TOPIKO SA KOBER | ANO ANG SA LIKOD SANG MAKATILINGALA NGA MGA BUTANG?
Interesado Gid Sila sa Makatilingala nga mga Butang!
“Pahigad kamo, ara na ang mga bampira, werewolf, kag zombie—mga ginsudlan sang demonyo kag mga gintabog nga demonyo.”—The Wall Street Journal.
MGA salamangkero nga bata kag tigulang, guapa nga mga aswang ukon babaylan, kag guapo nga mga bampira—pila lamang ini sa makatilingala nga mga karakter nga mabasa sa mga libro, makita sa mga pelikula kag mga hampang sa kompyuter. Ngaa madamo ang nanamian sa sini?a
“Nagdamo ang mga nagapati sa mga murto sa sining karon lang nga mga dekada, halin sa isa sa kada napulo ka Amerikano nangin isa sa kada tatlo,” sulat sang propesor sa sosyologo nga si Claude Fischer. “Halos doble ang kadamuon sang pamatan-on nga mga Amerikano sa adulto nga mga Amerikano ang nagasiling nga nagapamangkot sila sa mga espiritista, nagapati sa mga murto, kag nagapati nga may makahaladlok nga mga balay.”
Indi makapakibot nga grabe ang paglapnag sang mga istorya parte sa malain nga mga espiritu nga nagasulod sa mga tawo. “Madamo na naman ang nagapati sa pagsulod sang mga demonyo sa mga tawo bangod nangin popular ang zombie, werewolf, kag bampira sang nagligad nga dekada,” sulat ni Michael Calia sa The Wall Street Journal.
Suno sa isa ka report, “mga 25 porsiento asta 50 porsiento sa mga tawo sa bilog nga kalibutan ang nagapati sa mga murto, kag pirme mabasa ang parte sa mga murto sa mga balasahon sa kalabanan nga mga kultura.” Ginapakita sang surbe sa Estados Unidos sang mga propesor sa sosyologo nga sanday Christopher Bader kag Carson Mencken “nga makapakibot gid nga 70 asta 80 porsiento sang mga Amerikano ang nagapati sa indi magkubos isa ka klase sang makatilingala nga mga hitabo.”
Wala bala sing malain kon mag-entra ka ukon madalahig sa espiritismo kag iban pa nga makatilingala nga mga butang?
a Makatilingala nga mga butang: Butang nga “indi mapaathag sang siensia ukon sang kasuguan sa kinaugali.”—Merriam-Webster’s Learner’s Dictionary.