3. Ihanda sing Maayo kag Tagua sing Husto ang Pagkaon
SA Israel sadto, may isa ka tawo nga nanguha sang talunon nga balagon. Bisan pa ‘indi niya ini kilala,’ ginlakot niya ini sa linaga. Ang mga nagkaon kinulbaan nga basi makahililo ini gani nagsiling sila: “May kamatayon sa kolon!”—2 Hari 4:38-41.
Subong sang ginapakita sini nga ilustrasyon, dapat gid kita mag-andam sa pagkaon nga wala mahanda sing maayo, kay mahimo nga delikado ini ukon makamamatay pa gani. Agod malikawan ang balatian nga halin sa pagkaon, dapat tun-an naton ang maayo nga paghanda kag husto nga pagtago sang pagkaon. Binagbinaga ang apat ka panugda:
● Indi pagpatahawa ang karne sa normal nga temperatura.
“Bisan pa nagayelo ang tunga sang karne samtang ginapatahaw mo ini,” siling sang U.S. Department of Agriculture, “ang gua nga bahin sini ara sa ‘Danger Zone,’—4°C asta 60°C—sa diin mas madasig magdamo ang bakterya.” Mas maayo nga patahawon lang ini sa repredyeritor mismo, sa microwave oven, ukon putson ini sa sirado nga plastik kag huluman sa matugnaw nga tubig.
● Lutua sing maayo.
Suno sa World Health Organization, “kon maluto sing maayo ang pagkaon, mapatay ang halos tanan nga makahalalit nga mikroorganismo.” Kon nagaluto, ilabi na sang mga sabaw ukon linaga, siguraduha nga nakalab-ot sa 70°C ang temperatura.a Bangod mabudlay mahibaluan ang temperatura sang pila ka linuto, madamo nga kusinero ang nagagamit sang thermometer. Puede man tuslukon sang tinidor ukon hiwaon ang karne para mahibaluan kon luto na ini.
● Iserbe dayon.
Ang linuto indi dapat pagpabay-an sa normal nga temperatura, gani dapat ini iserbe dayon agod indi magpan-os. Ang mainit nga pagkaon indi dapat pagpabugnawon, kag ang matugnaw nga pagkaon indi dapat pagpatahawon. Halimbawa, pagkatapos luto, pahinayi lang anay ang kalayo para indi magbugnaw ang pagkaon.
● Indi pagpadugaya ang sobra nga mga pagkaon.
Ginaserbe dayon ni Anita, nga iloy sa Poland, ang pagkaon pagkaluto sini. Pero kon may sobra, siling niya, “ginatungatunga ko ini sa magagmay nga mga suludlan antes isulod sa repredyeritor agod madali patahawon.” Kon may sobra ka nga mga pagkaon sa repredyeritor, dapat kaunon ini dayon sa sulod sang tatlo ukon apat ka adlaw.
Pero kon magkaon ka sa mga kalan-an sa gua, nagasalig ka na lang sa mga nagahanda sang imo pagkaon. Kon amo, paano mo maproteksionan ang imo pamilya?
[Nota]
a May mga pagkaon nga dapat lutuon sa mas mainit nga temperatura, subong sang karne sang manok.
[Kahon sa pahina 6]
HANASA ANG IMO KABATAAN: “Kon magluto ang akon kabataan, ginapahanumdom ko sila nga basahon gid ang instruksion sa putos sang pagkaon.”—Yuk Ling, Hong Kong