Paagi 5—Buligi ang Imo Kaugalingon kag ang Imo Pamilya

Sa madamo nga pungsod, may publiko kag pribado nga mga institusyon nga nagatudlo kag nagahatag sing mga balasahon parte sa pag-atipan sang aton panglawas. Panginpusli ini kag magtuon sing mga paagi kon paano maamligan kag mangin maayo ang imo panglawas. Mangin handa pirme nga maghimo sing mga pagbag-o.

Kon sundon mo ang imo mga natun-an, makabulig ini sa imo kabataan kag sa ila man kabataan sa ulihi. Kon magpakita sing maayo nga halimbawa ang mga ginikanan parte sa husto nga pagkaon, katinlo, pagtulog, ehersisyo, kag paglikaw sa balatian, makabulig ini sa ila kabataan.—Hulubaton 22:6.

Gusto naton ang maayo nga panglawas indi lang para sa aton kaayuhan. Ang pag-untat sa mga bisyo kag bisan ang paghimo sang simple nga mga pagbag-o indi mahapos. Bisan nabal-an sang iban nga magabalatian sila ukon mapatay, wala nila gihapon ginahimo kon ano ang insakto. Ano ang makabulig sa ila? Pareho sa aton tanan, nagakinahanglan sila sing mas mabug-at nga rason ukon tulumuron sa kabuhi.

Halimbawa, dapat mapagros ang mag-asawa para makabuligay sila. Dapat tudluan kag buligan sang mga ginikanan ang ila kabataan. Dapat atipanon sang kabataan ang ila nagatigulang nga ginikanan. Kag gusto naton tanan nga makabulig sa komunidad sa baylo nga mangin kabug-atan. Para mahimo ini, kinahanglan ang gugma kag pag-ulikid sa iban.

Ang mas mabug-at pa gid nga rason amo ang pagpasalamat sa aton Manunuga. Gusto gid sang mga nagatuo sa Dios nga amligan ining hamili nga regalo sang kabuhi. (Salmo 36:9) Kon mapagros kita, maalagad naton ang Dios sing maayo. Amo ini ang pinakamaayo nga motibasyon para atipanon naton ang aton lawas.