Kahon sang Pagkaon Nagahatag sing Panaksi
SANG mga adlaw pagkatapos sang linog sa Kobe, Japan, sang nagligad nga Enero, ang mga tawo sa naapektuhan nga duog ginbudlayan sa pagpangita sing pagkaon. Sa gihapon, ang mga Saksi ni Jehova wala ginkulang sang mga kinahanglanon, bangod sa maluluy-on nga bulig sang ila mga kauturan. Sa unang duha ukon tatlo ka adlaw pagkatapos sang linog, ang kaingod nga mga kongregasyon nag-aman sing mga kan-on. Sang ulihi, ang mainulikdon nga mga kauturan nag-aman sing mga kahon sang pagkaon. Sa mga kahon sang pagkaon, madamo nga sulat ang natakod nga nagapabutyag sing pag-ulikid para sa mga naapektuhan. Yadtong nakabaton sing pagkaon nagsiling nga ang tagsa ka pagkaon “naasinan” bangod indi nila mapunggan ang maghibi samtang ginabasa ang mga nasulat.
Ginpaambit sang mga Saksi ni Jehova ang ila pagkaon sa iban nga nagakinahanglan. Isa ka Saksi ang nagapanyaga samtang nagasakay sa kotse upod sa isa ka di-Saksi nga abyan nga nagatrabaho sa pareho nga kompanya. Ginpaambit niya ang isa sang mga kahon sang pagkaon nga nabaton niya.
“Diin mo ginbakal ini nga kahon sang pagkaon?” pamangkot sang iya abyan. Ginpaathag sang utod nga lalaki ang bulig nga hilikuton sang mga Saksi. “Pila na ka adlaw nga wala ako makakaon sing utan. Mabilin ako sing diutay kag dalhon ini sa akon pamilya,” mapinasalamaton nga ginsiling sang lalaki.
Sang ikatlo nga beses nga nakabaton sia sang kahon sing pagkaon, gindahuan sang iya abyan sing 3,000 ka yen (mga $35, U.S.) ang Saksi kag nagsiling: “Nahibaluan ko ang inyo mga hilikuton, gani tuguti ako sa paghatag sing donasyon sa inyo hilikuton. Ginapasalamatan ko nga ginpaambit mo ang imo panyaga sa akon. Sa pagkamatuod, ang imo mga abyan maayo gid tanan nga mga tawo.”