Paglandas sa Madugay Na nga Balagbag

ANG lainlain kag madamo nga lenguahe sa kalibutan—mga 7,000 sa karon—nagapabudlay sa pagbiyahe, pagnegosyo, edukasyon, kag gobierno. Halin sang una amo na sini ang kahimtangan. Halimbawa, sang nagligad nga mga 2,500 ka tuig, sa idalom sang paggahom ni Hari Ahasuero (mahimo si Xerxes I), nagpadala sing opisyal nga mando ang Persianhon sa tanan nga ginsakpan sini, “halin sa India tubtob sa Etiopia, 127 ka probinsia, sa tagsa ka probinsia suno sa naandan sini nga paagi sang pagsulat kag suno sa ila kaugalingon nga hambal.”a

Sa karon, kalabanan sang mga organisasyon—bisan ang mga gobierno—indi magtinguha sa sining mabudlay nga buluhaton. Apang, may isa ka organisasyon nga nangin madinalag-on sa sini nga hilikuton. Nagabalhag ang mga Saksi ni Jehova sang mga magasin, rekording sang audio kag video, kag madamo nga libro—lakip sang Biblia—sa kabilugan nga kadamuon nga sobra sa 750 ka lenguahe. Lakip sa sini ang mga 80 ka sign language. Nagabalhag man ang mga Saksi sing lainlain nga bersion sang Braille para sa bulag.

Labaw sa tanan, wala ini ginanegosyo sang mga Saksi ni Jehova. Ang matuod, boluntaryo ang tanan nila nga manugbadbad kag ang iban pa nga nagatrabaho. Ngaa nagapanikasog gid sila sa pagbadbad sa madamo nga lenguahe, kag paano nila ini nahimo?