Ginaabiabi Kamo sa “Maglakat Upod sa Dios” Distrito nga Kombension

Ginaabiabi Kamo sa “Maglakat Upod sa Dios” Distrito nga Kombension

◼ Minilyon ang magatambong sa mga Distrito nga Kombension sa ginatos ka duog sa bug-os nga kalibutan. Ang una sa 67 ka tatlo-ka-adlaw nga mga kombension sa Pilipinas hiwaton sa Nobiembre 19-21, kag ang katapusan, sa Enero 7-9, 2005. Ang isa sining tatlo ka adlaw nga pagtilipon—⁠⁠kinaandan na nga sa adlaw sang Biernes tubtob Domingo—⁠⁠mahimo nga hiwaton sa siudad malapit sa inyo.

Sa kalabanan nga duog ang programa magasugod sa alas 8:30 sa aga kada adlaw paagi sa musika. Ang tema sa Biernes amo ang “Amo Ini ang Dalan. Lakat sa Sini.” Ang nagaabiabi nga pamulongpulong, “Nagtipon Agod Magpatudlo kay Jehova Sang Iya mga Dalanon,” pagasundan sang isa ka bahin nga nagainterbyu sa mga mainunungon nga nagalakat upod sa Dios. Pagkatapos sang mga pamulongpulong nga “Padayon Ninyo nga Pamatud-an Kon Ano Gid Kamo” kag “Tuguti ang Pulong Sang Dios sa Pagtuytoy Sang Imo mga Tikang Kada Adlaw,” ang sesyon sa aga magahinakop paagi sa keynote address, “Maglakat Upod sa Dios sa Magarot nga mga Tion.”

Ang sesyon sa Biernes sang hapon magalakip sing tatlo-ka-bahin nga simposium, “Ang Tagna ni Oseas Nagabulig sa Aton nga Maglakat Upod sa Dios.” Ang masunod sa sini amo ang mga pamulongpulong nga “Dili Pagbulagon ‘ang Gintingob Sang Dios’ ” kag “Pagpakita Sing Pagtahod sa Aton Sagrado nga mga Pagtilipon.” Ang katapusan nga pamulongpulong sa sina nga adlaw, “Maayong Balita Para sa mga Tawo Sang Tanan nga Kapungsuran,” magahatag sing pagpalig-on nga mapalab-utan sing maayong balita ang mga tawo sang tanan nga hambal.

Ang tema sa Sabado amo ang ‘Padayon sa Pagbantay Sing Maayo kon Paano Kamo Nagalakat.’ Ang simposium sa aga, “Paglakat Sing Progresibo Subong mga Ministro,” nagalakip sing isa ka bahin nga nagahatag sing dugang nga mga panugda sa paglab-ot sa mga nagahambal sing iban nga lenguahe. Ang programa sa aga nagahinakop paagi sa importante nga diskurso nga “Paglakat Upod kay Jehova Suno sa Kasugtanan,” nga pagkatapos sini may kahigayunan nga mabawtismuhan ang kalipikado nga mga tawo.

Ang mga pamulongpulong sa Sabado sang hapon nagalakip sang “Likawi ang ‘Bisan Ano nga Kabangdanan Sang Kasandaran’” kag “Mapuslanon nga mga Aktibidades nga Nagaparepresko.” Ang masunod nga mga presentasyon, “Si Jehova Amo ang Aton Manugbantay,” ‘Pagbakal Sing Nagakaigo nga Tion,’ kag “Paglakat sa Banas Sang Nagasanag nga Kapawa,” may makapalig-on nga mga interbyu. Ini nga sesyon matapos paagi sa makapahunahuna nga diskurso nga “‘Magpadayon sa Pagbantay’—⁠⁠Nag-abot Na ang Takna Sang Paghukom.”

Ang tema sang programa sa Domingo, ‘Padayon nga Maglakat sa Kamatuoran,’ ginapadaku sa pamulongpulong nga “Mga Pamatan-on—⁠⁠Maglakat Kamo sa Banas Sang Pagkamatarong.” Sundan ini sang de-kostyum nga drama tuhoy sa ministeryo ni apostol Pablo. Ang masunod sa sini amo ang pamulongpulong nga nagapadaku sang mga leksion gikan sa drama. Ang programa sa hapon magapadaku sang pamulongpulong publiko, “Ang Paglakat Upod sa Dios Nagadala Sing mga Pagpakamaayo Karon kag sa Walay Katubtuban.”

Para sa lokasyon sang kombension nga malapit sa inyo puluy-an, sarang mo mapakig-angutan ang Kingdom Hall sang mga Saksi ni Jehova sa inyo duog ukon magsulat sa mga manugbalhag sini nga magasin.

[Retrato sa pahina 32]