Ano ang Himuon Mo Kon May mga Pagbag-o?

NGAA ISA KA HANGKAT?

• Kinahanglan magsaylo ang inyo pamilya bangod sa obra sang imo amay.

• Ang imo suod nga abyan masaylo sa malayo nga lugar.

• Ang imo magulang nga kalaslon mahalin na sa inyo balay.

Ano ang himuon mo sa sini nga mga pagbag-o?

Ang kahoy nga nagapaayon sa hangin mahimo nga indi matumba sang bagyo. Kaangay sina nga kahoy, mahimo ka “magpaayon” sa mga pagbag-o nga indi mo makontrol. Pero antes naton ina binagbinagon, tandai ang pila ka butang nga dapat mo mahibaluan parte sa pagbag-o.

ANO ANG DAPAT MO MAHIBALUAN?

Indi malikawan ang mga pagbag-o. Ang Biblia nagsambit sang realidad parte sa mga tawo: “Ang wala ginapaabot nga hitabo nagakatabo sa ila tanan.” (Manugwali 9:11) Sa ulihi, maeksperiensiahan mo nga matuod ini nga mga pulong. Siempre, indi man malain ang tanan nga wala ginapaabot nga mga hitabo. Ang pila sang mga pagbag-o nga sang primero daw indi maayo mahimo nga makabulig pa gani sa imo. Matawhay ang kabuhi sang kalabanan kon wala sing mga pagbag-o. Pero kon may mga pagbag-o na gani, nabudlayan na sila.

Ang pagbag-o nagapabudlay sa mga tin-edyer. Ngaa? “May nabatyagan ka na nga daan nga mga pagbag-o sa imo lawas,” siling sang pamatan-on nga si Alex.a “Ang mga pagbag-o sa imo palibot nagapabudlay pa gid sa imo.”

Ari ang isa pa ka rason: Kon may pagbag-o sa mga adulto, mahimo nila dumdumon ang ila mga eksperiensia nga kaanggid sini para mahibaluan kon ano ang ila himuon subong. Pero ang mga pamatan-on diutay pa lang ang eksperiensia.

Makapasibu ka. Ang pagpasibu amo ang ikasarang nga madali ka maumpawan kon makaatubang sing mga kabudlayan ukon mga pagbag-o. Ini nga tawo makabatas sang bag-o nga kahimtangan kag ginatan-aw ang balagbag subong kahigayunan. Ang mga pamatan-on nga makapasibu wala nagadroga ukon nagapahubog kon may mga kabudlayan.

ANO ANG MAHIMO MO?

Batuna ang realidad. Siempre gusto mo gid nga kontrolado mo ang imo kabuhi, pero imposible ina. Ang imo mga abyan magasaylo, mangasawa ukon mamana; ang imo mga utod magadaku kag magabiya sa inyo; mahimo mapilitan ang inyo pamilya nga magsaylo bangod sa mga kahimtangan, amo nga biyaan mo ang imo mga abyan kag ang tanan nga naandan mo na. Maayo nga batunon mo ang realidad imbes nga padayon nga mamensar sing negatibo.—Prinsipio sa Biblia: Manugwali 7:10.

Magpokus sa unahan. Ang pagpokus sa nagligad daw pareho sa pag-drayb sa haywey nga ang ginatan-aw mo lang amo ang side mirror. Makabulig sa imo kon tan-awon mo ini kon kaisa, pero kinahanglan mo magpokus sa unahan. Amo man sini kon may pagbag-o. Ipokus ang imo mga mata sa unahan. (Hulubaton 4:25) Halimbawa, ano ang gusto mo nga himuon sa masunod nga bulan, ukon anom ka bulan?

Magpokus sa positibo. “Daku ang epekto sang panimuot sa pagpasibu,” siling sang pamatan-on nga si Laura. “Tan-awa ang positibo sa imo kahimtangan subong.” May mapensaran ka bala bisan isa lang ka bentaha sa imo bag-o nga kahimtangan?—Prinsipio sa Biblia: Manugwali 6:9.

Ang pamatan-on nga si Victoria nagsiling nga sang tin-edyer pa sia, ang tanan niya nga suod nga abyan nagsaylo. “Nasubuan gid ako, kag gusto ko tani amo lang gihapon ang tanan,” siling niya. “Pero kon balikan ko ang nagligad, amo yadto ang tion nga naghamtong ako. Narealisar ko nga para maghamtong kita kinahanglan ang pagbag-o. Bangod sadto, nakakita man ako sing bag-o nga mga abyan nga yara lang sa palibot.”—Prinsipio sa Biblia: Hulubaton 27:10.

Magbulig sa iban. Ang Biblia nagsiling: “[Pangitaa] ninyo indi lamang ang inyo personal nga kaayuhan, kundi ang iya man sang iban.” (Filipos 2:4) Ang pagbulig sa iban makapahaganhagan sang imo kasubo. Si Anna nga 17 anyos, nagsiling: “Samtang nagadaku ako, narealisar ko nga ang pagbulig sa iban nga mahimo may pareho man sa akon nga naagyan, ukon mas malala pa, makalilipay gid!”