Pagbantay sa Kalibutan

Wala gani 25 porsiento sa mga German, nga nagaedad 40 pa ubos, ang pabor sa adlaw-adlaw nga pagpangamuyo upod sa ila kabataan, kag sa mga miembro sang simbahan, 4 lang sa 10 ang nagasiling nga importante ini.—APOTHEKEN UMSCHAU, GERMANY.

Ang donor sang semilya nga may undetected genetic mutation nga nagaresulta sa balatian sa tagipusuon, nagpasa sini nga balatian sa 9 sa 24 niya ka kabataan. Ang isa sa ila napatay sa heart failure sa edad nga duha ka tuig.—JAMA, U.S.A.

“Sobra 50 porsiento sang mga taga-Rusya ang nagapati nga indi gid malikawan ang korapsion kag bahin na ini sang kabuhi.”—RIA NOVOSTI, RUSSIA.

Nagadiutay ang Matuod nga Abyan

“Ang isa ka Briton may ara lamang tatlo ka matuod nga amigo ukon amiga nga [iya] masaligan,” siling sang Daily Telegraph sang London. Suno sa isa ka pagtuon, ang pila sa mga rason nga indi na sia makakomunikar sa “mga 36 niya ka abyan sa sulod sang pila ka tuig” amo ang “kasakuon,” ‘paglayuay,’ kag sa 43 porsiento nga ginsurbe, amo ang “paglainay sang buot . . . kag indi pagsapakanay.” Mga 20 porsiento ang nagapalapit na lang sa ila mga katrabaho kay “wala na sila sing mapalapitan.” Ang humalambal sang surbe nagsiling: “Indi basta-basta nga saligan ka dayon.”

Droga sa Idalom-tubig

Nangin mas hi-tech pa gid ang pamaagi sang mga drug pusher sa Colombia para mag-ismagol sang cocaine sa Central America, Mexico, kag Estados Unidos. Sugod sang 1993, mga 42 ka mga semisubmersible ukon daw submarino nga mga sakayan ang nadakpan kag nakuha sang mga pulis sa Colombia. Nadiskobrehan man ang pila ka shop diin ginaobra ini nga mga sakayan. Bisan ining de-krudo nga mga sakayan indi makasalom, mabudlay ini pangitaon sang radar. Ang iban makalambot sa mga 3,200 kilometros, kag makakarga sing mga anom asta pulo ka tonelada sang cocaine. Ini nga sakayan mahimo nga nagabili sing $1 milyon (U.S.).

Pagkaon Upod sa Pamilya

Wala katunga sa gin-interbyu nga mga taga-Finland nga 14 asta 16 anyos ang nagakaon upod sa ila pamilya. Suno pa sa sini nga pagtuon, madamo nga pamilya ang wala na nagahanda sing pagkaon. Pero gusto sang mga pamatan-on nga makaupod nila ang ila pamilya sa sini nga mga tion. Sang ginpamangkot sila kon ano ang ginapangayo nila sa ila ginikanan, ang ila sabat: “Masadya nga pagkinaon upod sa pamilya kag may magpamati kag maghatag sa imo sing tion,” siling sang pamantalaan nga Helsingin Sanomat. Ang pagkaon upod sa pamilya may epekto sa panghunahuna sang mga pamatan-on. Suno sa sini nga artikulo, “ang mga pamatan-on nga nagakaon upod sa ila pamilya, maalam sa eskwelahan, halos wala nagapanigarilyo, nagapahubog, ukon nagadroga kag talagsa lang nagakadepres.”