Pagbantay sa Kalibutan

◼ Ang nagligad nga tuig amo “ang pinakamainit sa Nabagatnan nga Hemisperio” kag “ikaduha sa pinakamainit nga tuig sa bug-os nga kalibutan.” “Ang walo sa napulo ka pinakamainit nga tuig [nga narekord] natabo sang nagligad lang nga dekada.”​—BBC NEWS, BRITANYA.

◼ Ang tigbalagyo sang 2005 sa Atlantiko amo ang “pinakamadamo” kag “maathag nga . . . ang pinakamakahalapay” nga narekord. Pito sa 14 ka narekord nga bagyo ang may kabaskugon nga hangin nga 177 kilometros por ora.​—U.S. NATIONAL OCEANIC AND ATMOSPHERIC ADMINISTRATION.

◼ Sang 1850, kapin sa 150 ang dalagku nga mga yelo sa Glacier National Park sa Montana [E.U.A.]. Sa karon 27 na lang.”​—THE WALL STREET JOURNAL, E.U.A.

◼ “Ang maathag nga kamatuoran tuhoy sa mga programa may kaangtanan sa pagbag-o sang klima amo nga wala sing pungsod ang handa nga magsakripisyo sang iya ekonomiya agod malubad ini nga problema.”—TONY BLAIR, PRIMER MINISTRO SANG BRITANYA.

“Pagpamalaybalay” sang mga Katoliko?

Suno kay Cláudio Hummes, nga arsobispo sang São Paulo, ang kadamuon sang Katoliko nga mga taga-Brazil nagnubo halin sa 83 porsiento pa 67 porsiento sang nagligad nga 14 ka tuig. Ginabasol sang arsobispo ang “kakulang sang ikasarang sang simbahan bangod sa nanuhaytuhay nga kabangdanan, nga ibantala sing maayo ang ebanghelyo sa bawtismado nga mga miembro sini.” Si Hummes nagsiling: “Kinahanglan naton lab-uton ang mga matinuuhon, sa pamalaybalay, sa mga eskwelahan, sa mga institusyon, kag indi lamang sa lokal nga komunidad sang simbahan.” Ang Folha Online nagsiling nga ini nga hilikuton dapat himuon sang mga katapo nga ginhanas subong mga misyonero. Ang kakulang sang mga pari isa man sa dalagku nga mga problema nga ginaatubang sang Katoliko nga Simbahan sa Brazil kag sa iban pa nga bahin sang Latin Amerika sa kabilugan.

Legal nga Pagkilala sa Alemanya

Sa isa ka desisyon nga ginbalhag sang Pebrero 10, 2006, ang Federal Administrative Court sa Leipzig, Alemanya, namatbat nga ang Estado sang Berlin dapat magkilala sang Relihioso nga Asosasyon sang mga Saksi ni Jehova sa Alemanya subong isa ka publiko nga korporasyon. Nagtapos ini sang 15 ka tuig nga pagbista, diin ang kaso ginkaptan sang pila ka korte sang Alemanya, lakip ang Federal Constitutional Court. Subong isa ka publiko nga korporasyon, ang Relihioso nga Asosasyon sang mga Saksi ni Jehova sa Alemanya may kinamatarong nga mangin libre sa buhis kag sa iban pa nga mga pribilehiyo nga ginahatag sa dalagku nga relihion sa pungsod.

Pamatan-on nga mga Tsino Nagiyan sa mga Hampang sa Internet

“Padayon nga nagadugang ang pagkagiyan sang pamatan-on nga mga Tsino sa mga hampang sa Internet,” siling sang South China Morning Post sa Hong Kong. Ini nga pagkagiyan makita man sa mga pamatan-on sa iban nga mga duog sa Sidlangan, subong sang Hong Kong, Japan, kag Republika sang Korea. Ang pamantalaan nagsiling: “Ang nagadugang nga handum nga maghampang sa Internet kag balewalaon ang mga tawo sa palibot, nagapakita sang pagbato sang mga kabataan sa paghugakom sang katilingban nga naghalin sa mga ginapaabot sang ila mga ginikanan sa ila kag sa mahaliton nga pagkompetensiahanay agod makasulod sa unibersidad.” Ginabulubanta nga mga anom ka milyon ka Tsino nga mga bata ang dapat buligan nga malandas ini nga pagkagiyan.