Ang Buron nga Panan-aw sang Jumping Spider

ANG jumping spider may pinasahi nga sistema sa mata nga makakalkular sang eksakto nga distansia sang iya lumpaton. Paano niya ini nahimo?

Binagbinaga: Para matakus ang iya kalayuon sa isa ka butang, ginagamit sini nga damang ang pinasahi nga ikasarang sang iya duha ka panguna nga mata, nga ang kada isa may nagasampawsampaw nga retina. Ang isa ka sampaw klaro ang makita samtang ang isa naman buron. Samtang mas buron ang makita sa sina nga sampaw, buot silingon mas malapit ang butang sa iya mata. Paagi sini, mahibaluan sang damang ang eksakto nga kalayuon sang iya lumpaton para madakpan ang iya biktima.

Gusto ilugon sang mga researcher ang teknik sang jumping spider para makahimo sang 3-D nga kamera kag mga robot nga makatakus sang kalayuon sang isa ka butang. Suno sa online news site nga ScienceNOW, ang panan-aw sang jumping spider “isa ka halimbawa sang mga sapat nga mga tunga lang sa sentimetro kadaku kag may utok nga gamay pa sa utok sang langaw, pero makakuha sing komplikado nga impormasyon paagi sa ila mga mata, kag makahulag suno sa sini.”

Ano sa banta mo? Ang buron bala nga panan-aw sang jumping spider resulta sang ebolusyon? Ukon gindesinyo ini?