Kon ang Isa ka Hinigugma Nagamasakit

“Sang dali na lang maggua si Tatay sa ospital, ginpangabay namon ang doktor nga usisaon liwat ang blood test ni Tatay. Ginpasalig kami sang doktor nga normal ang resulta, apang ginlantaw niya ini. Nakibot sia, kay indi normal ang duha ka resulta! Nangayo sia sing pasaylo kag nagtawag sang espesyalista. Maayo na karon si Tatay. Apang nalipay kami bangod namangkot kami.”—Maribel.

Asawa nga nagabulig sa iya bana sa paghimo sing listahan sang mga sintomas kag mga bulong nga ginagamit niya — Antes magpadoktor, ilista ang mga sintomas kag ang mga bulong nga ginagamit

Ang pagpadoktor kag ang pagtener sa ospital mabudlay gid. Suno sa ginapakita sang eksperiensia ni Maribel, daku gid ang mabulig sang isa ka abyan ukon paryente—puede pa gani ini makaluwas sang kabuhi. Paano mo mabuligan ang imo hinigugma?

Antes magpadoktor. Buligi ang pasyente nga ilista ang iya mga sintomas subong man ang mga bulong nga iya ginatomar. Ilista man ang kinahanglan ipamangkot sa doktor. Buligi ang imo abyan nga dumdumon ang tanan nga detalye parte sa iya balatian ukon basi may miembro sang iya pamilya nga may amo man sini nga balatian. Indi maghinakop nga nahibaluan na sang doktor ina nga mga detalye ukon ipamangkot pa niya ini.

Samtang nagapakig-istorya sa mag-asawa, ang asawa nagasulat sang importante nga ginhambal sang doktor — Magpamati, magpamangkot sing matinahuron, kag isulat ang importante nga ginasiling sang doktor

Sa tion sang pagpadoktor. Pat-ura nga nahangpan mo kag sang pasyente kon ano ang ginasiling sang doktor. Magpamangkot apang indi mag-insister. Tuguti ang pasyente nga mamangkot kag maghambal para sa iya kaugalingon. Magpamati kag isulat ang importante nga ginasiling sang doktor. Magpamangkot sang iban pa nga paagi sang pagbulong. Sa iban nga kaso, maalamon nga manugda sa pasyente nga magkadto sia sa iban pa nga doktor.

Ginabasa sang mag-asawa ang ila ginsulat nga ginhambal sang doktor — Binagbinaga upod sa pasyente ang instruksion sang doktor, kag tan-awa ang mga reseta

Pagkatapos magpadoktor. Binagbinaga upod sa pasyente ang resulta sang pagpadoktor. Pat-ura nga insakto ang iya bulong. Palig-una sia nga tomaron ang bulong nga ginreseta sa iya kag pahibalua dayon ang doktor kon may indi ini maayo nga epekto sa iya. Palig-una sia nga mangin positibo kag sundon ang iban pa nga instruksion, kaangay sang dugang nga pagpabulong. Buligi sia nga mahangpan gid ang iya balatian.

Sa Ospital

Mangin kalmado kag atentibo. Ang pasyente nga ginadala sa ospital mahimo nabalaka kag maluya. Kon kalmado kag atentibo ka, mabuligan mo ang iban nga mangin kalmado man kag malikawan nga magsala sa ila himuon. Pat-ura nga nasulatan sing insakto ang mga pormas. Respetuha ang kinamatarong sang pasyente nga magdesisyon parte sa pagpabulong. Kon indi na niya ini masarangan, respetuha ang iya nasulat nga desisyon kag ang awtoridad sang iya pinakamalapit nga paryente ukon ang iya gintugyanan nga representante sa pagpabulong.a

Ang babayi kag ang iya representante sa pagpabulong nagapakig-istorya sa isa ka staff sang ospital — Matinahuron nga isugid sa mga doktor ang imo naobserbahan sa pasyente

Magpakita sing inisyatibo. Indi mahadlok nga maghambal. Kon disente ka kag may maayo nga kinaiya, magapahulag ini sa mga nagabulong nga hatagan sing atension ang pasyente kag atipanon sia sing maayo. Sa madamo nga ospital, lainlain nga doktor ang nagaatipan sa pasyente. Makabulig ka sa ila paagi sa pagsugid kon ano ang ginsiling sang iban nga doktor. Kilala mo gid ang pasyente, gani talupangda kon may mga pagbag-o sa iya lawas kag pamensaron.

Samtang nagapaayo ang babayi sa ospital, ang iya representante sa pagpabulong nagapakig-istorya sa nars — Himua ang imo masarangan apang indi mag-insister

Magpakita sing pagtahod kag magpasalamat. Masami nga gina-stress ang mga nagaobra sa ospital. Pakig-anguti sila kon ano ang luyag mo nga pagpakig-angot sa imo. (Mateo 7:12) Tahura sila bangod sang ila paghanas kag eksperiensia, magsalig sa ila ikasarang, kag magpasalamat sa ila panikasog. Ina nga apresasyon magapalig-on sa ila nga himuon ang ila bug-os nga masarangan.

Tanan kita mahimo magmasakit. Apang paagi sa paghunahuna sing abanse kag sa imo pagsuporta, mabuligan mo ang imo abyan ukon paryente nga maatubang ang mabudlay nga sitwasyon.—Hulubaton 17:17.

a Ang mga kasuguan kag pagsulundan parte sa kinamatarong kag katungdanan sang pasyente mahimo nga lainlain sa kada lugar. Pat-ura nga kompleto ang mga dokumento nga nagaunod sang nasulat nga desisyon sang pasyente kag dapat bag-o ini.