Tumalagsahon nga Palamatin-an sang Isa ka Sahi sang Sugba-sugba

ANG isa ka sahi sang sugba-sugba nga ginatawag greater wax moth sa Ingles tuman ka anting sa mga tunog sangsa bisan ano nga tinuga nga nakilala sa kalibutan. Pero simple lang ang mga dulunggan sini nga daw ulo sang yano kagamay.

Binagbinaga: Sa sulod sang mga tinuig, ginatun-an ang palamatin-an sini nga sugba-sugba. Sining karon lang, gintilawan sang mga sientipiko sa University of Strathclyde, sa Scotland, ang palamatin-an sini nga sugba-sugba sa lainlain nga mga tunog. Gintakus nila ang pagkurog sang tympanal membranes kag ginrekord ang pagpanghikot sang ila auditory nerves. Ang ila “eardrums” nagakurog sa mga tunog sa kadasigon nga tubtob sa 300 ka kilohertz. Sa pagpaanggid, ang kabog ginrekord nga makabati tubtob sa 212 ka kilohertz, ang mga dolpin naman tubtob sa 160 ka kilohertz, kag ang tawo asta lang sa 20 ka kilohertz.

Luyag gamiton sang mga manugpanalawsaw ang superyor nga palamatin-an sini nga sugba-sugba subong basihan sang bag-o nga teknolohiya. Ngaa? “Agod makabulig sa paghimo sing mas maayo kag mas gamay pa nga mga mikropono,” siling ni Dr. James Windmill sang University of Strathclyde. “Puede ini matakod sa madamo nga gadyet subong sang mga mobile phone kag mga hearing aid.”

Ano sa banta mo? Ang tumalagsahon nga palamatin-an sang isa ka sahi sang sugba-sugba resulta bala sang ebolusyon? Ukon gindesinyo ini?