Ang mga Benepisyo sang Pagpugong sa Kaugalingon

ANO ANG PAGPUGONG SA KAUGALINGON?

Nalakip sa pagpugong sa kaugalingon ang

• paghulat antes makuha ang imo gusto

• pagpugong sa imo mga handum

• pagtapos sa mga obra bisan wala mo nanamian

• pag-una sa iban sangsa imo kaugalingon

NGAA IMPORTANTE ANG PAGPUGONG SA KAUGALINGON?

Ang mga bata nga may pagpugong sa kaugalingon makabato sa pagsulay bisan pa daw makalilipay ini himuon. Pero, ang mga bata nga wala sing pagpugong sa kaugalingon mahimo nga

• mas madali maakig

• may depresyon

• magapanigarilyo ukon magapahubog ukon maga-drugs

• magakaon sang indi maayo nga mga pagkaon

Nakita sa isa ka pagtuon nga ang mga bata nga may pagpugong sa kaugalingon wala halos sing problema sa panglawas ukon sa kuarta, kag masinulundon sa kasuguan kon magdaku na sila. Base sa sini nga pagtuon, ang propesor sang University of Pennsylvania nga si Angela Duckworth nagsiling: “Wala gid sing malain nga resulta ang pagpugong sa kaugalingon.”

KON PAANO ITUDLO ANG PAGPUGONG SA KAUGALINGON

Tun-i nga magpangindi kag panindugi gid ini.

PRINSIPIO SA BIBLIA: “Dapat nga ang inyo ‘Huo’ mangin huo, ang inyo ‘Indi,’ indi.”—Mateo 5:37.

Mahimo nga testingan sang magagmay nga mga bata ang ila ginikanan paagi sa pagmaoy, bisan sa mga lugar nga damo sing tawo. Kon madala nila ang ila ginikanan, mapensar ang mga bata nga makuha nila pirme ang ila gusto kon magmaoy sila.

Pero, kon mangindi ang ginikanan kag panindugan gid ini, matun-an sang bata ang importante nga leksion sa kabuhi—nga indi naton pirme makuha ang gusto naton. “Ang matuod, ang mga tawo nga nakatuon sina nga leksion amo ang mas malipayon,” sulat ni Dr. David Walsh. “Indi gid maayo nga papatihon ang mga bata nga makuha nila pirme ang ila gusto.”a

Ang pagpangindi sa imo bata subong makabulig sa iya nga magpugong sang iya kaugalingon sa ulihi, halimbawa, kon may magsulay sa iya nga mag-drugs, mag-sex, ukon maghimo sing malain.

Buligi ang imo bata nga maintiendihan ang maayo kag malain nga resulta sang iya himuon.

PRINSIPIO SA BIBLIA: “Kon ano ang ginasab-ug sang tawo, ini man ang iya anihon.”—Galacia 6:7.

Dapat maintiendihan sang imo bata nga may resulta ang tanan niya nga ginahimo, kag malain gid ang resulta kon wala sia sing pagpugong sa kaugalingon. Halimbawa, kon ang imo bata nga lalaki wala sing kontrol sa iya kaugalingon kon akig sia, mahimo nga likawan sia sang iban. Pero, kon matun-an niya nga punggan ang iya kaugalingon bisan pa ginapaakig sia—ukon maghulat imbes nga magsamulak kon may nagahambal—manamian ang mga tawo sa iya. Ipaintiende sa imo bata nga mangin mas malipayon sia kon may pagpugong sia sa kaugalingon.

Tudlui ang imo bata kon ano ang dapat unahon.

PRINSIPIO SA BIBLIA: ‘Pat-ura ninyo ang mas importante nga mga butang.’—Filipos 1:10.

Ang pagpugong sa kaugalingon indi lamang paglikaw sa paghimo sing malain; kundi paghimo sang kon ano ang kinahanglanon, bisan pa wala mo ini nanamian himuon. Dapat matun-an sang imo bata kon ano nga mga butang ang mas importante kag amo ini ang unahon. Halimbawa, dapat niya unahon ang iya homework sangsa paglingawlingaw.

Mangin maayo nga halimbawa.

PRINSIPIO SA BIBLIA: “Naghatag ako sa inyo sang sulundan, nga ang ginhimo ko sa inyo, dapat man ninyo himuon.”—Juan 13:15.

Makita sang imo bata ang imo reaksion sa mabudlay ukon makapaakig nga mga sitwasyon. Ipakita paagi sa imo ginahimo nga may maayo nga resulta ang pagpugong sa kaugalingon. Halimbawa, kon may ginahimo nga indi maayo ang imo bata, nagapangakig ka bala dayon ukon kalmado ka lang gihapon?