Ang Pagtamod sang Biblia

Nahamuot Bala ang Dios sa Pagpakasal sang Magkapareho sing Sekso?

SA TION sang seremonya sa simbahan, nagauyatay sing kamot nga nagatindog ang duha ka lalaki sa atubangan sang isa ka kilala nga Episkopal nga obispo. “Nakigkatipan [sila] . . . sa atubangan sang Dios kag sang simbahan.” Nagasuksok sang napunihan sing duag-bulawan kag puti nga panapton, dayag nga ginpakamaayo sang obispo ang ila pag-asawahay. Pagkatapos sini naghaksanay kag naghalukay ang duha kag nagapamalakpak nga nagtindog ang mga tumalambong. Suno sa sini nga obispo, ang kaangay sini nga homoseksuwal nga mga relasyon “balaan kag takus nga pakamaayuhon, . . . takus tawgon nga sagrado.”

Apang, nagpabutyag sing mabaskog nga pagpamatok ang iban nga relihioso nga mga lider sa magkapareho sing sekso nga mga pag-asawahay. “Natublag kami katama sa sini nga desisyon [sang obispo],” siling ni Cynthia Brust, humalambal sang American Anglican Council, isa ka grupo sang konserbatibo nga mga Episcopalian. “Nagasumpakil ang pagpakasal sang magkapareho sing sekso sa maathag nga panudlo sang Biblia tuhoy sa pag-asawahay kag seksuwalidad,” sia nagsiling, “ang balaan nga pagpakasal dapat itugot lang sa lalaki kag babayi.”

Indi lang sa relihion nangin mainit ang kontrobersia tuhoy sa sini nga isyu. Sa bug-os kalibutan, ang nagainit nga pagsinuay sa politika nagabaskog pa gid, bangod sang mangin daku nga epekto sini sa sosyal, politikal, kag ekonomiya nga nagadalahig sa mga pension, kaupod nga pasiguro sa pag-atipan sang ikaayong lawas, kag mga buhis.

Ang mga isyu nga nagalakip sa kinamatarong sang mga banwahanon kag legal nga pagkilala sa masami tuman ka komplikado kag nagapabahinbahin sang panghunahuna sang publiko. Mahinalungon nga nagapabilin nga walay ginadampigan ang matuod nga mga Cristiano paagi sa paglikaw sa mga pagsinuay sa politika. (Juan 17:16)⁠a Apang, naligban ang pila nga may pagtahod sa Biblia tuhoy sa topiko nga pagpakasal sang pareho sing sekso kag homoseksuwalidad. Paano mo ginatamod ang pagpakasal sang pareho sing sekso? Ano ang talaksan sang Dios sa pag-asawahay? Ano ang epekto sang imo panimuot sa imo kaangtanan sa Dios?

Ang Aton Manunuga Nagpahamtang sing Talaksan

Madugay na nga ginpahamtang sang aton Manunuga ang mga kasuguan nga magagahom sa pag-asawahay antes pa ini ginsugdan sang mga panguluhan. Ang una nga tulun-an sang Biblia nagasiling sa aton: “Bayaan sang lalaki ang iya amay kag ang iya iloy kag magahiusa sia sa iya asawa kag sila mangin isa ka unod.” (Genesis 2:24) Ang Hebreo nga tinaga nga “asawa,” suno sa Vine’s Expository Dictionary of Biblical Words, “nagapahangop sang isa ka babayi nga tawo.” Ginkompirmar ni Jesus nga yadtong gintingob sa pag-asawahay dapat “lalaki kag babayi” lamang.​​—⁠Mateo 19:4.

Kon amo, gintuyo sang Dios nga ang pag-asawahay mangin permanente kag suod nga kaangtanan sa tunga sang isa ka lalaki kag isa ka babayi. Ginhimo ang lalaki kag ang babayi nga magkatuwang sa isa kag isa agod mapun-an nila ang emosyonal, espirituwal, kag seksuwal nga mga kinahanglanon kag handum sang tagsatagsa.

Ang bantog nga rekord sang Biblia tuhoy sa Sodoma kag Gomorra nagapakita sang balatyagon sang Dios tuhoy sa homoseksuwalidad. Ang Dios nagpahayag: “Ang singgit sang pagyamo tuhoy sa Sodoma kag Gomorra, huo, mabaskog ini, kag ang ila sala, huo, tuman ini kabug-at.” (Genesis 18:20) Nangin maathag ang kasangkaron sang ila kalautan sa sina nga tion sang ginduaw sang duha ka bisita ang matarong nga tawo nga si Lot. “Ang mga lalaki sang Sodoma . . . naglibot sa balay, halin sa pinakabata pakadto sa pinakatigulang, ang tanan nga mga tawo subong isa ka guban. Kag padayon sila nga nagpanawag kay Lot kag nagasiling sa iya: ‘Sa diin na ang mga lalaki nga nagkadto sa imo sining gab-i? Paguaa sila agod makighulid kami sa ila.’ ” (Genesis 19:​4, 5) Ang Biblia nagsiling: “Ang mga lalaki sang Sodoma malain kag makasasala sing lakas batok kay Jehova.”​​—⁠Genesis 13:13.

Ang mga lalaki nangin “masingki sa ila kailigbon sa isa kag isa, ang mga lalaki sa mga lalaki.” (Roma 1:27) Sila “nagpatuyang sa unod para sa dinagakaigo nga paggamit.” (Judas 7) Sa mga pungsod nga lapnag ang mga kampanya para sa kinamatarong sang mga homoseksuwal, ang pila mahimo mamatok sa paggamit sang tinaga nga “dinagakaigo” sa paglaragway sang homoseksuwal nga paggawi. Apang, indi bala ang Dios ang hukom tuhoy sa kon ano ang nagakaigo kag indi? Ginsugo Niya ang iya mga katawhan sang una: “Indi kamo maghulid sa lalaki kaangay sa inyo paghulid sa babayi. Makangilil-ad ini nga butang.”​​—⁠Levitico 18:22.

Ang Imo Salabton sa Dios

Maathag ang ginsiling sang Biblia: Wala ginakahamut-an ukon ginakunsinti sang Dios ang homoseksuwal nga mga buhat, kalakip man ang mga tawo nga “nagapahanugot sa mga nagahimo sini.” (Roma 1:32) Kag indi mahimo sang “pag-asawahay” nga mangin talahaon ang homoseksuwalidad. Ang panuytoy sang Dios nga “ang pag-asawahay mangin dungganon sa tanan” wala nagalakip sang homoseksuwal nga pag-asawahay, nga iya ginakabig nga makangilil-ad.​​—⁠Hebreo 13:4.

Walay sapayan, sa bulig sang Dios, ang bisan sin-o makatuon nga ‘maglihi sa pagpakighilawas,’ nga nagalakip sang homoseksuwal nga mga buhat, kag “panag-iyahan ang iya kaugalingon nga suludlan sa pagkabalaan kag sa kadungganan.” (1 Tesalonica 4:​3, 4) Matuod, indi ini mahapos pirme. Si Nathan⁠b, nga sadto anay may homoseksuwal nga estilo sang kabuhi, nagsiling: “Abi ko indi ko na gid mauntat ini.” Apang nagbag-o sia paagi sa bulig halin sa “espiritu sang aton Dios.” (1 Corinto 6:11) Subong natukiban ni Nathan, wala sang problema nga indi masarangan ni Jehova, nga nagahatag sing kusog kag kinahanglanon nga bulig agod malab-ot ang Iya mga talaksan kag magbaton sang Iya mga pagpakamaayo.​​—⁠Salmo 46:1.

[Mga nota]

[Picture Credit Line sa pahina 26]

Photo by Chris Hondros/Getty Images