapat man maghimo sing kaanggid nga mga pagbag-o. Kag makabaton sila sing suportar sa ila pagpakig-away batok sa di-nagakaigo nga mga kailigbon gikan sa Cristianong kongregasyon.

Nagakahulugan bala ini nga kon ang isa mangin Cristiano, awtomatiko nga madula na ang iya tanan nga di-kinaugali nga mga kailigbon ukon pangduhaduha tuhoy sa sekso? Indi gid man. Ang padayon nga pag-aplikar sa mga prinsipio sang Biblia nagbulig sa iban nga magkabuhi sing normal. Walay sapayan sini, ining nga mga Cristiano dapat pirme magpakigbato adlaw-adlaw batok sa indi nagakaigo nga mga kailigbon. Gani sila nagaalagad sa Dios walay sapayan nga may malaragwayon nga “ungon sa unod.” (2 Corinto 12:7) Samtang padayon sila nga nagapakigbato sa indi nagakaigo nga mga huyog kag ginahuptan ang matarong nga paggawi, ginakabig sila sang Dios subong iya matutom nga mga alagad kag matinlo sa iya mga mata. Makalaum sila sa palaabuton nga ang tanan nga tawo “hilwayon gikan sa pagkaulipon sa pagkamadinulunton kag magaagom sing mahimayaon nga kahilwayan sang mga anak sang Dios.”​​—⁠Roma 8:⁠21.

Samtang wala pa ini, ang tanan nga luyag magpahamuot sa Dios dapat magsunod sang iya matarong nga mga talaksan. Ginpili sang matuod nga mga Cristiano ang pag-alagad sa Dios​​—⁠indi ang pagsunod sa ila makagod nga mga huyog. Yadtong mapainubuson nga nagapasakop sa kabubut-on sang Dios sa tanan nga bahin sang ila kabuhi padyaan sing dayon nga kalipay.​​—⁠Salmo 128:⁠1; Juan 17:⁠3.

[Blurb sa pahina 16]

Tuhoy sa sekso, ang Dios naghatag sing espesipiko nga mga panuytoy

[Blurb sa pahina 17]

Ang pila ka Cristiano sa unang-siglo nga kongregasyon sa Corinto “mga lalaki [anay] nga ginagamit ang kaugalingon para sa di-kinaugali nga mga katuyuan” kag “mga lalaki nga nagahulid sa mga lalaki.” Apang, nagbag-o sila

[Retrato sa pahina 18]

Ang pagtuon sa Biblia makabulig sa isa nga mapalambo ang mataas nga mga talaksan sa moral