Pagtipon sa mga Tawo Gikan sa Tanan nga Hambal

¹ Nagakatuman ang Pulong sang Dios! Ang mga tawo “gikan sa tanan nga hambal sang mga pungsod” nagabaton sang matuod nga pagsimba. (Zac. 8:23) Paano ginabuligan sang mga Saksi ni Jehova ang mga indibiduwal sang tanan nga ‘tribo, katawhan kag hambal’ nga makatigayon sing matinlo nga tindog sa atubangan ni Jehova, kag may paglaum nga maluwas sa “dakung kapipit-an”?​—Bug. 7:​9, 14.

² Nagahulag ang Organisasyon sang Dios: Ang Nagadumala nga Hubon naghimo sing kahimusan nga ang mga literatura sa Biblia matigayon sa mga 380 ka hambal agod nga mahangpan sing maayo sang mga tawo sa bug-os nga duta ang importansia sang maayong balita. Ang paghanda kag pagbalhag sing mga literatura sa madamo nga hambal isa ka daku gid nga trabaho. Nagalakip ini sang pagpangita sang kalipikado nga mga manugbadbad kag paghatag sa ila sing bulig nga kinahanglanon sa pagbadbad sang aton literatura sa sini nga mga hambal, subong man sa pag-imprinta kag pagpadala sing mga materyal. Apang, ang importante nga papel ginatungdan sang indibiduwal nga mga manugbantala sang Ginharian, nga amo ang nagadala sang nagaluwas kabuhi nga mensahe sang Biblia sa mga tawo.

³ Pagbaton sa Hangkat: Madamo sing tawo nga nagahambal sing dumuluong nga mga hambal ang masapwan karon sa madamong duog. Agod madalhan sing maayong balita ining mga tawo, madamo pa nga alagad sang Dios ang nagapanikasog sa pagtuon sang Intsik, Ruso, Katsila, ukon iban pa nga hambal nga kinaandan sa ila duog. Ang iban nagatuon sang Sign Language. Sa Estados Unidos lamang, may mga 2,900 ka kongregasyon kag 240 ka grupo ang nagabantala sa 38 ka hambal luwas sa Ingles. Ang pila ka tawo nga wala pa gid anay nakabati tuhoy kay Jehova ukon wala gid sing nahibaluan sa Biblia nagabaton na sing kamatuoran sang Pulong sang Dios.​—Roma 15:​21.

⁴ Madugangan pa bala naton ang aton panikasog sa pagbantala sing maayong balita sa mga tawo sa aton teritoryo nga naghalin sa iban nga pungsod? (Col. 1:​25) Madamo nga kongregasyon ang nagaorganisar sang pagbantala sa komunidad sang mga dumuluong sa ila teritoryo. Ang mga manugbantala nagtuon anay sing diutay tuhoy sa hambal kon paano maghatag sing isa ka simple nga presentasyon, subong sang: “Kamusta ka. May maayong balita ako para sa imo. [Nian itanyag ang isa ka tract ukon brosyur nga matigayon sa sini nga hambal.] Paalam.” Ginapakamaayo gid ni Jehova ining diutay nga mga panugod!

⁵ Ang mensahe sang Ginharian makagalanyat sa mga tawo sa bisan ano nga ginhalinan kag hambal. Himuslan naton ang kahigayunan nga mapaambit ini sa ila.