PAGBANTAY SA KALIBUTAN
Pagtalupangod sa Relihion
Dapat kuntani nga ang relihion bangdan sang paghiusa. Pero masami nga amo pa ini ang ginabangdan sang kinagamo kag pagkadula sang pagsalig.
Bilog nga Kalibutan
Kapin sa 75 porsiento sang populasyon sang kalibutan ang nagaistar sa mga pungsod diin may pagdumili sa relihion, bangod sang opisyal nga mga kasuguan ukon bangod sang pagpamatok sang mga tawo. Sa sulod lang sang lima ka tuig, halos nagdoble ang kadamuon sang pungsod diin natabo ang pag-abuso batok sa diutay sing miembro nga mga relihion.
BINAGBINAGA INI: Ano ang magkatuhay nga mga rason kon ngaa ang iban nga mga tawo batok sa relihion?—Mateo 23:27, 28; Juan 15:19.
England
Ang anay primer ministro nga si Tony Blair nagsulat sa pamantalaan nga Observer nga “ang pag-abuso sa relihion” isa ka kinaandan nga rason sang mga buhat sang terorismo sining karon lang. “Ang mga inaway sini nga siglo,” dugang niya, “nagakatabo indi bangod sang pulitikal nga ideolohiya—pareho sang natabo sa ika-20 nga siglo—kundi bangod sang magkatuhay nga kultura ukon relihion.”
BINAGBINAGA INI: Ngaa masami nga ginabangdan ang relihion sang pagbinahinbahin?—Marcos 7:6-8.
Australia
Suno sa Australian Bureau of Statistics, 1 sa kada 5 ka Australiano ang nagasiling nga wala sila sing relihion. Bisan “ang pagsiling sang isa nga may relihion sia wala nagakahulugan nga aktibo sia sa iya relihion,” siling sang report. Kinse porsiento lang sang mga lalaki kag 22 porsiento sang mga babayi nga may relihion ang nagasiling nga aktibo sila nga nagapakigbahin sa isa ka relihioso ukon espirituwal nga grupo.
BINAGBINAGA INI: Ano nga negatibo nga mga butang ang makita sa kalabanan nga organisado nga relihion subong?—Mateo 7:15-20.