“Kanta Man Lang Gali”
● Si Juliana isa ka tigulang nga Cristiano nga taga-Pilipinas. May balatian sia nga Alzheimer, gani indi na niya makilala bisan ang iya mismo mga kabataan. Pero ginapamasyaran ko gid sia kada magkadto ako sa ila lugar.
Indi na makabangon si Juliana kag nagatan-aw lang pirme sa bintana. Nabudlayan ako kay indi na niya ako kilala. Ginahimutaran niya ako pero blangko ang iya panulok. Ginapamangkot ko sia: “Ginapanumdom mo man si Jehova?” Ginsugiran ko sia sing isa ka eksperiensia pero daw wala sia sing may naintiendihan. Nagkanta ako, dayon nakibot gid ako sa natabo.
Nagliso si Juliana, nagtulok sa akon, kag nagkanta man! Sang ulihi nag-untat ako kay indi ko saulado ini nga kanta sa Tagalog. Pero si Juliana nagpadayon sa pagkanta! Saulado niya ang tatlo gid ka stanza! Ginsugo ko dayon ang upod ko nga maghulam sing songbook sa Saksi nga tupad nila. Nagbalik sia dayon. Indi ko madumduman kon ano nga numero ang iya ginakanta, pero pagbukas ko amo gid ini! Dayon ginkanta namon ini liwat. Sang ginpamangkot ko si Juliana kon may nadumduman pa sia nga iban nga kanta, nagkanta sia sing Tagalog nga love song.
“Indi Nang,” siling ko, “indi ang kanta sa radyo kundi ang sa Kingdom Hall.”a Dayon nagkanta ako sing isa pa ka kanta sa songbook, kag nagkanta man sia upod sa akon. Nakita ko nga malipayon gid sia. Wala na sia nagakaurungan kag katam-is gid sang iya yuhum.
Sang ulihi, nagginuwa ang ila mga kaingod kag gintan-aw kon sin-o ang nagakanta. Nagpalapit sila sa bintana kag namati sa amon. Nalipay ako nga natandog gid sang musika ang tagipusuon ni Juliana! Bangod sini, nadumduman niya ang bilog nga kanta.
Natun-an ko sa sini nga wala kita makahibalo kon ano ang makatandog sa tagipusuon sang mga tawo nga indi na makaintiende ukon makakomunikar. Mahimo nga kanta man lang gali.
Wala madugay pagkatapos sini, napatay si Juliana. Nadumduman ko sia sang nagapamati ako sa bag-o nga mga ambahanon sang mga Saksi ni Jehova nga ginpagua sang 2009. Puede mo pamangkuton ang mga Saksi kon paano ka makakuha sining matahom nga mga ambahanon.
[Nota]
a Ang simbahan sang mga Saksi ni Jehova.