Ang Nagasuyop sing Tubig nga Panit sang Thorny Devil Lizard

ANG thorny devil lizard (Moloch horridus) sang Australia nagakuha sing tubig halin sa alipuop, hun-og, kag basa nga balas. Dayon ginapailig sini ang tubig pakadto sa iya baba agod imnon. Paano? Ang sabat mahimo nasandig sa makatilingala nga panit sini.

Binagbinaga: Ang panit sang thorny devil may mga himbis. Ginahunahuna sang iban nga sientipiko nga ang hun-og ukon tun-og nga nagasupot sa mga himbis nagailig sa magaras nga panit sini kag nagasulod sa gamay nga mga kanalkanal sa panit ukon mga giha sa ulot sang mga himbis sini. Ini nga mga kanalkanal nagaangtanay kag nagadiretso sa kilid sang baba sini.

Apang paano sini ginapailig ang tubig—halin sa iya mga tiil, sa iya lawas, kag pakadto sa iya baba—nga ginakontra ang grabidad? Kag paano ginakuha sang thorny devil ang tubig halin sa basa nga mga butang paagi sa pagbagnos sang iya tiyan sa sini?

Daw nahibaluan na sang mga researcher ang sekreto sang thorny devil. Ang mga kanalkanal sa himbis nagaangot sa mga kanalkanal sa panit sini. Bangod sang pagkahuman sini nga mga kanalkanal, ang tubig makapanalupsop pasaka sa gamay kaayo nga espasyo bisan pa kontra ini sa puersa sang grabidad. Gani ang panit sang thorny devil daw kaangay sang espongha.

Si Janine Benyus, presidente sang Biomimicry Institute, nagsiling nga ang pag-ilog sa mga nagasuyop sing tubig nga teknolohiya makabulig sa mga enhinyero nga makahimo sing kagamitan agod makuha ang hun-og sa hangin nga makapabugnaw sa mga bilding kag makakuha man sang tubig nga ilimnon.

Ano sa banta mo? Ang nagasuyop sing tubig nga panit sang thorny devil lizard resulta bala sang ebolusyon? Ukon gindesinyo ini?