BULIG PARA SA PAMILYA | PAMATAN-ON
Paano Mo Batunon ang Pagtadlong?
NGAA MABUDLAY?
“Kon ginatadlong ka sang iban, ina nga tawo nagasiling nga sayop ang imo ginahimo. Kag wala ako sing may nakilal-an nga nagsiling, ‘Nanamian gid ako kon munuhon nga sayop ang akon ginahimo!’”—Amy, 17.a
Ang wala nagabaton sang pagtadlong daw pareho sang piloto nga wala nagabaton sang direksion halin sa control tower. Mahimo makatalagam gid ang mangin resulta.
Nabudlayan ka bala magbaton sang pagtadlong halin sa imo mga ginikanan, manunudlo, kag iban pa nga adulto? Kon amo, makabulig sa imo ini nga artikulo.
ANO ANG DAPAT MO MAHIBALUAN?
Tanan kita nagakinahanglan sing pagtadlong.
“Kita tanan nagakasandad sing madamong beses.”—Santiago 3:2.
“Indi ka dapat mahuya kon may magtadlong sa imo kay nakahimo ka sang sayop.”—Jessica.
Kon gintadlong ka wala ini nagakahulugan nga malain ka nga tawo.
“Sia nga ginahigugma sang GINOOb ginabadlong niya, subong sang amay sa anak nga sa iya nagakahamuut sia.”—Hulubaton 3:12.
“Kon ginatadlong ako sang iban, ginatinguhaan ko nga pensaron kon daw ano ka budlay para sa ila nga himuon ini kag mahigugmaon gid sila sa paghatag sing laygay sa akon.”—Tamara.
Ang pagtadlong makabulig sa imo nga mangin mas maayo nga tawo.
“Pamatii ang pagtudlo kag magmaalam.”—Hulubaton 8:33.
“Importante ang pagtadlong sa imo paghamtong. Bangod sini, mahibaluan mo kon ano ang pagtan-aw sang iban sa imo kag makabulig sa imo nga makontrol ang imo malain nga pamatasan nga mahimo wala mo matalupangdan.”—Deanne.
ANO ANG MAHIMO MO?
Mangin bukas sa imo panghunahuna. Mahimo maglain ang imo buot kon tadlungon ka. Pero indi pagsapaka ang imo balatyagon. Para mabuligan ka, hunahunaa nga indi ikaw ang ginalaygayan sa baylo, ikaw ang nagalaygay sa iban, pareho abi sa imo manghod. Nakita mo bala ang kaayuhan sang laygay? Karon, hunahunaa nga ikaw na ang ginalaygayan.—Prinsipio sa Biblia: Manugwali 7:9.
“Kon kaisa grabe gid ang imo kaakig sa laygay sa imo kag nalimtan mo nga ginabuligan ka lang niya nga mangin maayo nga tawo, kag wala niya ginasakit ang imo balatyagon.”—Theresa.
Magpaubos. Indi pagtuguti nga bangod sang bugal indi mo na pagbatunon ang pagtadlong. Kag indi man pagtuguti nga maglain ang imo buot kay may kinahanglan ka pauswagon. Ang pagpaubos makabulig sa imo nga indi ini paghimuon. Dumduma ini: Ang pagtadlong nga tuman ka sakit mahimo amo ang pagtadlong nga kinahanglan mo gid. Pero kon indi mo ini pagbatunon, kon ano man ang imo rason, nawasi mo ang kahigayunan nga mag-uswag.—Prinsipio sa Biblia: Hulubaton 16:18.
Ang pagtadlong nga tuman ka sakit mahimo amo ang pagtadlong nga kinahanglan mo gid
“Importante nga bahin agod mangin hamtong ang pagbaton sang pagtadlong. Kon indi naton ini paghimuon kag magtuon sa sini, basi mahalitan pa naton ang aton kaugalingon sa ulihi.”—Lena.
Magpasalamat. Bisan pa daw mabudlay batunon ang pagtadlong, ngaa indi mo pagpasalamatan ang naghatag sini sa imo? Wala duhaduha nga luyag sina nga tawo ang pinakamaayo para sa imo kag gusto niya nga magmadinalag-on ka.—Prinsipio sa Biblia: Salmo 141:5.
“Wala gid sing sayop sa pagsiling sing ‘Salamat,’ ilabi na kon kinahanglan mo ang laygay. Bisan pa indi mo ini kinahanglan, mahimo mo pasalamatan ang ginhimo sang tawo nga naglaygay sa imo.”—Carla. ◼
a Gin-islan ang iban nga ngalan sa sini nga artikulo.
b Si Jehova ang ngalan sang Dios sa Biblia. Sa Maayong Balita nga Biblia, ang footnote sang Genesis 2:4 nagasiling: “Ang GINOO sa Hebreo nga teksto Yahweh. Sa iban nga pagbadbad ginagamit ang Jehova.”