Ang Katalagman nga Ginakabalak-an sang Tanan nga Ginikanan
SANDAY Heather kag Scott masinadyahon nga mag-asawa kag mga ginikanan sang isa ka maalam kag mapagros nga tres anyos nga bata nga lalaki.a Ginaatipan nila sing maayo ang ila anak. Apang, sa kahimtangan karon sa kalibutan, indi ini mahapos himuon. Madamo ini sing problema kag responsibilidad. Kadamo gid sing dapat nga itudlo sa mga anak! Apang, isa ka responsibilidad ang labi gid nga ginaukuran nanday Heather kag Scott: Luyag nila amligan ang ila anak gikan sa mga katalagman sang seksuwal nga pag-abuso. Ngaa?
“Ang akon amay di-mapinalanggaon, palapangakig, kag palahubog,” siling ni Heather. “Ginasakit niya ako, kag ginhimuslan niya kami sang akon mga manghod nga babayi.”b Madamo ang nagaugyon nga ini nga pag-abuso makatuga sing madalom nga pilas sa balatyagon. Gani, determinado gid sanday Heather kag Scott nga amligan ang ila anak!
Madamo nga ginikanan ang nabalaka sa pag-abuso sa bata. Ayhan ikaw man. Indi kaangay ni Heather, mahimo wala mo maagihi ang pag-abuso kag ang mga epekto sini, apang pat-od nga nakabati ka na sang makakulugmat nga mga report kon daw ano kalapnag ining makangilil-ad nga buhat. Sa bug-os nga kalibutan ang mga ginikanan ginakugmat gid sa nagakatabo sa mga bata sa ila duog.
Indi makapakibot nga gintawag sang isa ka manugpanalawsaw sa patag sang seksuwal nga pag-abuso ini nga paglapnag nga “isa sang labing makakulugmat nga balita sa aton dag-on.” Makapasubo gid ini nga balita, apang makatilingala gid bala ini? Para sa mga nagatuon sa Biblia, indi. Ginapaathag sang Pulong sang Dios nga nagakabuhi kita sa magamo nga tion nga ginatawag nga “katapusan nga mga adlaw,” ang tion nga ang mga tawo “mabangis,” “mga mahigugmaon sang kaugalingon” kag “wala sing kinaugali nga pagpalangga.”—2 Timoteo 3:1-5, NW.
Ang seksuwal nga pag-abuso isa ka makakulugmat gid nga problema. Sa pagkamatuod, nagakabalaka gid ang mga ginikanan kon pamensaron nila ang kalautan sang mga tawo nga nagahimulos sa mga bata. Apang, indi bala masarangan sang mga ginikanan ini nga problema? Ukon may praktikal bala nga mga tikang nga dapat himuon ang mga ginikanan agod maamligan ang ila mga anak? Binagbinagon sang masunod nga mga artikulo ini nga mga pamangkot.
[Mga nota]
a Ang mga ngalan sa sining serye sang mga artikulo gin-islan.
b Ang seksuwal nga pag-abuso sa bata nagakatabo kon ginagamit sang isa ka hamtong ang bata agod mabusog ang iya kaugalingon nga seksuwal nga mga kailigbon. Masami ini nagadalahig sing ginatawag sang Biblia nga pagpakighilawas, ukon por·neiʹa, nga mahimo maglakip sa paghurikap sa kinatawo, seksuwal nga pagpakighirop, kag oral ukon anal sex. Ang iban nga mga pang-abuso—subong sang paghapulas sa dughan, imoral nga mga pagpabutyag, pagpakita sing pornograpiya sa isa ka bata, pagpanglingling, kag malaw-ay nga pagpakita sang kalawasan—mahimo malakip sa ginapakamalaut sang Biblia nga “lugak nga pagginawi” ukon “kahigkoan nga may paghamkon.”—Galacia 5:19-21; Efeso 4:19.