Ano ang Himuon Kon Magkatuhay Kamo?

NGAA ISA KA HANGKAT?

Nanamian ka sa sports; ang imo tiayon nanamian magbasa. Mauti ka kag organisado; ang imo tiayon indi gid organisado. Nanamian ka makig-upod sa iban; ang imo tiayon balaynon.

‘Indi gid kami bagay!’ siling mo. ‘Ngaa wala namon ini natalupangdan sang nobyahanay pa lang kami?’

Mahimo gid nga natalupangdan mo na ini. Pero sang una nagapaumod ka lang—ang kinaiya nga kinahanglan mo palambuon liwat bangod mag-asawa na kamo. Ini nga artikulo makabulig sa imo nga mahimo ina. Apang, binagbinagon anay naton ang pila ka butang nga daw indi kamo bagay.

ANO ANG DAPAT MO MAHIBALUAN?

Mahimo nga serioso ang pila ka butang nga magkatuhay kamo. Ang panguna nga katuyuan sang pagnobyahanay amo ang paghibalo kon bala bagay kamo nga duha. Gani madamo nga magnobyahanay ang nagabulagay kon makita nila nga serioso gid nga magkatuhay sila, imbes nga magpakasal sila nga wala nagahangpanay. Pero ano abi kon daw indi man lang ini salapakon kag normal na sa pag-asawahay?

Wala sing duha ka tawo ang pareho gid. Normal lang nga magkatuhay ang mag-asawa sa isa ukon kapin pa sa masunod:

Interes. “Wala gid ako nanamian sang mga buluhaton sa gua sang balay,” siling sang asawa nga si Anna,a “pero halin sang bata pa ang akon bana nanamian sia sa pagtaklad sa mga bukid nga nakulapan sing snow kag paglakat sing inadlaw sa kakahuyan.”

Kinabatasan. “Bisan gab-i na magtulog ang akon asawa makabugtaw sia sing alas 5:00 sa aga, pero kinahanglan ko magtulog sing pito asta walo ka oras kay kon indi nagapasingit ako,” siling sang bana nga si Brian.

Personalidad. Mahimo hipuson ka, pero ang imo asawa palahambal. “Wala ako naanad nga mag-istorya parte sa akon personal nga mga problema,” siling sang bana nga si David, “pero ang akon asawa nagdaku sa pamilya nga ang tanan ginaistoryahan nila.”

May bentaha man kon magkatuhay kamo. “Ang akon paagi mahimo nga maayo, pero indi buot silingon nga amo lang gid ini ang paagi,” siling sang asawa nga si Helena.

ANG MAHIMO MO

Makigbagay sa imo tiayon. Ang bana nga si Adam nagsiling: “Ang akon asawa nga si Karen wala gid hilig sa sports. Pero nagaupod sia sa akon sa pila ka hampang kag nagahugyaw upod sa akon. Si Karen naman nanamian magkadto sa mga museo, gani ginaupdan ko sia kag nagapadugay kami didto mientras gusto niya. Ginatinguhaan ko gid nga mangin interesado sa art kay amo ini ang hilig niya.”—Prinsipio sa Biblia: 1 Corinto 10:24.

Pasangkara ang imo pagtamod. Indi buot silingon nga sala ang pagtamod sang imo tiayon bangod lain ini sangsa imo. Amo ini ang narealisar sang bana nga si Alex. “Sang una, abi ko isa lang ang pinakaepektibo nga paagi sa paghimo sang isa ka butang kag ang iban nga paagi indi epektibo,” siling niya. “Apang sang nangasawa ako, narealisar ko nga madamo sing paagi nga mahimo ang isa ka butang kag ang kada paagi puede mangin epektibo.”—Prinsipio sa Biblia: 1 Pedro 5:5.

Mangin realistiko. Indi kinahanglan nga pareho gid kamo para mangin bagay kamo. Gani indi ka maghunahuna nga sala ang ginpakaslan mo bangod nakita mo ang pila ka butang nga magkatuhay kamo. “Madamo ang nagarason, ‘Nabulagan ako sang gugma,’” siling sang libro nga The Case Against Divorce. Apang “ang kada adlaw nga malipayon kamo,” siling pa sang libro, “nagapakita nga bisan pa may mga butang nga magkatuhay kamo, mahimo kamo maghigugmaanay.” Tinguhai nga ‘padayon ninyo nga batason ang isa kag isa bisan pa ang isa may rason nga magreklamo sa isa.’—Colosas 3:13.

Tilawi ini: Listaha ang mga butang nga nanamian mo kag listaha man ang pareho ninyo nga nanamian. Dayon listaha ang mga butang nga indi kamo pareho sing nanamian. Makita mo nga ini nga mga butang mahimo nga daw indi man gid salapakon. Ipakita man sini nga listahan kon diin ka puede magpaumod ukon makigbagay sa imo tiayon. “Nanamian gid ako kon nagapakigbagay sa akon ang akon asawa, kag nahibaluan ko nga nanamian man sia kon makigbagay ako sa iya,” siling sang bana nga si Kenneth. “Bisan pa kinahanglan ko magsakripisyo, kon makita ko sia nga malipayon nalipay man ako.”—Prinsipio sa Biblia: Filipos 4:5.